5
Anduane Homogohanda ibu handayaho helonaga bi lenego ogo
1 Anduane Homogo-o i̱na gendaore howa
í̠hondo bi larogo hale habe.
2 I̱naga Ngode Datagaliwabebi Kinibi í̠ni hanguore kego mitangi bialu
í̠na i̱ biamogo bibelo í̠hondo bi ogoni larogo bayuwa hale habe.✡Iba 3.4, 65.2
3 Anduane Homogo-o egerebagi bibahendengi i̱na í̠hondo bi laruli.✡Iba 30.5, 88.13, 130.6
Ni dolene tu haragolabi i̱na í̠hondo bi laabo haruli.
I̱na bi larugo ladai bibelo i̱ hondo kogoni.
4 Ngode Datagaliwabe-o wali agalime mana ko birago hondowa
í̠na turu nahagaore kegoni.
Wali agali mana ko biaabo haga karu
ti í̠ kegoria haparaho habe naheore ka.
5 Wali agali mine haga bu karu✡Hab 1.13
ti í̠naga deni helo turu nahaga ke.
Wali agali ko biaga karu
tihondo handabe manga haga ke.
6 Wali agali ke̱ howa bi laga karu✡Iba 55.23, Mo 21.8
í̠na ti bo wahaga ke.
Darama hangu noa haga karubi
bi nagalone ngago lo payapaya biaga karubi
í̠na urunihondo handabe manga haga kegoni.
7 Í̠na i̱hondo gubalini timbuni ho kegonaga✡1 Kin 8.29-30, Iba 132.7, 138.2
i̱na í̠naga anda kegoha ibulebero.
Í̠naga anda loma biahene kagoria howa
i̱na ge duli hangaho biruwa
í̠ mitangi bialu lotu lalu birulebero.
8 Anduane Homogo-o i̱naga waitigi dewaore kagonigo✡Iba 24.4-5, 27.11
i̱na í̠naga bi mana bayale ngagoria talialu holiya
í̠na i̱ haru habe.
I̱ ibagabu kogoha í̠na hariga bayale tigabi ngago mo walia habe.
9 I̱naga waitigi bu karu tiha henene lolenego nawi howa✡Iba 62.4, Lg 11.44, Lm 3.13
tigua agali ta nabi karu bo waholene hangu manda bu kagoni.
Tinaga ne hariga homaliha homa ngu ale bialu helo howa
tigua agali maru karu mana ko bulene ngago bilo
bime ladebodebo biaga ka.
10 Ngode Datagaliwabe-o í̠na agali uruni tini ko biragonaga✡2 Sml 15.31, 17.14, 17.23 pani nelo mibe.
Tinaga mini wu kago mo wahabe.
Tigua í̠ handabe manga howa mana ko ngaru bialu kago
agali ko uruni ti í̠ kegoha nahelo
kaundiaha bo batagi ho helabe.
11 Wali agali maru í̠na ti handayaho habelo haga karume✡Ais 65.13
ti turu timbuniore ho holebira.
Tinaga bu miniha turu holene to̱lai ho howa
tigua iba gana turu halu lolebira.
Í̠na wali agali í̠ gubalini haga karu
ti baya hangu handayaho habe.
Tigua í̠ bayale kegonaga turu timbuni ho howa
í̠naga mini yaraga holebira.
12 Anduane Homogo-o wali agali í̠naga bi mana taluwa bialu haga karu✡Iba 115.13
tihondo mana bayale biaga kegoni.
Í̠naga gubalini holeneme wai humbi ale howa
ti ho ge haga kegoni.