84
Mbirali ibu Ngode Datagaliwabenaga andani hole hameore lenego ogo
1 Anduane Homogo Hongo Haihe-o i̱na í̠naga andaore gubalini timbuniore ho kogoni.
2 Í̠naga anda ogoniha i̱ ho palu holeneore hame timbuni lo kogoni.✡ Iba 42.2, 63.1
I̱ mbirale marunaga hame nawigo
Anduane Homogo í̠naga andaha holenegoorenaga hame bibahende ogoniha piai helowa kogoni.
I̱naga minimebi tinginimebi bibahendeme i̱na turuore halu
iba gana turubiru bibahendeorenaga holene tene
Ngode Datagaliwabe haluhe kagohondo lo mialu kogoni.
3 Anduane Homogo í̠ Hongo Haihe i̱naga kinibi i̱naga Ngode Datagaliwabebi í̠ hangu kegoni.
Ngode Datagaliwabe í̠naga andaha bo lomabu miaga dabu ngagoria
ega emene yatagoberu anda bia para howa tini palu ngagoni.
Tinaga iginiru ogoniha palelonaga ma palia kagoni.
4 Wali agali í̠naga andaha haga karu ti baya turubiore kagoni.
Tigua turu howa í̠naga mini yaraga halu iba ganaru laabo halu kagoni.
5 Wali agali Hari Saiono kagoria pole turu howa kulo karu✡ Iba 81.1, 86.11, 122.1, Yar 31.6
tinaga hongo holene tene í̠ kegonigo lowa
uruni ti turu haaboho holebira.
6 Ti Hari Saiono pole pialu Baga dindi ulini iba nabere mbira ngagoria tagira poragola
dindi yobi iba nabere wiyagoni ndo iba tagira ibulebira.
Dindi ulini ngarunaga iba birumaga ladaga halu
iba gendo ngarunaga iba dugutagi hagahaga bulebira.
7 Ti iba ani bedaria nama pialu ti hongo ho yalu polebira.✡ Iba 42.2, Ais 40.31, Yo 1.16, 2 Ko 3.18
Ti Hari Saiono anda pialu howa Ngode Datagaliwabe karia hondolebira.
Ngode Datagaliwabe ibu wali agalime bi pupu wule mbirale gime wabini heledaru ale ndo
ibu daligaore gibi henedane ti hondolebira.
8 Anduane Homogo Hongo Haihe Ngode Datagaliwabe-o
i̱na í̠hondo bi larogo hale habe.
Yagabanaga Ngode Datagaliwabe-o
i̱na bi larogo bayuwaore hale habe.
9 Ngode Datagaliwabe-o í̠nime inanaga kini helo dabo helene kagoni
ibugua ina de hondo mamage haga kago
í̠na ibuhondo bayuwa turubini dege bigi bibe.
10 Í̠naga andaha horo mbiru hangu andapu harogome✡ 1 Bit 23.5, Iba 27.4
horo daosini mbira tagira maruha haroruni bolangua hai holebira.
Ai wali agali mini kowi karu baba mandagi ti andagani palu holenego i̱ hame nale kogoni.
I̱naga Ngode Datagaliwabenaga anda panga harabaniore heyu haabo hole hamelo kogoni.
11 Anduane Homogo Ngode Datagaliwabe ibu inanaga mamage haganebi inanaga kini howa wá haganebi kagoni.✡ Iba 34.10, 85.9, Ais 60.19-20, Mal 4.2
Ibugua inahondo bayale turubini dege bigi bialu ina mo yaraga halu kagoni.
Ibunaga deni wali agali mana tigabi hangu bialu haga karuhondo
ibugua mbirale bayale ngaru mbira nangule nalaga kagoni.
12 Anduane Homogo Hongo Haiheore-o wali agali í̠hondo mini mbiraore wuwa
í̠ni hanaho karu ti turuoreho kagoni.