Hiburu
Hiburuali Keriso hameigini hearuhondo beba ogo gilibu wia hene
Mbuga ogoha gilibu ngarunaga nemandi ogo
Hiburu wali agalihondo beba gili binigo ti heagoria gendabi timbuni tara tara wiyagola ti mini mbiraore wu hayaru wahalu polilono beba ogo gilibu wia hene.
Ngode Datagaliwabehanda wali agalime ibuni ogobi ka manda bilo ibugua Keriso ibilene. Ogoninaga iraneore tebira ngago ogo.
Mbira
Yasu ibu Ngode Datagaliwabe Iginiore haabo henego ka. Ani howa ibu Abanaga bi layadaguaore hale halu inanaga tandaga na halu howa wahalu pu nabi hibu lalu inanaga na hene. Yasu ibu Ngode Datagaliwabe Igini howa Ngode Datagaliwabenaga mana latagi haga bamba henerubi dahuliyali karubi Mosese henegobi uruni ti dindiha lowa Yasu ibu daligaore ka, lalu gili bini.
Mende
Yasu ibu loma binigo mo miaga ha ho wiaabo henego ka. Habo Nalolene Bi Bamba lo winigonaga loma binigo mo miaga heneru ti dindiha lowa Yasu ibu daligaore ka, Ngode Datagaliwabehanda ani lene.
Tebone
Mbirali Yasuhondo mini mbiraorewi kago ibu ko bulenebi gi holenebi homolenebi urunibi bibahende wiagoha howa Yasu ibu loma binigo mo miaga haguane timbuniore howa ibugua o biago pele miaga ka, lalu lo nga.
Be 11 howa Isaraele wali agali marume Ngode Datagaliwabehondo mini mbiraore hongohe wu henegonaga te lo nga. Isaraele wali agali marume mini mbiraore hongohe wu henedagua beba ogo daga lararu tíguabi mini mbiraore wu halimunaga, lo nga.
Be 12 howa tíhondo bi ogobi lalu, Mini mbiraore ngamigoni hongo ho wu haabo halu hamaro bulene harangi wiamaro bule wu halimu. Tínaga de Yasuni handaya ho howa tandaga tara tara narimiyaguabi marume tí mo tandaga hayaguabi donge howa hibu lalu halimu, lo nga. Galone lamaro bu ngago daga lalu tí agua manda bialu, Yasuhondo mini mbiraore ngamigo wahalu pirimiyagua agua bulebirago de hondo holene nga, manda bilimu.
Bu̱lu̱ baga buwa kuni gilibu ngago
1.1-3
Ngode Datagaliwabehanda Kerisoha howa ibuni mo pani haiore ka 1.4–2.18
Dahuliyali karu ti dindiha lowa Keriso ibu daligaore ka 3.1–4.13
Mosesebi Yosuabi henego libu dindiha lowa Yasu ibu daligaore ka 4.14–7.28
Keriso ibu loma binigo mo miaga haguane timbuniore howa ibu daligaore ka 8.1–9.28
Kerisohanda Habo Nalolene Bi Gahenge yu anda íbu ngelenego daligaore nga 10.1-39
Keriso ibuni inanaga homo aribia howa binigonaga duniniore nga 11.1–12.29
Mini mbiraore wulene dunini timbuniore nga 13.1-25
Bilimu, lalu mo hongo henegobi lamaro binigobi nga
1
Ngode Datagaliwabehanda ibu Iginiha howa bi lenego ogo
1 Bambaore Ngode Datagaliwabehanda inanaga mamali heneruhondo bi dewa haluore lamigi bialubi walia dewa tara taraore halubi ibunaga mana latagi haga hearuha howa ani bigi bialu hene. 2 Ani binigo horo áyu kamarunaga Ngode Datagaliwabehanda ibu Iginiha howa ina bibahendehondo bi langialu henego ka. Ngode Datagaliwabehanda ibu Iginiha howa dindi bibahendehabi hari daligahabi bibahendeore wabiai hene. Ani bialu ibugua bibahende wabiniyaruni Igini ogoni ibuninaga hai helo Ngode Datagaliwabe ibunime ibu dabo helene.✡Iba 2.8, Yo 1.3, Eb 1.10 3 Ani bialu Ngode Datagaliwabe ibuni wá baya taraorehe kagobi ibu Iginihabi wá ogoni hatagi halu kagoni. Ngode Datagaliwabe ibuni kagobiore ibu Igini kagoni. Ibugua ibunaga bi gibi hongohe ngagome dindiha ngarubi hari daligaha karubi ina kamarubi bibahendeore ibuni yania hai ho kagoni. Ani bialu ibugua wali agali bibahendenaga ko domo waholenaga ibugua halu mbira hangu homo aribia halu ibu dahuliya andaga Ngode Datagaliwabe hongo gibiorehe kagonaga gi tigahayagi pu berenego beda.✡Ab 2.33-34, 2 Ko 4.4, Kl 1.15-17, 1.20, Hi 8.1, Mo 4.11
