16
Mbirali ibu Ngode Datagaliwabehondo mini mbiraore wuwa miniha dungulo howa ibuhondo bi lenego ogo
1 Ngode Datagaliwabe-o i̱ í̠ha ha doho howa bayale holebero manda buwa✡Iba 7.1, 17.8
í̠ kegoria eberogo í̠na i̱ de hondo habe.
2 I̱na Anduane Homogohondo au laro.
Í̠ i̱naga Anduane kegoni.
Mbirale bayale bayale o bu ngoruni
í̠naga gini howa ibini hangu o bu ngoruni laro.
3 Anduane Homogonaga wali agali mini bilinahe karu✡Iba 101.6, 119.63
ti wali agali bayaore bu kagoni.
I̱ ti heba mandagi howa turu timbuniore ho haga biruli.
4 Wali agali maru mbirale gime wabiniru tinaga bi pupu wiagane ogoni lowa✡Yos 23.7, Iba 32.10, 106.37-38
uruni hendehende gerai piaga karu
tigua genda yulene dewaore bu wulebira.
I̱na ti heba mandagi howa
bi pupu wiagane urunihondo mbirale bo lomabu miradagua namulebero.
Mbirale gime wabini uruni tinaga bi pupu wiagane ogoni lowa
uruninaga mini mo yaraga haradaguabi i̱ naholebero.
5 I̱ mbirale galone yu haradagua bu kogo✡Iba 23.5, 119.57, 125.3, Dug 3.24
Anduane Homogo í̠bi í̠naga bi manabi ogoni dege galone yido lowa yu kogoni.
I̱ mbirale buru pado alego í̠na ngiaiore hariligoni.
I̱ mani hama polobodagoni í̠na haru holebere lowa
í̠ha hanaho kogoni.
6 Í̠na i̱hondo mbirale bayale bayaleru turu halu ngigi birigoni.✡Yar 3.19
Í̠na o ngigi biriyaruni nde baya taraore ngigi biriyago hondowa i̱ turuore ho kogoni.
7 Anduane Homogo ibugua i̱ mo tiga bialu haru haganegonaga✡Iba 73.24, 77.6
i̱na ibunaga mini mo yaraga haro.
I̱ mbiraga padoria i̱naga bu miniha howa bi langiaga.
8 Anduane Homogo ibuni kawareore i̱ heba o kagonida lo manda buore haabo haruli.✡Iba 27.8, 73.23✡Ab 2.25-28
Ibuni kaware i̱ heba howa i̱ mo hongo haga kago manda buwa
i̱ gi halu mogo nale holebero.
9 Anigo i̱ turu howa i̱naga bu miniha dunguore lowa✡Iba 13.5, 30.12, 108.1
mbirale mbira hondowa gi naholeore kogoni.
10 I̱ homolene winigoria howa✡Iba 49.15, 86.13, Ab 13.35
homanaga hongome yani nahelonaga í̠na i̱ gi miriligoni.
I̱na í̠naga biabe bialu mini bilina ho harugonaga
í̠na i̱ humbirini andaga homa dinini bu karu baba holiya wahalu
yupe naholebere lo manda bido.
11 Í̠nime i̱hondo haabo holene hariga ogodagua lalu✡Iba 36.7-8, 43.4
walia holebere lo manda bido.
Í̠ni i̱ heba kegome i̱ miniha turu bialu dunguore laragola
turuho haabo haruli.