5
Homogo karunaga bi lo ngago ogo
1 Homogo kamiru tí hale hadaba. Mo ko holene dewa tínaga wulebirago mitangi bialu yi lalu dugu bilimu.✡Min 11.28, Lg 6.24, 1 Ti 6.9 2 Dabudabu do harimigo goba haya. Aga tara tara wirimigo bombome naya.✡Yob 13.28, Ya 2.2✡Md 6.19 3 Muni kuni ngolo silibabi wirimigo hagua biai haya. Hagua bidago hondowa tí ko birimigo lalu walia holebira. Irame dagadagua muni hagua bidagome tínaga tingini dolebira. Hamaro bulene horo kaware ngago ngelowa mbirale tara tara do harimi. 4 Mabu biabe bia hayaru mo hondo howa tinaga yolo nami ngamigome ko birimigo walia hara. Biabe bia hayaru maru mo hondo harimigonaga tigua bi larago Anduane Homogo Hongo Haiheore kagome hale halu ka.✡Man 24.14-15, Yar 22.13, Mal 3.5 5 Dindi ogoria howa tíni hangu mitangi bialu nogo habahe kagola bo nolene tu haralidagua tí homolene kaware nga manda nabi howa bibahende ta nabi hame ledamidagua biai halu kami.✡Yar 12.3, 25.34, Amo 6.1, 6.4, Lg 16.19, 16.25, 1 Ti 5.6 6 Ko nabi hayaru, Ko biya, lowa tigua nde ladai bulene henge nawi heagola homelo bo waharimi.
Ema nabi howa hibu lalu Ngode Datagaliwabehondo bi lolenego ogo
7 I̱ hamene mbaliniru-o Anduane Homogo dai bilo tagi ema nabi howa hibu lalu halimu. Agalime tomo hongowa anda helonaga dalu ibilo ema nabi malia ho hagago mitangi bilimu.✡Man 11.14, Yar 5.24, Hos 6.3, Yol 2.23, Seg 10.1, Lg 21.19 8 Anduane Homogo dai bulene horo kaware ngago tí turu halu mini dunubia ho howa ema nabi halimu.✡Lm 13.11-12, Pb 4.5, Hi 10.25, 10.37, 1 Pi 4.7
9 I̱ hamene mbaliniru-o Ngode Datagaliwabehanda daba ki bialu howa, Tígua kagua birimi, loligo tíni guraga guraga nabilimu. Daba Ki Biaga henemane ibu panga tagirahayagi howa tamuha ibule kago handalimu.✡Md 24.33, 1 Ko 4.5, Ya 4.11 10 Ngode Datagaliwabe mana latagi haga agali bamba henerume Anduane Homogo mini lowa ti tandaga halu ema nabi howa hibu lalu henego manda bimi̱ya.✡Md 5.12, Hi 11.35 11 Tandaga timbuni halu ti hongo haabo howa turu holene handa walia hene laramali. Yobo te hale harimigoni. Ibugua Ngode Datagaliwabe mitangi bialu ema nabi howa hibu lalu haabo hayagola Anduane Homogohanda ibuhondo biyago manda bidami. Anduane Homogo kagome wali agali de hondowa dara timbuni halu biamogo biaga ka.✡Har 34.6, Yob 1.21-22, 2.10, 42.10, Iba 94.12, 103.8, 111.4, Md 5.10-11
12 I̱ hamene mbaliniru-o ai galone timbuniore laro. Dahuliya andaga mini lalubi dindi mini lalubi mbirale tara ngago mini lalubi wanakui minalu bi nalalimu. Ngode Datagaliwabehanda, Í̠ kagua lari, loligo e̱bi ndobi ogoni dege lalimu.✡Md 5.34-37
13 Tí kamigo mbirali genda yu kayagua Ngode Datagaliwabehondo bi lolene nga. Ani buwa mbirali ibu turu hayagua Ngode Datagaliwabe mini yaraga halu iba gana lolene nga.✡Eb 5.19, Kl 3.16 14 Mbirali kamigo warago bayagua ibugua Keriso hameigini agali ala hene miniwi karu ololene nga. Tigua o biago mini lalu Ngode Datagaliwabehondo bi lalu Anduane Homogo minini howa ibunaga tinginini olibe lininaga weli odo wulene nga.✡Mg 6.13, 16.18 15 Tígua Ngode Datagaliwabehondo mini mbiraore wuwa bi larimigome mbirali warago bo wiyago Anduane Homogohanda mo dabi holebira. Ani biragola ibugua ko biyago Ngode Datagaliwabehanda domo wahai holebira.✡Ais 33.24, Md 9.2, Mg 16.18 16 Wali agali maru kamigo dabi helo ko birimigo hangu hangu lapani hagahaga bialu ti mini lalu Ngode Datagaliwabehondo bi la haga bialu halimu. Mbirali mini tigabiwi kagome Ngode Datagaliwabehondo bi layagua Ngode Datagaliwabehanda hongo tara walia holebira.✡Man 9.18-20, 1 Sml 12.18, 1 Kin 13.6, Iba 34.15, Yo 9.31 17 Elaya ibu ina kamagobi dege howa ibugua dalu naibilo lalu Ngode Datagaliwabehondo mini dunubia ho howa bi layagola mali tebirani manegonaga ege waragaria dalu naibi gaea biaabo ho wini.✡1 Kin 17.1, 18.1, Lg 4.25, Ab 14.15 18 Ani biyagola howa ibugua Ngode Datagaliwabehondo bi lone lalu, Dalu ibila, layagola dalu ibalu dindi bayale halu tomo anda haga bini.✡1 Kin 18.42-45
19-20 I̱ hamene mbaliniru-o galone ogo ala manda bilimu. Tí kamigo mbiralime mana henene ngago wahalu poragola mendealime hariga tigabini haru dai biyagua homolene ngagoria pu karia haru dai bulebira. Mana ko biaga karume ko dewa biyago Ngode Datagaliwabehanda domo wahai helo haru dai biyagome ibu biamogo bini.✡Md 18.15, Ga 6.1✡Iba 51.13, Min 10.12, Lm 11.14, 1 Ko 9.22, 1 Ti 4.16, 1 Pi 4.8
✡5:1: Min 11.28, Lg 6.24, 1 Ti 6.9
✡5:4: Man 24.14-15, Yar 22.13, Mal 3.5
✡5:5: Yar 12.3, 25.34, Amo 6.1, 6.4, Lg 16.19, 16.25, 1 Ti 5.6
✡5:7: Man 11.14, Yar 5.24, Hos 6.3, Yol 2.23, Seg 10.1, Lg 21.19
✡5:8: Lm 13.11-12, Pb 4.5, Hi 10.25, 10.37, 1 Pi 4.7
✡5:9: Md 24.33, 1 Ko 4.5, Ya 4.11
✡5:11: Har 34.6, Yob 1.21-22, 2.10, 42.10, Iba 94.12, 103.8, 111.4, Md 5.10-11
✡5:15: Ais 33.24, Md 9.2, Mg 16.18
✡5:16: Man 9.18-20, 1 Sml 12.18, 1 Kin 13.6, Iba 34.15, Yo 9.31
✡5:17: 1 Kin 17.1, 18.1, Lg 4.25, Ab 14.15
✡5:19-20: Iba 51.13, Min 10.12, Lm 11.14, 1 Ko 9.22, 1 Ti 4.16, 1 Pi 4.8