4
Yuda hameigini maru henerunaga mini uru
1 Yuda aguanene maru henego uru. Perese Heserono Kami Hua Sobala imaru hene. 2 Sobala igini Leaia Leaia igini Yahada Yahada igini kira Ahumai Lahadala hene. Agali uruni ti wali agali Sora tanoha bu henerunaga mamali hene.
3-4 Kalebe one Ebaradahanda ibu igini wahene mini Hua taba henene. Huahanda Bedeleheme tano pigane mo wini. Hua ibu igini tebira henego uru. Edama Penuele Esere imaru hene. Edama igini tebira Yaserili Isima Idibasa imaru hene. Igiri uruni ti mbalini mini Haseleboni berene. Ai Penuele ibugua Gedo tano pigane mo wini. Ani bialu Esere ibugua nde Husa tano pigane mo wini.
5 Agali Asu ibugua Tegoa tano pigane mo wiaga biago ibu one kira Hela Narala berene. 6 Narahanda igiri maria taba henenego uru. Ahusama Hebe Temeni Hahadari layaru hene. 7 Ai Asu one mende Hela ibugua igiri tebira taba henenego Serede Isiha Edenana layaru hene.
8 Koso igini kira Anubu Sobebala hene. Koso ibu Harumu igini Ahahele hameigininaga mamali hene.
9 Agali mini Yabese henego ibugua mana bayaleore biyagome ibu hamenerume bayale biyaru bolangua haihe hene. Anidagua bialu heagola wali agali maru bu hearume ibunaga mini yaraga halu hene. Ibu ai̱yahanda taba hanayangi ai̱ya ibu tandaga timbuniore nalu taba henene lowa ibu mini Yabese wini.* Hiburu bi lalu mini Yabese ogoni galone tandaga lalu laga. 10 Horo mbirungi Yabesehanda Isaraele wali agalinaga Ngode Datagaliwabehondo bi lalu, Ngode Datagaliwabe-o í̠na i̱ biamogo bialu dindi dewaore ngibe. Ani bialu mbirale ko tara tara ngarume i̱ mo tandaga nahelo í̠ni i̱ heba mandagi haabo halu handayaho habelo hameledo, lene. Ani layagola Ngode Datagaliwabehanda Yabese ibunaga bi layago hale halu ibunime bia layago ale biai hene.
Hameigini maru uru hene
11-12 Suha hamene Kalebe ibu igini mbira Mehi hene. Mehi igini Esedono Esedono igini tebira henego mini Bederaba Pasea Tehina layaru hene. Tehina ibugua Nahasa tano pigane mo wini. Agali hameigini uruni ti dindi Lega winigonaga abene mbirahayagi hene.
13 Kenasa ibu igini kira Odoniele Seraiala hene. Odoniele ibu nde igini kira Hadada Meonodaila hene. 14 Meonodai igini Obora hene. Seraia igini Yoaba henego ibu wali agali dindi ulini mbira mini Agali Biabe Biahaga Dindi Ulini laga wiagoha hearunaga mamali hene. Dindi ogoni mini winidago irane agali dindi ogoniha heago tigua mbirale tara tara wabiai haga mini lene gibiore henegonaga mini ogoni wini.
15 Yabune igini Kalebe ibu igini tebira henego mini Iru Ela Nama layaru hene. Ani howa Ela igini Kenasa hene.
16 Agali mini Yahalele ibu igini maria heneru ti mini Sibi Siba Tiria Asarele laga biyaru hene.
17-18 Ai Esera igini maria henego uru. Yade Merede Ebe Yalono imaru hene. Merede ibu Iyibi kini heago wane mini Bidaia bereago dabu bini. Libu wane mini Miriama berene. Libu igini kira Samai Isibala hene. Isibahanda tano mini Esedemoa pigane mo wini. Ani bialu Merede ibu Yuda wali mbira dabu buwa libu igini tebira mini Yarede Hebe Yagudiele imaru hene. Yaredehanda Gedo tano mo wialu Hebehanda Sogo tano mo wialu Yagudielehanda Sanoa tano mo wialu tigua tano uruni pigane mo wigi bini.
19 Hodaiahanda Nahama mbalini dabu bini. Libu aguaneneme Garama hameigini Keila tanoni tagira íbu hene. Mende Magada hameigini Esedemoa tanoni tagira íbu halu bini.
20 Simono ibu igini maria henego mini Amanono Lina Benehanana Tilono imaru hene. Agali mini Isi ibu igini kira Sohede Benesohedela hene.
