37
Mini kowi bayalewibi kirabalinaga hamaro bulenego ogo
1 Mini kowi karume birago hondowa tí mini dege dindi nahalimu.✡Iba 73.3, Min 23.17, 24.1, 24.19
Tigua bira larago hale howabi ti biradagua bua nahalimu.
2 Irane ti tani gau laralidagua emene howa gau lolebira.✡Iba 90.5-6
Uruni ti gaeangi tomo gau laralidaguaore gau lalu ereba holebira.
3 Anduane Homogoni hanaho howa mana bayale bialu halimu.
Ani birimiyagua tínaga pabe tigila Anduane Homogo ibuni kagola
tí ibuha bayale holeberemi.
4 Turu holene Anduane Homogohayagi hai bialu halimu.✡Ais 58.14
Ani birimiyagua ibugua tínaga gubalinime hameledami aleru ngulebira.
5 Í̠ni Anduane Homogoha hanaho habe.✡Min 16.3, Md 6.25, Lg 12.22, 1 Pi 5.7
Ani kegola ibugua í̠ biamogo bulebira.
6 Í̠na mini tigabiwi howa mana bayale bigi bereruni✡Yob 11.17, Mai 7.9
wali agalime de handai helo
horombe hanuni ni dedagola
wá haame haralidagua helo wále
ibugua ani mo helolebira.
7 Anduane Homogo ibugua bule ngago bilo✡Iba 62.1, Ais 30.15, Yar 12.1
í̠ ema nabi hondo habe.
Maru ti ho timbu halu ho yanga laragola
í̠ mini dege dindi nahabe.
Mini kowi karume ko bule lo manda bu heneru bigi birago hondowa
í̠ mini dege dindi nahabe.
8 Mini dege dindi holene ngagolabi keba holene ngagolabi mogo nalabe.✡Iba 73.3, Eb 4.26
Urunime genda dege yu anda ibaga.
9 Mini kowi karu ti bo batagi halu✡Yob 27.13-14, Ais 57.13
Anduane Homogoni hanaho karume dindi karulolebira.
10 Emene howa mini kowi karu ereba haiore holebira.✡Yob 20.9, Hi 10.36-37
Ti kabe hondole hagadagoria hai birimiyaguabi
handa walia nahe ereba ho waore holebira.
11 Tini mo dindiha howa deme handagabu karume dindi ogoni karulolebira.✡Md 5.5
Mo palia holene ti karula howa
mbirale dewa turuho wu holebira.
12 Mini kowi karume mini tigabiwi karu mo ko holenaga ndi nde lalu
handabe manga howa ne gengero lalu ka.
13 Ani bialu helowa
Anduane Homogohanda mini kowi uruni handaya howa
oba halu ka.
Tinaga homo ereba holene horo hapara harago hondowa
ibu oba halu ka.
14 Mini kowi karume yagibanorubi buru pale darabi karubi dibule
ayu tibu gililomi bogole danda edaha bira.
Mana tigabi biaga karu bo wahole ani bialu ka.
15 Tigua ani bialu karia tininaga ayu tibu yidago yamuwa
tini bo wahalu danda edaho ngaru minu podo waholebira.
16 Mini kowi karume dabudabu dewa bu hombedo wu karuni galone nabulene lowa✡Min 15.16, 16.8, 1 Ti 6.6
mini tigabiwi karume mbirale emene wu kago baya galoneore wu ka.
17 Ogoni irane Anduane Homogo ibugua mini kowi karunaga hongo mo ereba hai halu
mini tigabiwi karu ibunime handaya ho holebira.
18 Anduane Homogo ibugua ibunaga bi larago hale halu biaga karu
ibunime handaya ho haabo halu
dindi ogoni tinagaore wiaabo helolebira.
19 Mo ko holene wigi bidangi ti tandaga nanolebira.
Hina gari birangibi ti nolene karulape wulebira.
20 Ani wulebiragoyu mini kowi karu ti homolebira.
Anduane Homogonaga waitigi karu
balawaya minana anda hene mbira dedaligobi dowa
gilope halu ereba haralidagua ti ereba holebira.
Ira hagua pu ereba haralidagua ereba holebira.
21 Mini kowi kagome mbirale dano howa
yadai nabi nalu puabo haga.
Bayale biaga kagome ibunaga mbirale ngaru
habua nabi mo guaila howa tale biaga.
22 Anduane Homogohanda mo turu hene karume
dindi karulolebira.
Ibugua ha hene karu ti bo batagi holebira.
23 Anduane Homogohanda wali agali hangu hanguhondo✡1 Sml 2.9, Min 16.9
hariga ogodagua pobe lalu walia haga.
