18
Anduane Homogohanda biamogo biragola ina wayali holeberema lenego ogo
(2 Samuele 22.1-51)
1 Anduane Homogo-o í̠na i̱ mo hongo haga kegoni.
I̱na í̠hondo gubaliniore ho kogoni.
2 Anduane Homogo ibuni i̱naga wai pabe hongoheore kagoni.✡Hi 2.13
Ibu ege to̱le̱ ale howa i̱ ho gehalu
waitigirunaga giha howa i̱ mo wiaga.
Ibu i̱naga humbi ale howa ibugua i̱ hapai haga ka.
Ibugua i̱ mo wialu handayaho holene hongo karulapeore kagoni.
3 Anduane Homogonaga mini yaraga hami̱ya.
I̱na ibu olalu haruli.
Ibugua hale halu i̱ biamogo bialu
i̱naga waitigirunaga giha howa i̱ mo wiaga kagonaga
iname ibunaga mini yaraga holene nga.
Homolene pume dariba haradagua i̱ dariba hayagoni.
Iba li hongoheme ibalu dambi haradagua
agali ko bu karume i̱ bo wahole ani biyagoni.
5 Homolene dameneme i̱ mabu bupe howa pume dariba haradagua biyagoni.
Homalime i̱ minule mandabu hayagoni.
6 I̱naga miniha genda ho howa Anduane Homogo olalu harugoni.
I̱naga Ngode Datagaliwabehondo i̱ biamogo bia lalu harugoni.
Ibuni andaga howa i̱naga bi hale haya.
Ibuhondo i̱ biamogo bia larugo hale hayagoni.
7 Ngode Datagaliwabe ibugua keba timbuniore howa
dindi mo dumbirumbi bilaya.
Dindi hari timbuni wearu mo emabia hayagola ema bia gimbu biya.
8 Ibunaga ngui harigaha howa ira hagua tagira ibalu
ibunaga ne harigaha howa ira hungu datagitagi biyagome
mbirale wiaru bibahende do mundu laya.
9 Ibugua hari daliga buda edene bialu daliape haya.
Daliape hayagola hari beraliba mindibi ibu geha hai haya.
10 Ibunaga dahuliyali mbiranaga erekunini biralu yagalalu daliape haya.✡Iba 104.3
Puyabu ega babagane aleheme ibu yalu abaleore daliape haya.
11 Aruma holeneme ibu dambi hai haya.
Hari beraliba mindibigome ibuni ho ge hayagoni.
12 Hari daba timbuni ibu heagoha bialu
kulu megelalu wá timbuni hama ibu mo bamba halu piya.
Iramebi dalu dindi kunimebi beraliba mindibi biago bo haealabaga bialu ibira helaya.
13 Anduane Homogo ibuni hari daligaha howa bi hongo howa hari kilikulu laradagua biayua.
Anduane Homogo Daligaorene Daliga kagonaga bi layuago hale hene.
14 Ibugua ibunaga timu edalu ba amunana biyagome waitigi purogo laya.
Hari dabame waitigi bu hearu bayagola ti ibida bilibulu lalu piai haya.
15 Anduane Homogo í̠na waitigi hearuhondo keba harigome
í̠naga ngui harigaha buhe̱ tagira ibiyagome puyabu hongohe pulo yu purogo laradagua biya.
Iba solowara timbuni bereago hundiai hayagola
dindi andaneha gene wiyago bame ha pana ho haya.
16 Anduane Homogo ibu daligaha howa gi yupe halu i̱ minu yania haya.
Iba solowara timbuni bereagome i̱ dambi hewaria ibugua i̱ gini miya.
17 I̱naga waitigi hongoheore hearunaga giha hewaria ibugua ibuninaga gime i̱ mo wiya.
Agali marume i̱ handabe manga ho hearu i̱na ti bo podabe nahe hewariabi
ibugua i̱ mo wialu haru dai biya.
18 Bamba i̱ha genda ngelo hewangi tigua i̱la wai bule ibiya.
Ani ibiyagoyu Anduane Homogohanda i̱ handayaho haabo hayagoni.
