89
Isaraele wali agali ti dindiha íbu ngangi tigua iba gana laga winigo ogo
i̱na iba ganaru lalu laaboore holebero.
Í̠na mbirale mbira bigi bulebero lalu lowirigo pugua nabi biaiore haga kegonaga lalubi
i̱na latagi halu laaboore holebero.
2 Í̠naga wali agali gubaliniho haga kegoni haho wiaaboore holebira manda bido.
Í̠na bi lo wigi bideruni mbira lo aribia halu mendeale nalagaore
hari ema bibe nahe li de hendedemagobi hongohe wiaabo ho ngagoni.
3 Í̠na lalu, I̱na agali mbira dabenego ogoni ibula habo nalolene bi mbira lowinigo ngo, lariyagoni.
I̱naga biabe biahaga Debidihondo bi lowirigo pugua nabulebiraore lalu lamido, lariyagoni.
4 Isaraele wali agalinaga kini maha hama polebiraru bibahendeore
Debidi í̠ha howa tagira pene hangume haga bulebira.✡2 Sml 7.12-16, 1 Bit 17.11-14, Iba 132.11, Ab 2.30
Hameigini mendeme hapugua nabulebiraore, lamiriyagoni.
5 Ani laga biriyago Anduane Homogo-o dahuliyali dahuliya andagani bu karume
í̠na mbirale baya gibi hangu bigi biriligonaga laga bialu
turu howa iba ganame í̠naga mini mo yaraga halu kagoni.
Anduane Homogo í̠ mini bilinahe howa mbira bulebero lo ngego biagaore kegonaga lalu
iba ganaru tigua laga bialu kagoni.
6 Anduane Homogo-o dahuliya andagani bu karuni í̠ ale mbira nahe.✡Iba 40.5, 86.8, 113.5
Dahuliyali bu karunibi í̠ ale mbira naheore.
7 Dahuliyali haguane tini dege dege ngoaiho biruwabi
tigua Anduane Homogo í̠ hondowa gi timbuniore haga ka.
Dahuliyali Anduane Homogo í̠ ho mabubu haga karu
tibi nde gi timbuni howa pandi hinu haga kagoni.
8 Anduane Homogo Ngode Datagaliwabe Hongo Haiheore-o
hongo gibiorehe í̠ kegobi mbirali naheore.
Anduane Homogo-o í̠na mbirale mbira bule ledego lo beregeda nabi biaore biaga howa í̠ mini bilinahe kegoni.
9 Iba solowara hongohe bedaru í̠na de hondo haga kegoni.
Iba solowara ibu yaribu hongohe bialu bi lalu li̱le̱ laragola
bi nale ema nabi berelo í̠na mo palia haga kegoni.
10 Iyibi wali agalinaga hongo holene tene gibi biago bo podalu
bibahende mo ko haiore harigoni.
Í̠naga hongo holene gibime í̠naga waitigi hearu bibahende bope hai harigoni.
11 Dahuliya andagabi dindi bibahendebi í̠ninaga dege nga.✡1 Bit 29.11, Iba 24.1-2, 50.12
Í̠nime dindi timbuni ogo wabialu mbirale bibahendeore dindini wilo wabu wiriyarunibi
í̠ninaga dege o bu ngaruni.
12 Mbirale uyurayagi ngarubi karubi unurayagi ngarubi karubi bibahendeore í̠nime wabini nga.
Hari Tabo Hari Hemonolame Anduane Homogo í̠hondo turuore gibi halu iba gana lo ngiragoni.
13 Anduane Homogo í̠ hongo gibiorehe kegoni nde aguada.
Í̠naga hongo holenego magi manda bibe nahe hongo gibiorehe kegoni aguadabe.
14 Í̠ kini howa wali agali bibahende haru kegonigo
mana tigabi bulenenibi mana tigatiga dabolenenibi
tiagaho biruwa haru kegoni.
Í̠na mbirale bibahende bigi beregoria
í̠naga gubalini holenebi mini bilinahe howa bulebero laridagua bulenegobi
walia haabo halu haga kegoni.
15 Wali agalime í̠ duniniore kego mitangi bialu í̠hondo iba gana lo ngiaga karu
ti í̠naga dara halu biamogo buleneni ibagabu ka.
Wali agali uruni ti wá holeneha ibagabu haradagua bidago ti turuore au ho haruadabe.
16 Anigo í̠na tihondo baya turubini dege bigi bialu kegonaga
tigua egerebagibi alendobi mbiragabi
bibahendengi í̠naga mini mo yaraga halu haabo kagoni.