Ibu turu helo hangu biaga kagonaga pabe tigila
Anduane Homogo ibuni holebira.
24 Uruni ti pilope hayaguabi
pilo ibiraho wiaabo naholebira.
Anduane Homogo ibunime ti gini mialu
lone mo heya ho helolebira.
25 I̱ igirini howa hama ibalu✡Iba 37.28, 59.15, 109.10
ai áyu agali waheore kogoni.
Henego manda berogola
áyu agima ndogo luore haruda manda bido.
O hama ibiwadagoriani howa handalu hewaria
wali agali mini tigabiwi hearu mbira
Anduane Homogohanda yu wanahayane handaru.
Tinaga waneiginibi ti hina noa howa
mendeali hina nayago tagamini handadeho heariabi heba nahende dege haru.
26 Tigua tinaga mbirale karulape wuwa
maru buru pale haga bidaru turu halu talebu migi biaga.
Ti waneigini baya bu karu hondowabi
ibuni turu ho haga biaga.
27 Ko bulene erembira mialu mana bayale bilimu.
Ani birimiyagua tínaga aguanenerume dindini luore haabo holebira.
28 Anduane Homogo ibu mana bayale bulene gubalini haga kagome✡Iba 11.7, Min 2.22, Ais 14.20
wali agali ibuhondo mini bilinahe karu yu wanahaga ka.
Tinaga pabe tigila ibuni haabo holebira.
Mini kowi karu tinaga aguaneneru bo batagi holebira.
29 Mini tigabiwi karume dindi karulalu
ogoriani haho wiaabo holebira.
30 Mbirali mini tigabiwi kagonaga ne harigaha howa
bi latagi hararu mini gigabiwi howa bi laga.
Ibunaga hégeme mana tigabi bulene dege bi latagi haga.
31 Ngode Datagaliwabenaga mana lowinigo✡Man 6.6, Iba 40.8, 119.98, Ais 51.7
ibunaga bu miniha mo hengedagome
ibu ge gundu lalu pi nalaga.
32 Mini kowi kagome mini tigabiwi kago ma yu howa
bo wahole manda biaga.
33 Ani biagagoyu bo wahelo
Anduane Homogohanda yupe naholebira.
Godi lalu kariabi
ibugua ko bini mbira ngaria handa walia naholebira.
34 Anduane Homogoha mini dunu bia ho howa
ibugua bibe ledadagua bialu habe.
Ani biriyagua ibugua í̠ mo yaraga halu
dindi í̠ karulabelo ngulebira.
Ani biragola mini kowi karu pani narago
í̠ deme handa a̱i̱ ho holebere.
35 Bamba mbiru agali mini kowiore ibuni hangu hongohe karulape ko mitangi howa✡Yob 5.3
wali agali mo gi halu
ge pera bai haga mbira heane hendewane.
Lebanono dindini ira tamia mbira luni panigi pudagaho hagadagua
agali ogonime maru hearu hengedope howa
ibuore pudagaho heane hendewane.
36 Mani halu mbiru dindi odagoriani lone bolangua halu pialu hewaria
agali odagoni naheya.
Kabe hondole i̱na hai bialu hewariabi
ibu nahe erebaore hayiya.
37 Wali agali mana bayale biaga karu handalimu.✡Ais 32.17, 57.2
Mini tigabiwi karume mana bayale bigi birago handawa bilimu.
Mo palia haga karu
ti aguanene dewa ho dame bulebira.
38 Ko biaga karu aria bibahende homai halu
tinaga aguanene bibahendeore homa mundulanda holebira.
39 Wali agali mini tigabiwi karu
Anduane Homogohanda ti pele mulebira.
Gendabi timbuni ngangi ti ibida pialu
ha do hagane Anduane Homogo ibuni holebira.
40 Anduane Homogohanda ti biamogo bialu gi miaga.✡1 Bit 5.20, Ais 31.5, Dan 3.17, 3.28, 6.23
Mini kowi karume ti mo ko hole ibirangi
ti ibu karia ibida poragola ibugua ti mo wiaga.
✡37:1: Iba 73.3, Min 23.17, 24.1, 24.19
✡37:5: Min 16.3, Md 6.25, Lg 12.22, 1 Pi 5.7
✡37:7: Iba 62.1, Ais 30.15, Yar 12.1
✡37:9: Yob 27.13-14, Ais 57.13
✡37:16: Min 15.16, 16.8, 1 Ti 6.6
✡37:25: Iba 37.28, 59.15, 109.10
✡37:28: Iba 11.7, Min 2.22, Ais 14.20
✡37:31: Man 6.6, Iba 40.8, 119.98, Ais 51.7
✡37:40: 1 Bit 5.20, Ais 31.5, Dan 3.17, 3.28, 6.23