25
Anduane Homogohondo handayaho habe lalu bi lenego ogo
1 Anduane Homogo-o i̱na i̱naga miniha mitangibu kogonaga✡Iba 86.4, 143.8
í̠hondo bi larogoni.
2 Í̠ i̱naga Ngode Datagaliwabeore kegoni.✡Iba 31.1, 41.11
I̱na í̠hondo mini mbiraore wu kogoni.
I̱ wai wayali naharogonaga taga pani nanelabe.
Waitigi karume i̱ bope halu wayali howa
i̱ hondo oba nahelabe.
3 Wali agali í̠hondo mini mbiraore wialu mini dunubiahe karu✡Ais 21.2, 49.23, Hab 1.13
ti wai wayali naharagonaga taga naholebira.
Wali agali mine halu mana ko biaga karu
tini dari halu taga holebira.
4 Anduane Homogo-o í̠naga mana bayale ngeru i̱ lawai halu✡Iba 27.11, 86.11
hariga tigabini pialu holiya mo walia habe.
5 Í̠na bi mana henene lo ngego talialu bialu holiya i̱ lawai habe.✡Iba 40.1, 43.3, 79.9
Ngode Datagaliwabe í̠na i̱ haru dai bialu pele ngiaga kegonaga
i̱na ani bibe laro.
Horo bibahendengi í̠na i̱ biamogo bibelo
mini dunubiaho haruligo kogoni.
6 Anduane Homogo-o í̠naga dara holenebi gubalini holenebi✡Iba 98.3, 103.17
irane nawini haga kego mitangi bibe.
Í̠naga mana ogoni bambaore howa wiaga biago áyu wiaabo kagoni.
7 Anduane Homogo-o i̱ igiri daliahe hewangi✡Yob 13.26, Iba 31.19, 51.1
ko dewa bialu harugobi
mine harugobi mitangi nahabe.
Anduane Homogo-o í̠ bayaleore haabo kegonigo
í̠naga gubalini holeneme i̱ dara halu mitangi bibe.
8 Anduane Homogo ibu bayale tigabiore kagoni.✡Iba 32.8, 86.5, 92.15
Wali agali mana ko biaga bu karume
mini beregedalu mana bayale bialu helo
ibugua biawai haga ka.
9 Ibugua wali agali tini mini mo dindi haga karu✡Iba 23.3, 27.11
bayuwa haru haga ka.
Tigua ibunaga mana tigabi ngaru hangu bialu helo
ibugua biawai haga ka.
10 Anduane Homogohanda ibunaga habo nalolene bi lowini ngagobi✡Iba 40.11, 103.18
ibunaga mana ngagobi wali agali talialu biaga karu
ibugua tihondo gubalinibi mini bilinahebi howa
ti hariga tigabini haru haabo haga ka.
11 Anduane Homogo-o í̠ni mini tigabi howa bule lalu lo wiridagua✡Har 34.9, Iba 79.9
mana ko bialu harugo domo wahabe.
I̱na ko timbuniore biruru nde í̠na domo wahaiore habe.
12 Wali agali Anduane Homogo mitangi bialu
mogolo haga karu aibe.
Uruni ti mana bayale dabalu bialu helo
ibugua hariga tigabi mo walia halu holebira.
13 Wali agali urunibi karu ti bayale halu✡Iba 69.36, Min 1.33, Yar 23.6
tinaga waneigini aguanenerubi dindi ogoria howa bayale holebira.
14 Anduane Homogo ibugua wali agali ibuni andaneha karu nenegeore haga kagoni.✡Pig 17.1, Yob 29.4, Min 3.32
Ibugua ibunaga habo nalolene bi lowini ngaru
tihondo lawai haga kagoni.
15 I̱na horo bibahendengi Anduane Homogohanda i̱ biamogo bilo✡Iba 123.2, 124.7
ibuhondo mini dunubia ho haga kogoni.
I̱ mo ko holene bu ngagoria kogola
ibugua i̱ pele ngialu mo wiaga kagoni.
16 Anduane Homogo-o i̱ni hangu howa i̱naga hongo ereba hayadago
í̠na i̱ dara halu biamogo bule abale ibabe.✡Iba 69.16, 143.4
17 I̱ hendore holene ngadagua holiya✡Iba 40.12, 107.6
i̱ha genda bu ngelo koruni í̠na mo wahabe.
Mini tumutumu bulene ngarume i̱ bope nahelo
í̠na i̱ abale biamogo bibe.
18 I̱ha genda tandagaru ngelo koru mitangi bialu✡Iba 31.7, 103.3
i̱na ko bini ngoru bibahende í̠na domo wahai habe.
19 I̱naga waitigi dewaore bu karu de handa.✡Iba 3.1-2, 9.13
Tigua i̱ handabe manga timbuni kagobi de handabe.
20 I̱naga waitigi karume i̱ bo wanahelo
í̠na i̱ handayaho halu pele ngibe.
Tigua i̱ mo taga nahelo
i̱na í̠ kegoha ha do hole ibulebero.
21 I̱na í̠hondo mini mbiraore wu kogo✡Iba 41.12
i̱naga mana bayale tigabi bulene ngorume
i̱ haru haabo helo hamelo kogoni.
22 Ngode Datagaliwabe-o í̠naga Isaraele wali agali bu karunaga genda tara tara ngarume✡Iba 130.8
ti bo hengeda nabilo
í̠na ti pele mialu haru dai bibe.