19 I̱ homolene wiagoha kaware hewaria ibugua i̱ biamogo biya.
Ibugua i̱ gubaliniore ho kagome i̱ gini minigo ko.✡Iba 31.8, 118.5
20 I̱na mana bayale tigabi wiaru talialu bialu hewago hondowa✡1 Sml 24.19
Anduane Homogohanda i̱hondo bayaleore biaga.
I̱na mana ko mbira nabi hewago hondowa ibugua i̱hondo mana bayale biaabo haga ka.
21 Anduane Homogonaga mana tigabi ngaru i̱na taluwa bialu harugoni.
I̱na i̱naga Ngode Datagaliwabe erembira mialu mana ko wiaru nabi bayale harugoni.
22 Ibunaga bi mana lo ngaru i̱na baya hangu talialu bialu haru.
Ibugua bia layadagua i̱na mo wa nahe biaabo harugoni.
23 I̱na ibu deni howa ko mbira nabiore ibu mandabu ka.
I̱na mana ko mbira buli lowa i̱ni ibagabu harugoha mamage haluore haruli.
24 Ibugua i̱na mana bayale tigabi wiaru talialu bialu hewago hondowa✡1 Sml 26.23
i̱na mana ko mbira nabi hewago hondowabi
Anduane Homogohanda i̱hondo bayaleore biaga.
25 Anduane Homogo-o mbiralime í̠ wahalu nape talima ibalu heagua
í̠nabi nde ogoni ibu yu wahalu napiaga ke.✡Iba 25.10, 31.23, 37.28, 40.11, 89.24
Mbiralime ko mbira nabiaga howa ibuha ko nawi heagua nde
í̠nabi ogoni ibuhondo mana bayale biadai biaga kegoni.
26 Mbiralime mana tigabi dege biaga heagua
í̠nabi nde ogoni ibuhondo mana tigabi dege biadai biaga ke.
Anigo mbiralime mana ko biaabo haga heagua
í̠na ibuhondo handabe manga haga kegoni.
27 Wali agali tini mo dindiha haga karu
í̠na ti biamogo bialu haru dai biaga ke.✡Iba 101.5, Min 6.17
Wali agali maru tini mo dunini howa mine haga karu
í̠na ti mo dindiha haga kegoni.
28 Anduane Homogo i̱naga wá hagane haleore í̠ kegoni.✡Yob 29.3
I̱ arumaha kogola í̠na aruma holene mo wahaga kegoni.
29 I̱na waitigi bu karu bope halu wayali holiya í̠na i̱ hongo ngiaga ke.
I̱na waitiginaga tano ngaruha ege pabe hongohe timbuni karu pogola anda poliya
í̠na i̱ hongo timbuniore ngiaga kegoni.
30 Ngode Datagaliwabe ogoni ibunaga mana baya buruguleore biai haga ka.✡Iba 17.7, 119.140, Dan 4.37
Ibugua bi laragobi heneneore dege laga ka.
Ibunime wali agali waitigi handalu ibida porarunaga humbi kago
ti bibahende ibuha hage hai haga ka.
31 Anduane Homogo ibuni hangu Ngode Datagaliwabeore kagoni.✡Man 32.31, 32.39, 1 Sml 2.2, Ais 45.5
Inanaga ha do holene anda ege to̱le̱ ale hongohe Ngode Datagaliwabe ibuni hanguore ka.
32 Ibugua i̱naga ha do anda hongoheore kagonigo✡Iba 91.2
i̱ ibaga bu koria ibugua hariga bayale mo tiga biaga ka.
33 Ibugua i̱ nogo gabua mini dia ibagabu poralidagua pialu holiya i̱ handayaho haga ka.✡Man 32.13, 2 Sml 2.18, Hab 3.19
Hari nene ngaruha pialu koria ibugua handayaho kagome i̱ pi nalaga ko.
34 Ibugua i̱ wai bulene biawai haragome
danda boronosime wabini hongoheore hibule ngago
i̱na edalu babehe kogoni.