Ngode Datagaliwabe Igini ibu daliga timbuniore kago ogo
4 Igini ogoni ibu dahuliyali karubi ndo daliga helonaga helene. Ogonidagua dege Ngode Datagaliwabehanda Igini ogoninaga minibi dahuliyalirunaga mini dindiha lowa ibunaga daligaore wini.✡Eb 1.21, Pb 2.9-10 5 Anigo Ngode Datagaliwabehanda ibunaga dahuliyali karu mbiralihondo lalu,✡2 Sml 7.14, 1 Bit 17.13, Iba 2.7, 89.26-27, Ab 13.33, Hi 5.5
Í̠ i̱ Iginiore kegoni áyu í̠ aba i̱ harogo,
lalu ogonidagua naleore dege ka. Bi mendebi Ngode Datagaliwabehanda dahuliyali karu mbiraligo mitangi bialu lalu,
I̱ Igini ibu helo ibu aba i̱ holebero,
lalubi ogonidagua nalene dege ka. 6 Ani nale howa Ngode Datagaliwabehanda ibu Igini mbiraoreore henego dindini ibilalu howa lalu,✡Lm 8.29, Kl 1.18, 1 Pi 3.22, Mo 1.5, 5.11-14
Ngode Datagaliwabenaga dahuliyali karu bibahendeme ibu mitangi bialu ibunaga mini yaraga halu holene nga,
lene. 7 Ai Ngode Datagaliwabehanda dahuliyali karunaga mitangi bialu ogodagua lalu,✡Iba 104.4
Ngode Datagaliwabehanda ibunaga dahuliyali karuni puyabu pulagane helalu
ibunaga biabe bia haga karu ira hungu biagane helaga,
lene. 8 Ani lenego Ngode Datagaliwabehanda ibu Igininaga mitangi bialu ogodagua lalu,✡Iba 45.6-7
Ngode Datagaliwabe-o í̠na wali agali karu handame howa haru haabobo bu holebere.
Í̠na í̠naga wali agali karu handame howa haru halu tihondo tigatiga hanunigo bialu kegoni.
9 Í̠na mana tigabi hanuniore bulenego gubalini howa mana ko bulenego hame naleore kegoni.✡Ais 61.1, Ab 4.27, 10.38
Irane ogoninaga í̠naga Ngode Datagaliwabe ibugua í̠ dabalu
í̠naga nenege karuhondo turu holene midagobi ndo
í̠naga mini yaraga halu í̠hondoore turu holene daliga ngidagoni,
lene. 10 Ibugua bi mendebi agua lalu,✡Iba 102.25-27
Anduane Homogo-o í̠na piganengi dindi wabialu
í̠ninaga gime hari daligaha karubi wabirigoni.
11 Uruni bibahende ereba hai holebira.✡Ais 34.4, Md 24.35, 2 Pi 3.7, 3.10
Aga bu henego goba halu ereba hagadagua ereba haragola í̠ni ha ho wiaabo holebere.
12 Dindibi hari daligabi bibahende í̠na aga pau lagadagua pau lalu
aga karulenego golalu mendego karula aribia hagadagua aribia holebira.
Anigoyu í̠ni kegobi dege ha ho wiaabo halu í̠naga hamaro bulene nawuleore bira,
lene. 13 Ngode Datagaliwabehanda ibunaga dahuliyali karu mbiraligohondo ogodagua lene nawi,✡Iba 110.1, Md 22.44, Mg 12.36, Lg 20.42
Í̠naga waitigi karu í̠naga geme hengedai habelo i̱na mo heloliya í̠ i̱naga gi tigahayagi ogoria birabe,
lalu ogonidagua nalagaore ka.
14 Aniyagua dahuliyali karuni ti agi aledabe. Ti dinini howa Ngode Datagaliwabenaga biabe biaga mbira wali agalime pele mulene yu helo lowa dahuliyali urunime biamogo bia helo Ngode Datagaliwabehanda dalilenego ka.✡Iba 34.7, 91.11, Md 18.10, Ab 12.7, Lm 8.17, Ya 2.5, 1 Pi 3.7
✡1:2: Iba 2.8, Yo 1.3, Eb 1.10
✡1:3: Ab 2.33-34, 2 Ko 4.4, Kl 1.15-17, 1.20, Hi 8.1, Mo 4.11
✡1:5: 2 Sml 7.14, 1 Bit 17.13, Iba 2.7, 89.26-27, Ab 13.33, Hi 5.5
✡1:6: Lm 8.29, Kl 1.18, 1 Pi 3.22, Mo 1.5, 5.11-14
✡1:9: Ais 61.1, Ab 4.27, 10.38
✡1:11: Ais 34.4, Md 24.35, 2 Pi 3.7, 3.10
✡1:13: Iba 110.1, Md 22.44, Mg 12.36, Lg 20.42
✡1:14: Iba 34.7, 91.11, Md 18.10, Ab 12.7, Lm 8.17, Ya 2.5, 1 Pi 3.7