63
Mbirali ibu Ngode Datagaliwabe heba hole hameore lowa iba gana lenego ogo
Ngode Datagaliwabe-o í̠ i̱naga Ngode Datagaliwabe kegoni. 1 Sml 23.14 Iba 42.2, 84.2, 143.6
I̱na í̠ handa walia hole lowa
miniha hongo howaore hai bialu kogoni.
I̱naga minimebi tinginimebi
í̠ hebaore hole hame timbuniore lo kogoni.
Wali agalime dindi koore yobi iba nabereni howa
iba noa timbuni halu hége lebolaho hagadagua
i̱ni í̠ hebaore hoa howa hame timbuniore lo kogoni.
Í̠ í̠ninaga anda loma biahene kagoha haga kego
í̠ kegoniore i̱ de hondoa ho kogoni.
I̱na í̠naga hongo holene gibiore ngegobi
í̠naga wá holene tara baya agiore loabe tobahe ngegobi
de hondoleore hameledo.
Dindini holiyanaga holene ngirigo yuwa bayale dege turuho kogoyu
ogoni goyane lowa í̠na i̱ gubalini haho wiaabo hariligo baya daligaore ngegoni.
Í̠ ani biaga kegonaga i̱na í̠naga mini mo yaraga holebero.
I̱ dindini emabu kongi í̠hondo ka̱i̱ lalu
í̠naga mini mo yaraga haabo halu kone dege i̱ni homalu waholebero.
I̱naga gi í̠hondo yaraga halu bi lolebero.
Tomo bayaleru karulapeore nowa tombe howa dungu lo holenedagua
i̱naga dininime dinini tomo karulapeore nowa dunguore lowa holebero.
Ani bialu i̱na iba gana baya turubiru turuore howa
í̠naga mini mo yaraga halu lolebero.
 
I̱ mbiraga tamuni paluwa í̠ore mitangi biruli. Iba 42.8, 119.55, 149.5
Mbiraga lu biagoniha i̱naga minime í̠ hangu mitangitangi biruli.
Ani mitangitangi biaabo haruligo irane Iba 61.4
í̠na i̱ biamogo biaaboore hariligonaga
i̱na ani mitangitangi biruli.
Ega angibunime ibu iginiru ibuninaga babaganeme minu tongo biagadagua
í̠naga babagane andane gumba kagoha howa
i̱ turu halu iba gana turubiru laruli.
I̱na í̠ni yu paraguabu ngogola Ais 26.9
í̠naga gime i̱ baya hanguore yaniho haga kegoni.
 
Agali marume i̱ bo waholeore manda bialu karuni
tini homalu humbirini andaga homene dinini pu haga ngagoha pu holebira.
10 Agali odaruni waiangi agali waime homelo bo yongobu wahalu pedaria
biango dudurume ti buduyu pugu pugu bulebira.
11 Ani bulebiragoyu ai i̱ kini kogoni howa wai bigi berongi Man 6.13, Ais 45.23
Ngode Datagaliwabehanda i̱ wayali holiya biamogo biaganegonaga
i̱ turu ho holebero.
Wali agali maru Ngode Datagaliwabenaga mini lalu,
Í̠ore talima ibule, laga karume
turu halu í̠naga mini mo yaraga holebira.
Wali agali ke̱ haga karunaga ne hariga í̠na mo ndibu lolebere.

63:1: 1 Sml 23.14

63:1: Iba 42.2, 84.2, 143.6

63:6: Iba 42.8, 119.55, 149.5

63:7: Iba 61.4

63:8: Ais 26.9

63:11: Man 6.13, Ais 45.23