35 Anduane Homogo-o i̱naga waitigi hearunaga giha hewaria
í̠naga humbi i̱ ngirigola i̱ wayali harugoni.
Í̠na i̱ biamogo birigome i̱ wali agali karunaga deni agali mini leneore kogoni.
36 Hariga i̱ polene wiagoha í̠na handayaho kegome waitigime i̱ mina nabi.✡Min 4.12
Í̠na hariga bayale mo wirigome
i̱ porogoha i̱naga ge gondo lalu pi nale bayale kogoni.
37 I̱na waitigi hearu talima pialu minu yania hai haruli.
I̱na ti talima pugupugu bialu ti baiore hole wahalu dai nabi haruligoni.
38 I̱na ti bogaiore hewagola homo ibira hai haga.
Ibira halu i̱naga geha wiai howa lone heyabe nahe wiaga.
39 I̱na waitigi baba wai buliya í̠nime hongo ngirigoni.
Í̠na i̱ biamogo birigome i̱naga waitigi hearu i̱na ti bo podahana hai harugoni.
40 I̱ waitigi biaru i̱ handalu ibida purogo lelo í̠na mo bia hari.
I̱na i̱ handabe manga haga hayaru bo wahai harugoni.
41 Tigua mbiralime ti biamogo bilo ga̱ lalu hayagoyu ti biamogo bulene mbira ai kabe.
Mbirali naheore ndobe.
Tigua ti biamogo bilo Anduane Homogo olayagoyu
ibugua tinaga bi hale nahaya.
42 I̱na ti bo tagadabaga biwagola ti bame be abalu ale wialu
puyabume yu purogo labehe hayagoni.
Ba dege bialu bo hengeda halu hariga teneni waru wiraligobi haya.
43 Wali agali ko hearume i̱ bo waholilono í̠ni abale ibalu i̱ biamogo biri.
Í̠na wali agali hameigini tara tara bu hearu handayaho holiya í̠na i̱ dabo helarida.
Wali agali tara tara i̱na nahendene hearu áyu i̱ andaneha íbu hai ka.
44 Wali agali dindi taraha howa íbu hene karume i̱naga wanakuiha ibalu ge duli hanga haga ka.
Tigua i̱na bi larugola abale hale halu i̱ talima ibaga.
45 Tinaga hongo ibira howa
tigua tano wai pabe hongohe hearu wahalu
tini duru lagalaga bima i̱ koria ibaga.
46 Anduane Homogo ibu haluheore kagoni.
Ibu i̱naga ege to̱le̱ ale hongohe kago
ibunaga mini mo yaraga hami̱ya.
Ngode Datagaliwabe hongoheore ogoni ibu i̱ pele ngiaga kagonigo
ibunaga mini timbuni yaraga haabo hami̱ya.
47 Ibugua i̱ biamogo bialu waitigi hearu bope halu i̱ mo wayali haga ka.✡Iba 94.1
Wali agali hameigini dindi tara tarani hearu i̱ andaneha helai haga ka.
48 Ibugua i̱naga waitigiru giha hewaria
i̱ biamogo bialu i̱ bayale mo wiaga ka.
Anduane Homogo-o í̠na i̱ pele ngialu i̱naga waitigiru mo dindiha helalu
i̱ mo wayali helarigoni.
Í̠na agali bo wahaga bu hearume i̱ bo wahole biyaria i̱ biamogo birigoni.
49 Anidagua birigonaga i̱na wali agali hameigini tara tara karunaga deni howa
í̠naga mini yaraga holebero.✡Lm 15.9
I̱na í̠naga mini yaraga halu iba gana lolebero.
50 Anduane Homogohanda Debidi i̱ kini dabo helayago
i̱naga waitigiru bope holiya ibugua i̱ mo wayali helaga ka.
Ibugua i̱niore kini dabo helene kogohondo gubaliniore haabo haga ho kagoni.
I̱naga waneigini aguanene mani holebiraru tihondobi ibugua gubalini ho haabo holebira.