Sela aguanene henego uru
21-23 Yuda igini heneru mbira mini Sela hene. Sela ibu igini uru hene. Mbira Ere henego ibugua Lega tano pigane mo wialu mende Lada ibugua Maresa tano pigane mo wini. Bedeasabea tanoha hameigini hearu ti labolabo bayaleore wabiaga henego ti Lada aguanene hene. Ani bialu igini tebone mini Yogimi mane Yoasa dauni Saraba layaru hene. Yoasa Sarabala libugua Moaba wali dabu buwa Bedeleheme dindini hene. Ani howa libugua Moaba dindibi Yasubilaheme dindibi handayaho hene. Wali agali Nedaimi tanoha hearubi Gedera tanoha hearubi tigua todobene be dindime wabiaga howa kininaga biabe bialu hene. Bi ogoni agalime bambaore gilibu winiya.
Simeono hameigini henego ogo
24-27 Simeono ibu igini duria henego mini uru. Nemuele Yamini Yaribi Sera Saulubi laga biyaru hene. Saulu igini Salumu Salumu igini Mibisama Mibisama igini Misima Misima igini Hamuele Hamuele igini Sagu Sagu igini Simai Simai ibu igini nguirani mbira (16) halu ibu wane waragaria berene. Anigo ibu hameneru ti waneigini dewa nahonowi hene. Anidagua biyagome Simeono aria Yuda waneigini dewa headagua ndo hene.
28-31 Simeono hameigini ti Beaseba tanohabi Molada tanohabi Hasasuala tanohabi Biliha tanohabi Eseme tanohabi Tolada tanohabi Beduele tanohabi Homa tanohabi Sigilaga tanohabi Bede Magabodo tanohabi Hasasusimi tanohabi Bedebiri tanohabi Saraimi tanohabi ti bibahende uruniha hai hene. Simeono hameigini uruni ti tano uruniha heane dege Debidi ibu kini hene.✡ Yos 19.2-8 32 Ani bialu ti tano duria uruhabi ha dege bini. Edama Aini Limono Togene Asana tano uruniha hene. 33 Ani bialu dindi emene tano uruniha wiapara para biaruhabi hama pialu Balada tano hama tagira pene. Tano uruniha Simeono ibu waneigini aguaneru dege hene. Ani bialu Simeono hameigini ti mamali hama ibinidagua malu gilibu wigi bini.
34-39 Simeono hameiginiru aria agali haguane henerunaga mini uru. Mesobaba Yamalege Amasaia igini Yosa Yoele Yosibia igini Yahu uruni hene. Yosibia ibu Seraia igini halu Seraia ibu Asiele igini hene. Elioenai Yagoba Yasohaia Asaia Adiele Yasimiele Benaia Sibi igini Sisa imaru hene. Sibi ibu Alono igini halu Alono ibu mamali Yadaiabi Simiribi Semaiabi hene. Agali haguane uruni ti ho dame bialu dewaore hayagola ainde tinaga nogo bulumaga sibiru tani nelo bayale agoria kabe hondole taya bialu hene. Ani taya bialu tigua dindi ulini biagonaga abene ni tagira ibiragohayagi dindi mbira mini Gedo wiago kawareha taya bima pene. 40 Ani puwa handalu hearia tani bayale dindi ulini ogoniha andaho hearia hendene. Ani bialu dindi ulini bayale timbuni wuyu peago hendene. Ai ti dindi ogoniha pu heagola ti mo genda holene mbira nawi bayaleore mbira hene. Bamba Hama hameigini dindi ogoniha haga wini.
41 Hesegaia ibu Yuda dindiha kini heangi Simeono hameigini agali haguane uruni tigua dindi bayale tani anda haga biaga wiaria handa walia hene. Ani hondowa tigua Hama hameigini bababi Meuni hameigini hearu bababi wai bule pene. Ani puwa tigua wali agali bo wahai halu tinaga balai anda bu hearu bo gialo wahai halu mbirale mbira yu wanahe Simeono hameigini tigua dindi ogoni karulo hene. 42 Ani anda pu howa Simeono hameigini agali handari duria (500) bibahende Idomo dindini Hari Sia hearuha pene. Agali haguane uruni Isi iginiru tigua haru bamba hene. Isi iginidaru ti mini Peladaia Nearaia Lebaia Usiele imaru hene. 43 Bamba wali agali Amalege hameigini emene maru hangu dindi ogoniha heneyaru ai Isaraele wali agali handalu Idomo dindi Hari Sia hearuha ibida piai hene. Ani pu hearia Isaraele tigua bo wahai halu dindi ti karulo hene.✡ 1 Sml 14.48, 15.18