103
Anduane Homogohanda ibunaga wali agali gubalini haga kago ogo
1 I̱na Anduane Homogonaga mini mo yaraga holebero.
I̱naga minimebi tinginimebi mbirale i̱ha kago damenego
bibahendeme ibunaga mini baya buruguleore kago mo yaraga haabo holebero.
2 I̱na Anduane Homogonaga mini mo yaraga holebero.
Ibugua i̱hondo turu halu bayale dege bigi biaga kago embeda naholeorebero.
3 Ibugua i̱na ko beroru bibahendeore domo wahai haga ka.✡ Ais 33.24, Yar 17.14
I̱ni warago tara tara anda íbu wigi bidangi
mo dabi haga kagoni.
4 Anduane Homogo ibugua i̱ore homoliya yupe nahe haru dai biaga ka.✡ Iba 34.22, 56.13
Haru dai bialu ibugua i̱ gubalini halu dara timbuni haga kagoni.
5 I̱ ani ho ko lalu walia halu i̱ dindini kongi✡ Ais 40.31
ibugua mbirale bayale dewa bu hombedo ngiragola
i̱ karulapeore wu haabo haruli.
Ibugua ani bigi biragome i̱ lone igiriho dai bialu
hongohe ega bodo hariawe ale haruli.
6 Wali agali darabi dindiha haga karu maru karume ti hengedope haragola
Anduane Homogohanda tinaga bi tigatiga lahaga ka.
Ibugua ti mo yaraga halu ti holene ngadagua helolebira.
7 Anduane Homogo ibugua Isaraele wali agali biamogo bulenenaga
ibu miniha manda manda bu yu heago damenego Mosese walia hene.
Walia halu Anduane Homogo ibugua biabe hongohe bigi biyaru
Isaraele wali agali ti de hendelene.
8 Anduane Homogo ibugua ina dara howa biamogo biagabi✡ Ya 5.11
gubalini timbuniore hagabi ka.
Ibu keba ala awane nahaga howa
ibugua ibunaga gubalini haho wiaabo holeneme
ina yaniho wiaabo helowa haga kagoni.
9 Iname mana ko liahebi beramarunaga
Anduane Homogo ibugua ina ba talia bia biaganegoyu
ani bialu haabo nahaga.
Ibugua ibunaga wali agalihondo handabe manga howa
keraho haabo nahaga kagoni.
10 Iname mana ko gibi dewaore bidamaria✡ Esr 9.13
ko birimarunaga pani ogonibi tahe ngulene ngadagua ndo
ibugua pani emene hangu ngiaga kagoni.
Iname mana ko liahebi birimarunaga pani timbuniore nabehegoyu
ibugua ina yopialu pelaga bialu kagoni.
11 Hari daliga li kagome dindi bibahende ngagoni dambi hai kadagua✡ Iba 57.10, Eb 3.18
Anduane Homogo ibugua wali agali ibuhondo mitangi bialu giho haga karu
ibunaga gubalini holene timbuniore ogonibime ti gubalini ho kagoni.
12 Uyu ni tagira ibagagoha howa namu ni paliagagoha polenego✡ Ais 43.25, Mai 7.18
kaware ndo kaundiaore gibi ngagoni.
Ani ngadagua Anduane Homogohanda iname ko birimaru bu wu kamaria
ibugua domalu hiliyalu pialu
kaundiaore gibi namura ona agima ndooreni yalu pu wahaga kagoni.
13 Abame ibunaga waneigini gubalini howa baya hanguore handayaho hagadagua✡ Mal 3.17
Anduane Homogohanda wali agali ibuhondo mitangi bialu giho haga karu
baya hangu ogonidaguaore gubalini howa ibuni handayaho haga kagoni.
14 Ibugua ina ogo aleme wabirugo ni bu karuni lalu ibuni manda bidagoni.✡ Pig 3.19, Iba 78.39, Aga 12.7
Bame dindi dugualu wabirugo ni bu kagoni lalu ibuni manda bu kagoni.
15 Ina wali agali bu kamaruni inanaga holenego✡ Yob 14.1-2, Ya 1.10-11, 1 Pi 1.24
emene tubagi tigimandi hangu tani mbuambua andaho kalidagua kamagoni.
Tani mbuambua minalu anda howa lini do haganedagua ina bu kamagoni.
16 Tani mbuambua lini biago dedaria puyabume pulo ba haragola
dindini dogolope haga.
Dindini dogolope hayagua o piyagoni haga.
Dogolope henego lone dene biagoria dodai bidaria nahandaga.
17 Ani biagagoyu ai wali agali Anduane Homogo andaneha howa✡ Lg 1.50
ibuhondo mitangi bialu giho haga karu
ibugua ti dara halu gubalini haho wiaaboore haga kagoni.
Uruni tinaga waneigini dabane mani hama polebirarubi
ibugua ti gubalini halu tihondo bayale dege biaabo halu holebira.
18 Anduane Homogonaga habo nalolene bi lo winidagua bialu karu
ibugua bia lenedagua hale halu birarubi
nde tihondo bayale dege biaabo halu holebira.
19 Anduane Homogo ibu dahuliya andagani kini biruwa
mbirale bibahende ibugua handame ho kagoni.
20 Dahuliyali hongo gibihe kamiru
Anduane Homogo ibugua bi larago baya hanguore hale halu bia larago biaga kamiruni
tíbi turuore gibi halu Anduane Homogonaga mini mo yaraga hadaba.
21 Dahuliya andaga howa Anduane Homogohanda laradagua hale halu
ibunaga biabe biahaga kamiru tiguabi
turuore halu Anduane Homogonaga mini mo yaraga hadaba.
22 Mbirale bibahendeore Anduane Homogo ibuni wabini ngamirubi kamirubi
tí bibahendeorenaga kini ibuni howa ibugua tí handame ho kago
tígua turuore halu ibunaga mini mo yaraga hadaba.
Ani bidaba.
I̱nabi Anduane Homogonaga miniore mo yaraga holebero.