73
Ko biaga karu mini wilo Ngode Datagaliwabenaga mana laga kago ogo
1 Ngode Datagaliwabehanda Isaraele wali agalihondo bayaore gibi turubini hangu biaga kagoni.
Ibugua wali agali tinaga bu habaneha mana ko mbira nawi tigabiore karuhondo
baya turubiniore bigi biaga kagoni.
2 Ibugua ani biaga kagoyu ai i̱ore mana ko bialu pilalu penego habo laru.
I̱ ge gundu lalu pilope halu mini mbiraore wu harugoni
hadogoea lowa yu wahalu tagira pobehe haru.
3 Ani harudagoni irane i̱na handalu hewaria
wali agali mini kowi hearu tigua mbirale bigi biyaru bayale haga bialu✡ Iba 37.1, Yar 12.1
ti homogo hama piyago hondowa ani haru.
Tigua biyago handarugola tinaga wiago degeni i̱naga miniha i̱ nayido agini henge lolenego hongohe tagira ibiya.
Ani biyagome i̱ mini mbiraore wu harugoni yu wahalu tagira pobehe haru.
4 Ani handalu hewariabi wali agali ko biaga uruni ti warago bolenebi tandaga nolenebi mbira nahende
tinaga tinginibi bayaore hongohe hearia handaru.
5 Wali agali maru karume tandaga nalu kadagua
wali agali ko biaga uruni ti kagoria tandaga nane kane handaga biruli.
Wali agali maru kagoria genda bulene tara tara íbu wigi biagadagua
wali agali ko biaga uruni ti kagoria naíbu wiraya.
6 Ti genda mbira nahende howa mine timbuni halu tinaga tingini ganini wialu balagala hama ibaga biaga ka.
Ani bialu tigua wali agali maru karu bame irane nawinini motudu wini balu mo ko haga ka.
7 Tinaga bu miniha mana ko ngubi tara tara buleneru hangu wai hanalu
tinaga bu habaneha ko buleneme to̱lotagihe ka.
8 Tigua wali agali maru karu mege bialu hondo oba halu
bi ko tara tara biaga ka.
Tigua mine gibiore halu wali agali maru karu hengedope halu
mo tandaga holenego agua habehedabe hondole hariga hai bialu haga ka.
9 Ani bialu tigua Ngode Datagaliwabe dahuliya andaga kago lalubi lo guralu haga ka.
Tininaga mini mo yaraga halu
tigua hame ledadagua hangu wali agali marume bilo
bidaba lalu hongo howa lamiaga ka.
10 Anidagua lamiragola nde Ngode Datagaliwabenaga wali agali karumebi heba mini kowi urunime bi larago hale halu
turu howa yu tiga biaga ka.
11 Agali ko urunime bi urudagua laga ka.
Iname mbirale bigi beremaruni Ngode Datagaliwabe ibu manda nabulebira.
Ngode Datagaliwabe Daligaorene Daliga kago ibugua iname beremarubi laramarubi goarialu
handa walia holenego hariga nawiore laga ka.
12 Wali agali mini kowi karu tigua mana urunibi bigi biaga ka.
Tinaga mbirale dewa bu payabu wia ngagoyu
uruni ngelowa dege maru lone mo te dege bule hai bialu kagoni.
13 Ko biaga uruni ti ani bialu kagodago ai i̱ mana ko mbira nabiore
i̱nime i̱ni mini haru halu ko nabi tigabi harugoni o kogoni.
Ai ti ko biyadagua i̱ nde bua nale hogoralebu harudagoni nde irane nawini aginaga haruyabe.
14 Ngode Datagaliwabe-o í̠na mbiraga horombebi i̱ tandaga dege ngiaho wialu
egerebagi bibahendengi í̠na i̱ minu baho ngegoni irane aginagabe.
15 Wali agali mini kowi biaru tigua layadagua i̱na mbira lenedale
i̱na í̠naga wali agalime lolenedagua ndo ledole.
16 Ko biaga uruni tigua mbirale bigi biragonaga teneorego agidabe hondole lowa
handalu hewaria i̱na handa walia habe nahe erekuibioreyane handaru.
17 Mitangi bialu tenego minime daba dege bialu howa handa walia nahe henego✡ Iba 27.4, 37.38, 77.13
maniore Ngode Datagaliwabe í̠naga andaha anda pirugola tenego handa walia haru.
Í̠naga andaha anda pirugola i̱naga mini biagoni wá layagola mbirale bayuwa manda bibehe haru.
Wali agali ko biaga uruni tibi nde mani ogobini tagira polobada lalubi
mitangi tagira íbu dege biya.
18 Ngode Datagaliwabe í̠na wali agali mini kowi uruni ti hariga gindigunduleore ngarunaga pelo pelolebere.
Hariga gindigundule uruninaga pialu karia ge kundu lowa
mo paraho pilope halu homo tongolo milolebere.
19 Ti abaleore homo tongolo mu daga holebira.
Agali homaradagua ndo mo koore howa homolebira.
20 Anduane Homogo-o ko biaga uruni ti bame mbiraga emaga andaha mbaria dange harigi yu haganedagua yu kago
egerebagi gao laragola ereba haganedagua yu karu ereba hai holebira.
21 I̱naga miniha tandaga bialu
tinibi toga layagola
22 i̱ bu habaneha keba dege dindi halu nogo gabua mini nawi hagadagua howa
í̠ mitangi bulene ereba halu
i̱na mana biruru í̠ deni ogonibi bialu harugoni.
23 Ani bialu howa dege i̱na Ngode Datagaliwabe í̠ yu wanahe
í̠ hegoha kaware haparaho harugola
í̠na nde i̱naga gini yaniho hariligoni.
24 Í̠na i̱ aguaore habe lalu í̠naga bi mana bayaoreru langialu mo tiga bialu kegoni.✡ Iba 48.14, 49.15, 58.11
Ani mo tiga bialu howa i̱ hamaro berongi nde í̠na i̱hondo turu halu habiya íbu lole kegoni.
25 I̱ de handayaho haga dahuliya andagani mende ai kabe.✡ Iba 16.2
Mendeali nahe Ngode Datagaliwabe í̠ hangu kegoni.
Í̠ hangu kego manda buwa i̱na í̠ gubalini timbuniore ho kogoni.
Mbirale dindini bu payabu ngaru gubalini holene agi ngabe.
I̱na í̠ore gubaliniho kogoni.
26 I̱naga minibi tinginibi hongo nahe gedaore hayaguabi✡ Iba 16.5, 40.12, 84.2
Ngode Datagaliwabe í̠ i̱naga hongo holene tene kegome
i̱ karulapeore haabo holebero.
27 Ngode Datagaliwabe í̠ yu wahalu piaga karu ti pu erebaho wahalu homolebira.
Wali agali ala í̠hondo mini mbiraore wuwa í̠ talima ibaga howa
áyu í̠ erembira ngialu tagira pu karu heneneore pani mialu ereba hai helolebere.
28 Uruni ani buleberegoyu i̱ dege Ngode Datagaliwabe í̠ kegoha hapara ho kogome✡ Iba 14.6, 40.5, Hi 10.22, Ya 4.8
bayaore turubi i̱ hoale ngagoria kogoni.
Anduane Homogo Bibahende Haru Haame Ho Haga-o
i̱naga pabe tigila í̠ni kegome kogoni howa
mbirale í̠na bigi biriru agua biri lalu latagi hai holebero.