17 Inanaga hongo holene tene í̠ kegonaga iname í̠hondo turu timbuniore ho kama.
Inanaga waitigi karu baba wai bialu kamaria
í̠na ina gubalini halu dara howa
wai buluma̱ya mo hongo haregola
inanaga waitigiru bope halu ina wayali haga beremali.
18 Anduane Homogo-o í̠na waitigime bolilono ina mamage holene mbira í̠nime dabo helariya.
Í̠ mana bayale tigabiorego hangu biaga ina Isaraele wali agalinaga Ngode Datagaliwabe baya buruguleore kegoni.
Inanaga kini mbira ina haru helogo í̠nime ngirigoni.
Ngode Datagaliwabehanda Debidihondo buleore lalu bi lowinigo ogo
19 Ala bambaore í̠na í̠naga biabe biahaga mini bilinaheore heago
de gandeba mbira hendelo mialu
de gandeba ogoniha howa í̠na bi ogodagua lariya.
Wai biagane ami agali mini lene mbira i̱na dabaru.
Wali agali bu hearu helowa ibu hangu dabalu
ibunaga haguaneni kininaga manda mo karula haru.
Karula howa haru haga kininaga dagiani berelaru, lariya.
20 I̱naga biabe biahaga Debidi hearia hondowa✡1 Sml 13.14, 16.12, Ab 13.22
i̱na ibu tinaga kini helo dabo helalu
weli loma binime ibu haguaneni odo wiru.
21 I̱na ani buwa i̱naga hongo holene ibu heba haaboore helolebero.
I̱naga gime ibu mo hongo harogola ibu hongoheore haabo holebira.
22 Ani berogola ibunaga waitigirume ibu baba wai bialu
ibu bope halu mo taga habe nahe holebira.
Wali agali mini kowi karumebi ibu minupe habe naheore holebira.
23 I̱na ibunaga waitigi karuni geme hengedo mbaraho wahalu
i̱naga kini ogoni handabe manga haga karuni bibahende homelo bo wahai holebero.
24 I̱na ibu gubalini timbuniore halu ibu heba haho wiaaboore holebero.
Ibugua ibunaga waitigiru baba wai bigi birangi
ibu wayali hangu haabo helolebero.
25 Dindi iba solowara mini Medidereniana bedagoria howa wima pialu
iba timbuni mini Yuberedisi poragoria wiape kagoni
bibahendeore Kini Debidi ibunaga halu ibugua handa gimbu bilo mulebero.
26 I̱na ani berogola ibugua i̱hondo ogodagua lolebira.
I̱naga ababi i̱naga Ngode Datagaliwabebi í̠ kegoni.
I̱ de handayaho howa mamage hagabi
i̱naga pele ngiagabi í̠ hangu kegoni, lolebira.
27 I̱na ibu i̱ igini wahene helolebero.✡Mo 1.5
Kini maru karubi ndo ibu mo duniniore helolebero.
28 I̱naga gubalini haho wiaabo kogome ibu yu wa naholebero.
I̱na ibula habo nalolene bi lo wuleberogo
bi ogoni pugua nabi wiaabobo bu wilonaga lo wulebero.
29 Bibahendengi ibu damene hangume kini haabo holebira.
Isaraelenaga kini hameigini mendeme ha pugua nabi
Debidi ibuniha howa tagira pene hangume ho aribia haga biaabo holebira.
Hari damindini haabo hene li kadagua haaboore hama polebira.
30 Ani ani bulebirago ai mani Debidi ibunaga aguanene hama porarume
i̱na mana lo ngogo hale halu bia nabi mo wahalu
i̱na bilimu lalu bi ledodagua nabiyaguabi
31 i̱na bi laga berogo hale howa mo yo handaga bialu
tigua i̱naga erembira ngialu puguabo hayaguabi
32 nde i̱na tigua ko biraruni ilu wu ha dege buwa pani mulebero.
Tigua mana liahe dewaore biyagonaga tandaga nalu howa manda bilo
i̱na gewa tibume mana lalu bolebero.
33 Ani ba boleberogoyu
i̱na Debidi gubaliniho kogoni nde ogoningibi gubalini haho wiaaboore holebero.
I̱na ibu yu wanahe ibuhondo habo nalolene bi lo wirugobi pugua nabulebero.
34 I̱na ibula habo nalolene bi lo wirugobi napugulebero.✡Dag 23.19, Man 7.9, Yar 33.20-21
Bulebero lalu lo wirugo ariabi mbiraore hangubi habo nalolebero.
