2
Paulo ina lovina da Pilipai idi spwagógana
be idi nuwonúwana manudi
be idi nuwonúwana manudi
1 E tuwo nuwomi tayamo manuna bei alatuwokoimi. Kita spwagoogonida Guyau taiyao pasina ada kipáiwala tababane ae? U, nakae. Guyauyana ina matakoi bogina ateda ivapatupatudi ae? U, nakae. Baloma Kimaasabaina bogina takabivekovekoe ae? U, nakae. Yaubada ina yabobona be ina nuwokapisi bogina talotowoidi ae? U, nakae. 2 Tauna kovauyaonedokōigu ame nakae: Mami nuwoovavāsa,†Rom 12:16. mami matakooi vavāsa semiyao yaidi, kooebōda tayamo be nakae nuwomi tayamo. 3 Geya tayaamo kaga amitava imi yala manuna o nuwatue goi koguuinūwe, go sem mami nuwootokai konuwonūwana semiyao sitaoyakukuyuimi. 4 Taabu amitava ami dedevina manuna konuuwonūwana, go sem semiyao adi dedevina manudi konuuwonūwana.
5 Moe nuwonuwanayadi yaimi goi koyoisikavatēdi unana Guyau Yeisu nuwona goi nakae iyoisikavatedi. Tauyana ina sinapu ame nakae:
6 Tauyana Yaubada ana tapata,
e Yaubadayana taiyao sivavasa go,
tuwo geya inuwonuwoneta
bego idi vavasayana iepaisewe
toinina ana dedevina manuna.
7 Go sem kebana esaaesaina goi toinina ikisobuye ame nakae:
Tomota idi pakonayao adi tapata ikote,
e ibíbina tomota maisiyadi.
Tuwo Tauyana kita tomota nakae 8 go,
toinina inuwotokai ame nakae:
Yaubada ikabikaonedoko go,
ina kabikawanayana goi toinina ikasale ikámasa!
Ego ina kamasayana kerose goi
moe aba omayamaya!
9 Tauna Yaubada ikilagasi toina
be nakae you gagaina ivini go,
youyana you liliudi ikalisavedi.‡Youyana you liliudi ikalisavedi: Kidi Diyuu idi sinapu goi you tayamo gagaina toina nakae you liliudi ikalisavedi. Moe youyana Yaubada yoina Yauwe.
10 Moe nakae iguinuwe
bego youyana ivinivini goi
da yábana be da poyapoya
be nakae tokámasa liliudikova
aedi sivatugúyala Yeisu yaina goi
11 be nakae Yeisu Guyauyana sikatomoyae
bego kina Tomoya.‡Tomoya: Boi nimatu kidi Diyuu geya latuwodi Yaubada yoina Yauwe sikaigoyai, tauna tomota sisanabodedi taabu siivatōi. Moitamo geya sivatoiyeta, go sem neta yoina sigite, bei kadi, ‘Tomoya.’ Niga Buki Kimaasabaina sikaigavile bego Diyuu tokanagiriki itoboinedi sikatuyaivi. Nako goi Yauwe ikaaiyaka sigini kadi, ‘Tomoya.’ Ame tomwanayana goi nakona Tomoya moe Yaubada yoina Yauwe.†Ais 45:18,23; Rom 14:11.
Moe Yaubada ana taimámina manuna.
12 Tauna guna kaloyao, boi tuta liliuna kokabikaaonegu, e ame tuta nakae go, imi kabikawanayana geya kada guna kaiyako yaimi pasina kokaabikáwana geya, go sem geya akaiyaketa yaimi goi go, imi kabikawanayana kokidedēde. Nakae bogina kokabikáwana mami matoita be mami malitatátava Yaubada matana goi toinimi ami yava keuwoina kovagitakōe. 13 Moe itoboinemi. Yaubada mana togaga yaimi ipaaisewa go, ina paisewayana pasina ina nuwonúwana koyale koguinuwe be nakae ami toboine koguuinuwe nakae Tauyana latuwona.
