3
Debidi ibu mo hongo helo egerebagi Anduane Homogohondo bi lenego ogo
1 Anduane Homogo-o i̱naga waitigi dewaore bu kagoni.✡2 Sml 15.13–17.22
Tigua i̱ bole manda mandabu kagoni.
2 Tigua i̱ lo guralu howa lalu,
Ngode Datagaliwabehanda í̠ biamogo nabulebira, lalu ka.
3 Ti ani laragoyu Anduane Homogo-o í̠ i̱naga wai humbi ale howa✡Iba 62.7
i̱ ho hangai haga kegoni.
Í̠nime i̱ wayali holiya biamogo biaga ke.
Í̠nime i̱naga genda bu ngago mo wahalu
i̱ mo hongo haga kegoni.
4 I̱na Anduane Homogohondo, I̱ biamogo bia, lalu olaruli.✡Iba 4.3, 43.3
Ibuninaga hari loma biahene biagoria howa
ibugua i̱na bi larogo ladai biaga ka.
5 Mbiraga i̱ paliahondo kogola
Anduane Homogohanda i̱ handayaho haga ka.
6 Ami agali daosini pira agimame (10,000) i̱ ho hagira biragola✡Iba 23.4, 27.3, 118.10-13
i̱na ti hondowa gi naholebero.
7 Anduane Homogo-o í̠ ibabe.✡Yob 16.10, Iba 22.21, 57.4, 58.6
I̱naga Ngode Datagaliwabe-o i̱ biamogo bule ibabe.
I̱naga waitigi karu baba wai biaga í̠ kegoni.
Agali ko karume i̱ mo ko nahelo
tinaga ne bo hondaga kegoni.
8 Anduane Homogo í̠ni hangume í̠naga wali agali karu haru dai biaga kegoni.✡Iba 28.8, 29.11
Ti bayale helo í̠na biamogo bibelo hamelo ko.