1 Aigupito idia rakatania murinai hua rua idia ore, hua toi ena dina ginigunana dekenai, Israela taudia be taunimanima idia noho lasi gabuna, Sinai tano dekenai idia ginidae. 2 Unai gabu Repidima idia rakatania murinai, Sinai tano, dekenai idia raka vareai, bona unuseni Israela taudia idia kamepa, Sinai Ororo ena vairana dekenai. 3 Mose ese ororo dekenai ia daekau, Dirava danu hedavari totona.

Lohiabada ese ororo dekena amo Mose dekenai ia boiboi, ia gwau, “Iakobo ena bese taudia, Israela taudia, dekenai inai bamona do oi hereva, do oi gwau, 4 ‘Aigupito taudia dekenai edena bamona lau karaia gaudia umui itaia vadaeni. Umui diba danu edena bamona lau abia mai umui, ugava manu ese iena hanina latanai iena natuna maragi ia abia mai bamona. Vadaeni umui lau hakaua mai inai gabu dekenai, bona lau dekenai umui noho inai. 5 Harihari bema lauegu hereva do umui kamonai henia, bona lauegu taravatu do umui badinaia neganai, umui be lauegu bese korikori do umui lao. Tanobada besedia ibounai be lauegu, to bese ibounai edia huanai umui be lauegu abia hidi besena. 6 Lauegu helaga taudia do lau halaoa umui, bese helagana do umui lao. Lau sibona dekenai do umui helaga.’ Inai bamona do oi hamaoroa Israela taudia dekenai.” 7 Vadaeni Mose ese taunimanima dekenai ia mai, edia gunalaia taudia ia boiridia mai, Lohiabada ese ia oda henia gaudia ibounai idia dekenai ia hamaoroa.

8 Vadaeni, taunimanima ibounai idia haere nega tamona, idia gwau, “Ai be Lohiabada ena hereva ibounai do ai karaia.” Vadaeni Mose ese taunimanima edia hereva Lohiabada dekenai ia hamaoroa.

9 Lohiabada ese Mose dekenai ia hereva, ia gwau, “Lau be ori badana lalonai do lau mai oi dekenai, vadaeni lau hereva oi dekenai neganai, taunimanima be lauegu gadona do idia kamonaia, vadaeni oi dekenai do idia abidadama henia nega ibounai.”

Mose ese taunimanima edia haere hereva Lohiabada dekenai ia hamaoroa. 10 Vadaeni Lohiabada ese Mose dekenai ia hereva, ia gwau, “Israela taudia dekenai oi lao, oi hamaorodia hari dina bona kerukeru be edia lalona do idia karaia hegaegae, tomadiho totona. Edia dabua danu do idia huria. 11 Bona dina ihatoina neganai danu do idia noho hegaegae. Badina unai dina dekenai lau Lohiabada be Sinai Ororo dekenai do lau diho mai, taunimanima ibounai edia vairana dekenai. 12 Ororo do oi hagegea hetoa maka dekena amo, bona taunimanima dekenai oi hamaoroa, oi gwau: Umui naria namonamo, unai maka do umui hanaia lasi, bona ororo dekenai do umui daekau lasi, ma danu ororo ena kahana ta do umui dogoatao lasi. Bema ta ese unai maka ia hanaia, o ororo ia dogoatao neganai, vadaeni do umui alaia mase. 13 Umui be nadi dekena amo do umui hodoa mase, o diba dekena amo do umui pidia mase, to alaia totona emui imana dekenai do umui dogoatao lasi. Bema ia be taunimanima o ubua gauna, to do umui hamasea. To kibi ena regena nega daudau do umui kamonai neganai, ororo kahirakahira dekenai do umui mai.”

14 Unai dainai Mose be ororo dekena amo ia diho mai taunimanima dekenai, vadaeni ia hamaoroa idia dekenai, edia lalona do idia karaia hegaegae, do idia helaga, tomadiho totona. Edia dabua danu do idia huria. 15 Ma Mose ia hereva henia idia dekenai, ia gwau, “Do umui noho helaga ia lao bona dina ihatoina, bona sihari kara do umui karaia lasi.”

16 Dina ihatoina, daba neganai, guba ia boiboi, bona kevaru ese ororo ia hadiaria. Unai neganai danu ori badana ta ororo dorina dekenai ia diho. Vadaeni kibi ta ena regena bada herea idia kamonai. Kamepa taudia ibounai idia gari dikadika, mai heudeheude danu. 17 Mose ese taunimanima be edia kamepa dekena amo idia ia hakaua murimuri dekenai, Dirava danu do idia hedavari totona. Idia be ororo henuna kahana dekenai idia gini. 18 Unai neganai Sinai Ororo be kwalahu ese ia koua, badina Lohiabada be lahi lalonai ia diho vadaeni ororo ena latanai. Unai dainai unai kwalahu be ia daekau momokani, amu badana ena kwalahu hegeregerena, ororo ena tano ibounai danu ia mareremarere bada. 19 Kibi ena regena ia bada daekau. Vadaeni Mose be ia hereva, bona Dirava ese guba ena boiboi dekena amo ia haere henia. 20 Vadaeni Lohiabada be ia diho, Sinai Ororo ena dorina dekenai. Lohiabada ese Mose dekenai ia boiboi, ororo dorina dekenai do ia daekau mai totona. Vadaeni Mose ia daekau. 21 Lohiabada ese Mose ia hamaoroa, ia gwau, “Oi diho, taunimanima dekenai oi hadibaia, hetoa maka do idia hanaia lasi, lau do idia itaia, vadaeni momo do idia mase garina. 22 Dubu ena hahelagaia taudia danu, lau kahirakahira idia mai noho taudia, be idia sibona do idia hagoevaia, mai helaga danu, do lau aladia mase garina.”

23 Mose ese Lohiabada dekenai ia haere, ia gwau, “Taunimanima ese Sinai Ororo do idia daekau diba lasi, badina be oi ese oda oi henia ai dekenai, oi gwau, ‘Hetoa maka do umui karaia, ia ese ororo do ia hagegea, ororo do ia helaga totona.’ ”

24 Lohiabada ma ia gwau, “Oi diho lao, vadaeni Arona danu do umui daekau mai. To hahelagaia taudia bona taunimanima be hetoa maka do idia hanaia lasi, lau dekenai do idia mai totona, do lau aladia mase garina.” 25 Unai dainai Mose ia diho taunimanima dekenai, unai hereva ia hadibaia idia dekenai.