91
Anduane Homogo ibu inanaga mamage haga kagonigo ogo
1 Mbirali Anduane Homogo Daligaorene Daliga kagoha ha do hole porago✡Iba 31.20, 121.5, Ais 25.4, 32.2
ibu Anduane Homogo Bibahende Hongo Haiheore kagonaga tuha puwa
baya turubini pu holebira.
2 Anduane Homogonaga tuha howa ibugua ibuhondo ogodagua lolebira.✡Iba 14.6, 18.2, 56.4, Yar 16.19
Í̠na i̱ bu dambi halu i̱naga pabe tigila í̠ howa i̱ baya hangu handayaho hariligoni.
I̱naga Ngode Datagaliwabe í̠ kegoni.
I̱na í̠ni hanaho kogoni, lolebira.
3 Heneneore Ngode Datagaliwabe ibugua í̠ baya hangu handayaho halu mamage holebira.✡1 Kin 8.37, Iba 124.7, Min 6.5
Damame agalimeyaguabi gono wia do hene ngaruha í̠ do wia nabulebere.
Warago hiriribi tara tara wali agali bo home laganeale ngarumebi í̠ ela naholebira.
4 Ega angibunime ibunaga babaganeme ibu igini bu dambi hagadagua✡Iba 36.7, 40.11, 63.7, Ais 51.16
Anduane Homogo ibugua í̠ bu dambiho holebira.
Ani biragola í̠ ibunaga tuha howa bayaleore holebere.
Anduane Homogohanda bule ledago biaga mini bilinahe kago
ibugua í̠naga humbi howa ibu erembiraha mo ngelowa hatali wu holebira.
5 Mbirale mbira mbiraga bulubada lowa í̠ miniha gigi howa palulene nawi.✡Yob 5.19-23, Iba 23.4, 27.1, 64.4
Horombe howabi í̠ nahende keria abale ibuwa í̠ balu polobada lowa
í̠ gigi howabi holene nawi.
6 Dama ko tara tara bu karume mbiraga horombebi wali agali bo wahama ibaga bialu kago✡2 Kin 19.35, Yob 5.22
í̠na dama uruni hondowabi gi holene nawi.
7 Áyu dege í̠ deni wali agali daosini mbira (1,000) bibahende homa hilayaguabi✡Yos 14.10
daosini pira (10,000) í̠ kegohayagi homai hayaguabi
í̠ ela naholebirago giho holene nawi.
8 Anduane Homogohanda wali agali ko biaga karume mana ko biyagonaga pani mirago✡Iba 37.34, 58.10
í̠ni deme handalu hondolebere.
9 Í̠na Anduane Homogo í̠naga mamage haga helalu
í̠naga Ngode Datagaliwabe Daligaorene Daliga kago hatali wiagane humbi helarigoni.
10 Ani helo waharigome mo ko holene tara tara ngarume í̠ kegoria anda naibulebira.
Warago ko tara tara gendabi ngarubi í̠ andagani anda naibulebira.
11 Ngode Datagaliwabe ibugua ibunaga dahuliyaliru lamialu✡Iba 34.7, Md 4.6, Lg 4.10
í̠ ibagabu kegoha, Tí mamage hama ibagabu hole pudaba, lalu lamulebira.
12 Ege to̱le̱ ngagome í̠naga ge nabehedagola
dahuliyali uruni tinaga gime í̠ taba yaraga holebira.✡Md 4.6, Lg 4.11
13 Í̠naga geme laionobi nogombibi✡Hgn 14.6, Dan 6.22, Lg 10.19
laiono hungubaluabi puya tomia palebi
bibahende hengeda hai holebere.
14 Ngode Datagaliwabehanda ogodagua larago,✡Iba 9.10, 59.1, 145.20
Wali agali i̱ gubalini heneneore ho karu
i̱nime ti haru dai bialu pele mulebero.
I̱ tinaga Anduane Homogo ka lowa henene yu tigabu karu
tinaga hatali wiaga humbi i̱nime holebero.
15 Tigua i̱ olaragola i̱na tinaga bi larago hale halu ladai bulebero.✡1 Sml 2.30, Yob 12.4, Yo 12.26
Ti kagoria gendabi íbu ngangi i̱ni ti heba haabo holebero.
Ina ti gi mialu haru dai bialu ti mo yaragaho helolebero.
16 Tinaga holene lu hama pelo tinaga mali mo tago holebero.
Tigua bima ibiyagonaga yolo uruni mulebero.
Ina ti pele mialu i̱ni ti heba haabo holebero, lene.
✡91:1: Iba 31.20, 121.5, Ais 25.4, 32.2
✡91:2: Iba 14.6, 18.2, 56.4, Yar 16.19
✡91:3: 1 Kin 8.37, Iba 124.7, Min 6.5
✡91:4: Iba 36.7, 40.11, 63.7, Ais 51.16
✡91:5: Yob 5.19-23, Iba 23.4, 27.1, 64.4
✡91:11: Iba 34.7, Md 4.6, Lg 4.10
✡91:13: Hgn 14.6, Dan 6.22, Lg 10.19
✡91:14: Iba 9.10, 59.1, 145.20
✡91:15: 1 Sml 2.30, Yob 12.4, Yo 12.26