14 Kaga liliuna koguuinuwedi geya imi kaukulukuluwomo†Tat 16:7-12. be geya imi kaumakimakimo koguuinuwēdi 15 bego komi geya ami pikwanamo be nakae imi sinapu maavadaidi, nakae komi Yaubada natunao geya imi bagalamo tomota sulaaigidi be toogoyoidi nauyayanaidi goi.†Atu 32:5. Imi kaiyaka yaidi goi komi utuna nakae koninínima poyapoya ame goi 16 unana Vala Dedevina yawoida vau manuna koyoisiikavate.‡Koyoisiikavate: Ame itoboineda takaigavile kada, ‘Tutayana vala dedevina yawoida vata manuna kotalavaite tomota yaidi.’ Neta nakae koguuinuwe, e Guyau ina Maliyalina goi yau itoboinegu aedidigu bei asamolai bego guna paisewa yaimi goi vavalákuna nakae geya kada alokoina besobeso o guna poisógana yaimi goi geya keuwoinamo geya. 17 Go sem bei auyáwana ida gedageda vavasa pasidi. Gedagedayadi vininabeso oine be vininabeso yoguyogu taiyao nakae takasaledi Yaubada yaina. Yau vininabeso oine nakae go, komi imi numisa ina paisewa Guyau manuna moe vininabeso yoguyogu nakae. Tauna kita ida paisewa Guyau manuna moe vininabeso ana yata kówasa tayamo Yaubada yaina nakae. Neta Tonúwala yau vininabeso oine nakae ikaliulagigu yatami, e guna kasala Yaubada yaina manuna auyáwana, nakae komi imi kasala Yaubada yaina manuna auyáwana komi taiyao. 18 E komi nakae. Kouyāwana yau taiyao!
Timoti valena
19 E neta ida Tomoya Yeisu ina nuwonúwana nakae, e alotuta giyakainava Timoti aetune iwo yaimi bego valegu konove, e atemi ivapatupatudi go, yau nakae ategu ivapatupatu tutayana tauyana ikaluvilamna ima valemi ilatuwokoigu. 20 Geya vatau tayaamo tauyana nakae yaigu goi ikaaiyaka. Tauyana anetava atema tayamo go, moitamo inuwonúwana gagaina komi ami dedevina manuna yau nakae. 21 Moitamo tauyana anetava. Boda liliuudi toinidi adi dedevina sisokikine go, Yeisu Guyau ina nuwonúwana manuna geya, tauna geya itoboineguta aetunedi siwo. 22 E Timotiyana ina sinapu dedevina bogina koyagoi bego tauyana ivaitegu Vala Dedevina manuna nakae gómana tayamo neta tamana taiyao sipaaisewa. 23 Tauna tutayana agite kaga bei isowóduwo yau yaigu, e alotuta bei tauyana mainao aetune iwo yaimi. 24 E anumisa ida Tomoya yaina bego yau nakae giyakainava bei ao.
Epapirodito valena
25 E anuwonúwana bego itoboine Epapirodito aetunemnei iwo yaimi. Tauyana siyagu, guna tosavaiyuwo be nakae tovayaviya tayamo yau taiyao Vala Dedevina ana vabodaboda manuna. Ego tauyana boi koetune ima imi yabobona ivinigu. Tauyana imi vamoléyana be nakae imi katumapu yau yaigu, e ivaitegu. 26 Latuwogu tauyana aetune iwo yaimi unana liliumi ikatukuwonemi be nakae manumi inuwokubukubu unana livala konove bego ikatówana. 27 Moitamo toina tauyana ikatówana gagaina, nakae giyakainava bego ikámasa go, geya ikamaseta, go sem Yaubada inuwokapisiye. Ego geya kada tauyana anetava inuwokapisiye geya, go sem yau nakae inuwokapisiyegu, govila bei guna nuwomou ivakaigaga. 28 Tauna latuwogu toina tauyana aetunemnei iwo yaimi bego tutayana kogitemnei, kouyáwana go, yau guna nuwokubukubu bei giyaina isou. 29 E tauna ida spwagógana Tomoya taiyao pasina tauyana mami uyáwana kouyaōne go, avatauwa neta ame tauyana nakae, kowowoinēdi. 30 Tauyana kouyaōne unana Guyau ina guinuwa manuna boi giyakainava ikámasa unana tauyana inuwoupa bego ivaitegu. Vaitayana komi geya itoboinemita kovinigu unana aduwanau goi kokaaiyaka. Tauna tauyana kouyaōne.
‡2:9 Youyana you liliudi ikalisavedi: Kidi Diyuu idi sinapu goi you tayamo gagaina toina nakae you liliudi ikalisavedi. Moe youyana Yaubada yoina Yauwe.
‡2:11 Tomoya: Boi nimatu kidi Diyuu geya latuwodi Yaubada yoina Yauwe sikaigoyai, tauna tomota sisanabodedi taabu siivatōi. Moitamo geya sivatoiyeta, go sem neta yoina sigite, bei kadi, ‘Tomoya.’ Niga Buki Kimaasabaina sikaigavile bego Diyuu tokanagiriki itoboinedi sikatuyaivi. Nako goi Yauwe ikaaiyaka sigini kadi, ‘Tomoya.’ Ame tomwanayana goi nakona Tomoya moe Yaubada yoina Yauwe.
†2:11 Ais 45:18,23; Rom 14:11.
†2:15 Atu 32:5.
‡2:16 Koyoisiikavate: Ame itoboineda takaigavile kada, ‘Tutayana vala dedevina yawoida vata manuna kotalavaite tomota yaidi.’