34
Anduane Homogo ibu baya gibiore biaga kagonaga ibuhondo ka̱i̱ lenego ogo
1 I̱na Anduane Homogohondo ka̱i̱ore laabo halu holebero.✡ 1 Sml 21.13-15✡ Eb 5.20, 1 Te 5.18, 2 Te 1.3, 2.13
I̱na ibunaga mini yaraga nahe naholebero.
2 Ibugua bigi biyarunaga i̱na ibunaga mini mo yaraga halu holebero.
Wali agali marume hengedope haragola genda ho haga kamiru
tí i̱na bi o larogoni hale howa turu halimulonaga laro.
3 Tíbi i̱bi ina Anduane Homogo ibu daliga gibiore ka lama.✡ Iba 69.30, Lg 1.46
Ibunaga mini ina haru mandagi mo yaraga hama.
4 I̱na Anduane Homogohondo bi larugola✡ Iba 18.6, Md 7.7, Lg 11.9
ibugua hale halu ladai biya.
I̱ gi bulene tara tarame daribaho wiaria
ibugua i̱ golope haya.
5 Marume hengedope haragola miniha gendaho haga karu
ti Anduane Homogo ibugua biamogo birago hondowa turu haga.
Anigo ti miniha genda howa turu nahe mbira naholebiraore.
6 Hongo nahe karume Anduane Homogo olaragola✡ Iba 3.4, 34.17-19
ibugua hale halu biamogo biagaore ka.
Ti genda tara tara yu haga bidaria
ibugua ti pele miaga ka.
7 Wali agali Anduane Homogohanda laradagua hale halu biaga karu✡ 2 Kin 6.17, Dan 6.22, Seg 9.8, Hi 1.14
ibunaga dahuliyalime mamage helaga biaga.
Uruni ti kagoria gendabi hiriribiru íbu wigi bidagoria howa
ti ibunime gi miaga ka.
8 Anduane Homogo baya gibiore ka laramagoni✡ Iba 2.12, 1 Pi 2.3
heneneore leneda lole í̠nime manda bialu handabe.
Ibuha ha doho karu ti bayale holene handa walia howa turuho ka.
9 Anduane Homogonaga wali agali kamiru bibahendeme✡ Iba 31.23
ibunaga andaneha halimu.
Ibugua bia laradagua hale halu biaga karu
ti mbirale mbira buru palia nabi karulapeore holebira.
10 Tomo garibilo habe nahe laiono hongoheru heba mbiru garibilo hagagoyu✡ Yob 4.10-11, Iba 84.11
wali agali Anduane Homogohanda bia laradagua biaga karu
ti mbirale bayale damenego mbira buru palu naholebira.
11 I̱ nenege kamiru-o i̱na bi larogo hale hole ibidaba.
Tí Anduane Homogonaga andaneha halimulonaga bulene
i̱na lawai holiya ibidaba.
12 Tí turu ho holene hamelo kamibe.✡ 1 Pi 3.10-12
Tí luore bayale halu hodagua holene hamelo kamibe.
13 Anidagua holene hamelo kamiyagua✡ 1 Pi 2.22
tínaga ne harigaha howa
bi ko nale tindule ke̱bi naheore halimu.
14 Ko bulene ngaru erembira mialu
mana bayale bialu halimu.✡ Ais 1.16-17, Lm 12.18, Hi 12.14
Tínaga gubalinioreme mbirale mo palia howa bigi bulenego dabalu bialu halimu.
15 Wali agali mini tigabiwi karu✡ Yob 36.7, Iba 34.6, 34.17
Anduane Homogo ibunime de handaya howa mamage haga ka.
Tigua genda yu howa ibu olaga biragola
ibunime hale halu biamogo biaga ka.
16 Mana ko biaga karu hondowa✡ Min 10.7, Yar 44.11, Amo 9.4
Anduane Homogo ibu turu nahaga ka.
Ko biagaru homaragola
wali agalime uruni ti abaleore embedaho waholebira.
17 Mini tigabiwi karume Anduane Homogo olaragola✡ Iba 34.6, 34.15, 34.19, 145.19-20
ibugua hale halu ladai biaga ka.
Ti genda tara tara yu howa ibu olaga biragola
ibugua hale halu biamogo bigi biaga ka.
18 Wali agali mini dege dindi howa turu nahe karu✡ Iba 51.17, Ais 57.15, 66.2
Anduane Homogo ibu ti kagoria kaware ka.
Miniha hanaho holene mbira nawioredagola
agini hanaho hoabe tobaho karu ibugua pele miaga ka.
19 Mbirali mini tigabiwi kago ibu tandaga nolenebi genda yulenebi handalu holebira.
Ibu ani tandaga nalu kariabi genda yu kariabi
Anduane Homogo ibunime ibu pele mulebira.✡ Min 24.16, 2 Ti 3.11-12
20 Anduane Homogo ibunime mbirali mini tigabiwi kago hondo haga ka.✡ Yo 19.36
Ibunaga kuni emeneorebi mbira bu lolani handalu ibunime yaniho holebira.
21 Ko bulene bibahende ngarume
wali agali ko biaga karu bo home lolebira.
Wali agali mini tigabiwi karuhondo handabe manga haga karu
Anduane Homogohanda ti pani mulebira.
22 Anduane Homogohanda ibuninaga wali agali pele mulebira.✡ 2 Sml 4.9, 1 Kin 1.29, Iba 103.4
Ibuha ha do hole ibu karia poraru ti bayale holebira.
✡34:1: Eb 5.20, 1 Te 5.18, 2 Te 1.3, 2.13
✡34:4: Iba 18.6, Md 7.7, Lg 11.9
✡34:7: 2 Kin 6.17, Dan 6.22, Seg 9.8, Hi 1.14
✡34:10: Yob 4.10-11, Iba 84.11
✡34:14: Ais 1.16-17, Lm 12.18, Hi 12.14
✡34:15: Yob 36.7, Iba 34.6, 34.17
✡34:16: Min 10.7, Yar 44.11, Amo 9.4
✡34:17: Iba 34.6, 34.15, 34.19, 145.19-20
✡34:18: Iba 51.17, Ais 57.15, 66.2
✡34:19: Min 24.16, 2 Ti 3.11-12
✡34:22: 2 Sml 4.9, 1 Kin 1.29, Iba 103.4