9
Anduane Homogo ibuni tigabi biaga kagonaga ka̱i̱ lenego ogo
Anduane Homogo-o i̱naga bu miniha
i̱na í̠hondo ka̱i̱ timbuniore lo kogoni.
Í̠na baya taraore bialu harigonaga
i̱na wali agali bu karu lamigi bulebero.
I̱na í̠ mitangi bialu turu ho holebero. Iba 5.11, 83.18
Anduane Homogo Daligaorene Daliga kego
i̱na í̠ mini yaraga halu iba gana lolebero.
 
Agali i̱ baba waitigi hayaru í̠ de handalu ti ibida piai haya.
Ti pilalu homai haya.
Í̠na dabagane dagiani biruwa mana mo tale biagadagua
tigatiga hangu mo tale biaga kegoni.
I̱na bialu hewaru hondowa í̠na mo tale bialu heria
i̱ tigabi bolanguahe hewaria handari.
 
Wali agali í̠ mitangi nahaga hearu í̠na ti mo dabaki harigoni. Man 9.14, Min 10.7
Wali agali ko biaga
o biaru ti abogo ogoria hene lalu mani te mbira nalelo
í̠na bo wahai harigoni.
Ngode Datagaliwabe í̠na inanaga waitigi uruni bo wahai halu
tinaga tano wiaru bibahende bo gialo wahai harigoni.
Uruni bibahende mo ko hene wiaabobo bu ngago
manibi mitangi bulene mbira naholebiraore.
 
Anduane Homogo ibu kiniore haluhe haabo ka. Iba 102.12, 102.26, Hi 1.11
Ibugua godi hale hole dagiani birule manda manda bu ka.
Ibugua mana tigabiore biaga halu Iba 96.13, 98.9
wali agali bibahende handayaho howa haru hai ka.
Ibugua mana tigabiore ngagoria howa
hameigini tara tara karume bialu hayaru bibahende
mo talebuki bulebira.
 
Anduane Homogo ibuniore anda hongohe kaligobi kagoni. Iba 37.39, 46.1, 91.2
Mbirali ibunaga waitigime bole taliragola
ibu kagoha pu holebira.
Genda tagira ibirangi ibu kagoha pialu ha do holebira.
10 Anduane Homogo-o wali agali í̠ni keria ibiraru Man 31.6-8, Iba 37.25, 70.4, 91.14
erembira mialu napiaga kegoni.
Í̠ ogonibi kegonigo wali agali í̠ mini manda bu karume í̠hondo mini mbiraore wu holebira.
 
11 Anduane Homogo ibu Saiono tanoni kini kago Iba 107.22 ibunaga mini yaraga halu
ibuhondo iba gana lolene nga.
Ibugua biabe hongohe tara biyarunaga
wali agali hameigini tara tara karume hale hai helo bi loyogo lolene nga.
12 Wali agali genda yu karu 2 Sml 4.11, Iba 9.18, 10.17, 22.24, 37.25, Ais 49.14-15, Hi 13.5
Anduane Homogo ibugua ti mitangi ho haga kagoni.
Ibugua wali agalime dugu bialu karu
helalu handa tara nahaga kagoni.
Wali agali uruni mo ko haga karu
ibugua ti pani nelo miaga ka.
 
13 Anduane Homogo-o í̠na i̱ dara habe.
Genda tandagala i̱ waitigime mo ngirago í̠na de handabe.
I̱ homolene kaware wiagoria pu hewaria
í̠na i̱ haru dai bialu mo wirigoni.
14 Í̠na uruni bibahende biai haga kegonaga Iba 13.5, 20.5, 35.9
i̱na bi te loyogo lai halu
í̠naga mini mo yaraga holebero.
I̱na Saiono tanonaga pabe haraba ngagoria heyu howa
í̠na biriru bibahende latagi halu
i̱ mo wirigonaga turuho holebero.
 
15 Wali agali hameigini tara tara í̠ mitangi nahaga karume Iba 7.15, 94.23, Min 5.22, 26.27
I̱ uli pelonaga uli tombo wu hearia
habolo puwa tini ogoniha pilaya.
Tigua wena nuha minule nu wiaho hearia
tini nu ogoniha do wiya.
16 Anduane Homogohanda manani tigatiga mo tale birangi Har 14.31, Min 5.22
ibunaga mini tigabi ngago mo walia haga ka.
Wali agali ko biaga bu karume maru mo ko hole lowa
wai hanalu bu karu
mo habo lalu tini mo ko henego polebira.
 
17 Wali agali hameigini tara tara mana ko biagaru Yob 8.13, Iba 50.22
Ngode Datagaliwabe erembira miaga bu karu
ti bibahende humbirini andaga pu hai holebira.
18 Ngode Datagaliwabehanda wali agali yagibano bu karu Iba 12.5, Min 23.18, 24.14
embeda nahe mitangi biaabo haga ka.
Genda yu karu Ngode Datagaliwabehanda ti biamogo bilo
ibuhondo mini dunu biaho kagola
ibugua ti genda yuwa lu helowa naholebira.
 
19 Anduane Homogo-o dindini wali agali bu karume
í̠hondo ngui higi buyu helo wanahe
í̠ni abale heyalu ibabe.
Wali agali hameigini tara tara í̠ mitangi nabiaga karu
ti í̠naga deni íbu helowa
í̠ni manani tigatiga mo dabaki habe.
20 Anduane Homogo-o í̠na wali agali uruni mo gi hai habe. Iba 62.9, Ais 31.3, Ese 28.2
Wali agali hameigini tara tara bu karu
tini habane nabulene kamarunida lo manda bilo helabe.
MBUGA MANE
(Iba Gana 90-106)

9:2: Iba 5.11, 83.18

9:5: Man 9.14, Min 10.7

9:7: Iba 102.12, 102.26, Hi 1.11

9:8: Iba 96.13, 98.9

9:9: Iba 37.39, 46.1, 91.2

9:10: Man 31.6-8, Iba 37.25, 70.4, 91.14

9:11: Iba 107.22

9:12: 2 Sml 4.11, Iba 9.18, 10.17, 22.24, 37.25, Ais 49.14-15, Hi 13.5

9:14: Iba 13.5, 20.5, 35.9

9:15: Iba 7.15, 94.23, Min 5.22, 26.27

9:16: Har 14.31, Min 5.22

9:17: Yob 8.13, Iba 50.22

9:18: Iba 12.5, Min 23.18, 24.14

9:20: Iba 62.9, Ais 31.3, Ese 28.2