1 Se ri a ri ka titinge ini Yesus e ta Mesaiya, ri ta fan siksikow e Deo. Ma seri a ri ka bura e Tamow, ri bura ming e siksikow. 2 Kiar u parfat ini kiar bura e fan siksikow e Deo, le kiar ku usi e sinang una bura tikin e Deo ma usi fakausi e fam fafanau kia. 3 Fabur use Deo e ngo aregii, kiar u usi e fam fafanau kia, ma fam fafanau kia e tibi tuntun, 4 anwarow fan siksikow nano e Deo ri fasi una kulfi e nal. Ma lo sinang na titinge lo Deo, kiar sam kulfi e fapaket ma rawas tingga lo nal. 5 Ma se e fasi tikin una kulfi e rawas tingga lo nal? Safle se gii ka titinge ini Yesus e ta Sikow e Deo, i e fasi tikin una kulfi e rawas tingga lo nal.

6 Yesus Kristus e sesuupuek ini tibom ini i e ta se, lo biing ri gu tarawen ini ine dan ma ming lo biing andaku e lingiuf ulo aupaket. I e tibi sesuupuek ini tibom lo safle dan, e tam. I e sesuupuek ini lo dan tiim tura andadak. Ma Tangwa Riis tibom e sesuupuek, ini mok gii e tikin, anwarow antikin e ta ilo Tangwa Riis. 7 Le, e tuul e mok e sesuupuek ini: 8 Tangwa Riis, dan ma andadak, ma ri tuul tiin a-uu lo tikii sangsang. 9 Kiar sagisu a-uu lo fan sinseng ke kaltu, safle fan sinseng ke Deo e kulfi e fan sinseng ke kaltu, anwarow e ta fan sinseng ke Deo, lewa I kabuk sesuupuek ini use Sikow. 10 Le se a ka titinge lo Sikow e Deo, i e sam a-uu lo sinseng gii. Ma kaltu a ka tibi titinge lo sunwar ke Deo, i e sam gow e Deo are kaltu na gurgurum, anwarow i e tibi titinge lo sinseng Deo e sam sesuupuek ini use Sikow. 11 Ma sinseng a, i gii: Deo e sam tow e ninliu bingne tif kiar. Ma anwarow e ninliu gii e ta ilo Sikow. 12 Se a ka tiim tura Sikow e Deo, i e mel e ninliu gii ilo. Ma se a ka tibi tiim tura Sikow e Deo, ninliu gii e tam ini ilo.

13 Ya seti e fan warwar gii tif gam na seri a gam ka titinge lo asow e Sikow e Deo, usi ini gam u parfat ini gam sam kepe e ninliu bingne. 14 Kiar ti rawas ma kiar tibi soke una sa puek fatatu e Deo, anwarow kiar titinge ini i eu ongne sing kiar le kiar ku gatmo use sese ti mok a ka riis ususi e fabur kia. 15 Ma le kiar ku parfat ini Deo e ongongne sing kiar, kiar parfat ini sese mok kiar u gatom usi singi, i eu tow.

16 Le tikas ku pari ini neng e tualik e gow e tubiil a ka tibi fasi una towfu ilo minet, i e samusu nining singe Deo ma Deo ku tow e ninliu tifi. Ya warwar lo re tongge a fan tubiil keri ka tibi fasi una touf ri ilo minet. Safle e mel e neng e tubiil eu touf ri ilo minet ma ya tibi peteng ini i e samusu nining singe Deo use matan tubiil aregii. 17 Fan mara ninis e sak e ta tubiil. Ma e mel e fanenger fan tubiil e tibi fasi una touf re tongge ilo minet.

18 Kerer parfat ini seri a ri ka ta fan siksikow e Deo, ri tibi fasi una ngos lo gorot fan tubiil. Safle Sikow e Deo e efefe kausi lo ri, ma kaltu saksak e tibi fasi una bero iri. 19 Kerer parfat ini kiar ta fan siksikow e Deo ma nal kiruur gii e ta ilo pikliu e rawas ke kaltu saksak. 20 Kerer parfat ming ini Sikow e Deo e sam sala, ma e sam sa pete ten ine sinsinangurer, usi ini kiar u ten use Deo tikin. Ma kiar ta ilo Deo tikin ma ilo Sikow ming Yesus Kristus. I e ta Deo tikin ma ninliu bingne e ta ilo.

21 Konona siksikuang, efe kausi lo gam kosnge fan deo gurgurum.