85
Ngode Datagaliwabehanda Isaraeleali haru dai bilonaga bi lenego ogo
1 Anduane Homogo-o í̠ninaga dindi ngago hondowa
dara halu biamogo birigoni.
Isaraele wali agali bayaleore helo
í̠na ti mo bayale hodai bilarigoni.
2 Tiha ko wiaru domo wahalu
tigua mana ko biyarubi domo wahai harigoni.
3 Bamba í̠na tihondo keba timbuni ho harigo wahalu
í̠na tandagaore ala harigobi ai nahe kegoni.
4 Ngode Datagaliwabe-o inanaga Pele Ngiaga í̠ kego
ina haru dai bibe.
Inahondo kebaore holeni nahabe.
5 Inahondo keba ho haabo holeberebe.
Í̠ keba ho kegoni ereba naholebirabe.
6 Ina wali agali kamaru turu holoma̱ya✡Hab 3.2
inanaga holene mo hongo habe.
Í̠na ani beregola iname í̠naga mini yaraga halu holeberema.
7 Anduane Homogo-o í̠nime ina gubalini ho haabo kego
hondoloma̱ya walia habe.
Ina bayale holoma̱yabi í̠na pele ngialu haru dai bibe.
8 Anduane Homogo Ngode Datagaliwabehanda bi larago
i̱na hale ho haga kogoni.
Iname mana ko ala bialu harimadagua lone biadai nabi harimayagua
ibugua ibunaga wali agali ina kamaruhondo mo paliaho holene ngialu
bayale holoma̱ya helolebira.
9 Wali agali ibunaga mini mo dunini ho haga karu
ibugua ti pele mialu haru dai buleore mandabu kagoni ndobe.
Ibugua ina haru dai bialu inanaga dindi ngagoria
ibunaga pele mulene ina heba mandagi wiaabo holebira.
10 Horo ogoningi Anduane Homogonaga gubalini holenebi mini bilinahe holenebi
lola halu hogimbu bialu mbiraore holebira.
Anduane Homogonaga mini tigabi wulenebi mo palia holenebi
biamaga howa tiha wulebira.
11 Wali agali Anduane Homogohondo mini bilina ho haragome
dindini howa hama iraga holebira.
Ngode Datagaliwabenaga mini tigabiwi kagome
dahuliya andaga howa handadali holebira.
12 Anduane Homogohanda ina mo bayale ho helaragola
mbirale iname beremaru bayale hai holebira.
Inanaga dindiha tomoru bayale andaho hai holebira.
13 Wali agali tigua mana tigabi biragome Anduane Homogo ibilonaga
hariga mo manda mandabu wulebira.