35 I̱ Ngode Datagaliwabe mana bayale tigabioreru hangu biaga kogo howa
habo nalolene bi ogoni lo wirugoni.
I̱na bi halu mbira hangu lo ngogoni mani wia ai̱ai̱ bilonaga lo ngeledogoni.
I̱na Debidihondo bi lowirugo ke̱ halu habole naloleberoore.
36 Debidinaga aguanene ti ho tawe hama puaboore holebira.
Kini Debidinaga haru holene ngagoria
ibunaga aguanene maha hararu mbiragome mia aribia haga bima piaho ngane
honani dalu haho ngadagua
tigua wali agali haru haho wiaaboore holebira.
Ti ani haru helonaga i̱na handayaho holebero.
37 Kini Debidi ibu ariame dege wali agali haru haho ngane
ege mbiraga tagira ibuwa dalu wáho kalidagua haru haaboore holebira.
Ege li harini kagonime mbirale bibahende de handai ho howa
wali agali bibahendehondo i̱na bi lo ngoruni
henene hanguore leda lalu lo pana haga ege ibu li harini kagoni.
Kininaga waitigirume ibu bope hayagola dugu binigo ogo
38 Anigo áyu í̠naga kini í̠nime dabo helarigo ibula kebaho kegoni.
Kini ibuni hangu helo wahalu í̠ erembira mialu pedegoni.
39 Í̠naga biabe biahaga biagola habo nalolene bi lo wirigoni í̠nime puguarigoni.
Pugualu kininaga manda golo muwa waruha ba horo helarigome
ai kininaga manda biagoni mebia halu angu to̱lobu wahayagoni.
40 Ibunaga tanonaga ege pabe biaruni gialo payabu waharigome
ai ibunaga anda hongohe bu helearuni bibahende mo ko hai hayada.
41 Ani bidagola ibunaga dabudabu panigi bu payabu ngaria
wali agali hariga puíbu birarume mo page yalu pugu bira.
Wali agali ibula mandagi handa ai̱ na̱i padarume ani birago handaragola
ibuhondo mege bialu oba halu kagoni.
42 Í̠na ibunaga waitigirume kini biagoni balu bope helalu
waitigi biaru ti miniha turu halu mambolo bama pelariyagoni.
43 Kini biagonaga wai biagane ami agali hayarunaga hongobi
tinaga wai biagane ale wiaru bibahendenaga hongobi
pirilipe hai helariya.
Ibu wai bialu hearia bope helalu dari helariyagoni.
44 Ani helalu ibu kini howa wali agali haru haga hayagoni ogoningi hairi helalu
ibuni dindiha minupeho berelariyagoni.
45 Í̠na ibunaga mali gadia dai bialu ibuni abaleore mo agali wahe helarigome
ibu mo taga holene gibioreme dambiho heledegoni.
Ngode Datagaliwabehanda ibu gi milo ibuhondo bi lenego ogo
46 Anduane Homogo-o í̠ ha do ho kegoni nde ani haaboore hole kebe.
Í̠naga keba holene gibi
ira daradagua dalu kagoni dairi agoangi holebirabe.
47 Anduane Homogo-o ina wali agali dindini bu kamaruni
nde lu ndo emene tigimandi hangu halu
homaga kamagonidago manda bibe laro.
Í̠na ina bu kamaruni wabiriyago
áyu nde ina bibahende bu kamaruni mini homa biago kamago
homalu ereba hai hole kamagonidago manda bibe.
48 Mbirali nahome haho wiaaboore holego ai kabe.
Mbogoyi heba uliha yaanda haragola i̱ mangabago
heyalu poro labehe mbirali ai kabe.
49 Anduane Homogo-o ainde agua berebe.
Ai áyu ina gubalini naheore kebe.
Debidihondo habo nalolene bi lo wialu
ogoale bulebero lo wigi biriruni agua buleberebe.
50 Anduane Homogo-o í̠naga biabe biahaga o kogo nde mitangi bibe.
Wali agali í̠ mitangi nabiaga bu karume i̱ mege bialu kagoni.
Tigua i̱hondo bi ko tara tara lalu
tandaga ngiragola i̱ genda yu howa dongeho haruli.
51 Anduane Homogo-o í̠na i̱ kini holiya dabo helarigoni kogola
í̠naga waitigi karume i̱hondo bi ko lalu ka.
I̱ porogoha bayale mbira nawi
i̱ mege bialu mo ko haga karia dege iraga haga bialu kogoni.
52 Iname Anduane Homogonaga mini mo yaraga haaboore halu hami̱ya hameledo.
Ani bilo. Aniore bilo laro.