55
Mbiralime ibunaga nenege heagome ibu nde lenegonaga Ngode Datagaliwabehondo bi lenego ogo
1 Ngode Datagaliwabe-o í̠na i̱naga bi larogo hale habe.
I̱na dugu bialu bi larogo hale naholenaga hale pai nahabe.
2 Aiore i̱naga bi larogo baya hangu hale howa ladai bibe.
Genda i̱ha ngagome i̱ni bope holene tiga birane hendedo.
3 Waitigi bu karume i̱ mo ko holenaga
bi hongo howaore lalu kagoni ndobe.
Agali ko karu tigua i̱ bopeore hole kagola
i̱naga bu miniha mo ko henego kogoni.
Tigua keba timbuni haragome
i̱ha genda dewaore mo wiaga.
4 I̱ ti hondowa gi timbuni halu✡ Iba 18.4-5, 116.3
i̱ni miniha homolenenaga gi holene íbu ngagoni.
5 I̱ ani giho kogola i̱naga tingini duru laragoni.
Gi holene timbunime i̱ bope kagola kogoni ndobe.
6 Anigo i̱na ogodagua laro,✡ Yob 3.13
Ainde i̱ babagane halu polene ega aleore hoa ho kogoni.
I̱ ogonibi kole i̱na yagalo yu pialu
mini ibilo dindi mbiraha ha̱lo birule manda bidole.
7 Yagalo yu pialu dindi kaundiaha
wali agali mbira nahaga ngagoha puwa
haabo hole manda bidole ndobe.
8 Iba dalu puyaburu hongoheore ibiragola
i̱ abale yagalalu puwa bira do ho kole.
9 Anduane Homogo-o i̱na tanoha agali maru gungu bialu karia hendedogo
í̠na tinaga bi larago mo luluya halu
ti bo ereba hai habe.
10 Mbiraga horombebi tigua tanonaga ege pabe bidagoria
daligani puíbu bialu haga ka.
Wali agali tano ogoniha bu karume
mana ko dewa mo ko holene ngaru biaabo haga kagoni.
11 Tano ogoniha wali agali bu karume
tini bagabaga bialu mbirale ngarubi mo ko haga ka.
Hariga gebage ngagoriabi ngoai haga hamanibi
wali agali bu karume mendeali kago bame bime bope haga bialu
tinaga mbirale yu kago yamule mo hondo haga bialu ka.
12 I̱ waitigi mbira kagome i̱hondo bi ko laede hayagua
i̱na bi uruni lelo wahabehe ko.
I̱ handabe manga haga kagome i̱ hondo oba halu mege biyagua
i̱na ibu i̱ nahendelo bira do habehe kogoni.
13 Ai ani ndo o biyaruni í̠na birigoni.✡ 2 Sml 15.12, Iba 41.9
Í̠ i̱naga nenegeore howa
i̱la haabo haga kegoni ndobe.
Iya haru haabo haga berebali ndobe.
14 Bamba iyane haru mandagi ibagabu halu te bayaleru lalu
wali agali maru heba Ngode Datagaliwabenaga anda biago heagoria mandagi haribagoni ndobe.
15 I̱naga waitigi bu karunaga minihabi ti andagahabi
mana ko dewaore wu to̱leda.
Ti homolene tu ndo wene kaore abale homalu
homene dininiru pu hagagoha piai helo hamelo kogoni.
16 I̱na Anduane Homogo i̱ninaga Ngode Datagaliwabehanda biamogo bilonaga olalu haabo kogoni.
Ibugua i̱ pele ngialu mo wulebira.
17 Gendame i̱ bo hengedalu haabo kagonaga✡ Iba 92.2, Ab 10.3, 10.30
i̱na egerebagi horombe mbiragabi ibuhondo dugu bu mialu haabo haruli.
I̱na bi larogola ibugua hale holebira.
18 Waitigi dewaoreme i̱la wai bialu haga karu helowa
ibunime i̱ bayale mo wialu haru dai bigi bulebira.
19 Tigua ibuhondo gi nahaga howa
ko biyarunaga mini beregedolene manga haga ka.
Ngode Datagaliwabe ibu kini henego áyubi haabo kagoni howa
ibugua i̱naga bi lamerogo hale halu
waitigi karu bope hai howa wayali holebira.
20 I̱naga nenege ala henego ogoni
ibugua ibuninaga nenege bu karu baba wai bialu haya.
Ibu baba buleore lalu bi abale lo wiyaru mo habolaya.
21 Ibunaga ne harigaha bi bayale dendebi lalu✡ Iba 12.2, 28.3, 59.7, Min 5.3-4
miniha i̱la waitigi haya.
Ibunaga bime i̱ miniha dungulo helaga biyagoyu
bi ogoni ayu tibu ne gadeleore ale howa bo podaga nga.
22 Í̠ genda yu keruni bibahende✡ Iba 15.5, 37.5, 1 Pi 5.7
Anduane Homogo ibunaga giha mo yaholene nga.
Ibugua í̠naga genda uruni mo yalu
í̠ mo hongo holebira.
Anduane Homogo ibugua agali ko bu karume
mana tigabi biaga karu bibahende mo ko helo yupe naholebira.
23 Ngode Datagaliwabe-o í̠na agali ko mendeali homelo bo wahaga bu karubi
ke̱ halu mo hondo haga karubi
ti holene ha maro nabi hongohe kaore dege
homaliha ereba hai helo bo talu pelai habe laro.
I̱ nde í̠hondo mini mbiraore hongohe wu haabo holebero.