27
Anduane Homogonaga mini yaraga halu bi lolene ogo
1 I̱naga wá holenebi i̱ pele ngulenebi Anduane Homogo ibuni hangu kagoni.
Ani kagola i̱ mbirali hondowa gi naholebero.✡ Iba 118.14, Ais 33.2, 60.20, Mai 7.8
Anduane Homogo ibugua mbirali gibi ale bu ngarunaga howa
i̱ mo wiaga kagola i̱na mbiralihondo gi naholebero.
2 Agali ko i̱naga waitigi karume✡ Iba 9.3, 14.4
i̱ de handaya halu bo wahole manda biyagua
tiniha dai bulebira.
3 Agali wai tidiyu henego bibahendeoreme i̱ore bole lowa
ho mabubupe ho kayaguabi i̱ gi naholebero.
I̱naga waitigi karume i̱ baba wai kama layaguabi ti ani lo helo
i̱ Anduane Homogohondo mini mbiraore wiaabo howa
miniha dungulo holebero.✡ Yob 4.6, Iba 3.6
4 I̱ Anduane Homogohondo bi lalu mbirale mbira hangu bulene hamelo ko lalu lamiru.✡ Iba 18.6, 23.6, 90.17
Ogonigo i̱ dére emabu kongi
Anduane Homogo ibu andagani haabo holene hame ledo lalu lamiru.
Ani lowa Anduane Homogonaga biamogo bulenebi
baya turubini bulenebi
mana bayale uruni alego bayuwaore handa tiga bialu
i̱ hama polenego ogodagua hama pobe lalu bi langigi bilo hame laru.
5 Gendabi mini burugule wigi bidangi ibugua i̱ bira do helolebira.
Ibugua ibuninaga andaha i̱ bayale holiya mo do holebira.
Ani bialu ibugua i̱ taba muwa
ege to̱le̱ hari wedagoria neneoreni bo iraga holene tobaheni minu berelolebira.✡ Iba 17.8, 31.20, 40.2, 50.15
6 Anidagua bigi biragola i̱na i̱naga waitigiru bope halu✡ Iba 3.3, 107.22
i̱ wayali holebero.
I̱na turu howa ali iwaru lalu
Anduane Homogonaga andaha ibunaga lomaru bo delolebero.
I̱na Anduane Homogonaga mini yaraga halu iba gana lolebero.
7 Anduane Homogo-o i̱na í̠ olarogola hale halu ladai bibe.✡ Iba 4.3, 13.3, 61.1
Í̠na i̱ dara nahabehe kogoni harugo
i̱ dara halu bi larogo hale halu ladai bibe.
8 Í̠na i̱hondo lalu,✡ Iba 34.4, 105.4, Amo 5.6
I̱ mitangi bialu lotu lole i̱ kogoria ibabe, larigola
i̱na, E̱ Anduane Homogo-o ibulebero, lalu ladai birugoni.
9 Anduane Homogo í̠na i̱hondo manga halu erembira nguleni.✡ Iba 6.1, 40.17, 69.17, 94.14
Anduane Homogo-o i̱ í̠naga biabe biahaga harugonigo
í̠na i̱hondo keba halu erembira ngialu poleni.
I̱naga Ngode Datagaliwabe i̱naga Pele Ngiaga-o
i̱ biamogo biaga í̠ harigonigo
i̱ helalu erembira ngialu poleni laro.
10 I̱ aba ai̱yalame i̱ handabe manga halu bo batagi hayaguabi✡ Ais 40.11, 49.15, Yo 16.32, 2 Ti 4.16-18
Anduane Homogo ibugua i̱ ibunaga adogeha yamuwa de hondo holebira.
11 Anduane Homogo-o i̱naore bialu holiya✡ Iba 5.8, 25.4, 86.11
í̠na manda bu ngedagua i̱hondo walia habe.
I̱naga waitigi dewa bu karume i̱ boligo
i̱ hariga gibi hiriribini haru nape hariga tigabini haru pobe.
12 I̱naga waitigi i̱ bolene kagoria i̱ hangu helo wahalu poleni.✡ Man 19.18, Md 26.60, Ab 9.1
Tigua tindule i̱ nabinigobi bame dibade halu
i̱ mo gi̱la halu bi lai damene haragola ti bime i̱ bo ngoai haga kago
Anduane Homogo í̠na i̱ yu wahalu poleni laro.
13 Anduane Homogo ibunaga mana baya gibiore
áyu ina kamangi bigi birago i̱ hondole holebero manda bido.✡ Iba 31.19, Yar 11.19
14 Anduane Homogohanda biamogo bulebira manda bialu✡ Iba 62.5, Min 20.22, Ais 25.9
ibuhondo mini mbiraore wu halimu.
Bu miniha genda nahe hongo ho halimu.
Anduane Homogohanda biamogo bulebira manda bialu
ibuhondo mini mbiraore wu halimu.