1 Pida
Pidahanda Keriso hameigini dindi tara tarani hearuhondo beba mbira ogo gilibu wia hene
Mbuga ogoha gilibu ngarunaga nemandi ogo
Pidahanda Keriso hameigini Esia dindini hagahaga bu hearuhondo beba mbira ogo gilibu wia hene. Beba ogo gili binigonaga irane Keriso hameigini Yasuhondo mini mbiraore wu hearu tiha mo tandaga holene tara tara wiyagola ti mini elahe helobi ema nabi hongo ho helobi lowa gilibu wia hene. Beba ogo gili binigo tene Yasu Keriso homayagonagabi heyinigonagabi dai buleberoore lalu lo winigonagabi Bi Mana Debene ogoni mini dunu bia ho holene ngago lalu gili biaga biagome beba ogoni daga lenedaru ti mo mitangi bia hene. Ogoni mo mitangi bia halu gendabi damene ngagome tí mini mbiraore henene wirimigo ba handaragola tí hibu lalu hongo haabo harimiyagua Yasu Keriso ha pani harangi mini mo yaraga holenebi mini lene lolenebi tínaga wulebira lalu gilibu nga.
Tí Kerisonaga kamigo howa ibunaga mana bia pani halu holene nga lalu gilibu nga.
Bu̱lu̱ baga buwa kuni gilibu ngago
1.1-2
Pidahanda bi ala lenego 1.3-12
Ngode Datagaliwabehanda ina pele nginigo mo mitangi bia holene 1.13–2.10
Ina mini tigabi hole bulene ngago 2.11–4.19
Tandaga nolene ngangi Keriso hameigini ogobi holenego 5.1-11
Inane mo dindiha howa biabe bulenego 5.12-14
Lamaro bialu lenego
1
1 I̱ Pida Yasu Kerisonaga abosolo kogoni howa bi ogoni gilibu wia haro. Tí Ngode Datagaliwabehanda dabene harimiru tíni dalu wahalu Pondasabi Galesiabi Kabadosiabi Esiabi Bidiniabi dindi uruniha bai naleha hole ibida purogo lo kamiru tíhondo bi ogo gilibu wia harogoni.✡2 Ti 1.15, Ya 1.1 2 Aba Ngode Datagaliwabehanda manda bu winidagua tí dabowa heledagoni. Ibugua manda bu wialu ibu Dininime tí wali agali ibuninagaore loma bia hene howa Yasu Kerisohanda laradagua bilimulobi ibunaga daramame tí mo gahenge helobi ani dabo helayagoni.✡Lm 1.7, 8.29, 2 Te 2.13, Hi 10.22, 12.24, 2 Pi 1.2
Uru-o biamogo bia holenebi mo palia holenebi tíha to̱lai helo hame lo kogoni.
Dahuliya andaga pole lowa mini dunu bia ho holene ogo
3 Uru-o iname Anduane Homogo Yasu Kerisonaga Aba Ngode Datagaliwabe kagohondo ka̱i̱ lami̱ya. Ibugua ina dara timbuni howa biamogo bialu Yasu Keriso homayagola mo heya hayagome ibugua inahondo holene gahenge ngiya. Ani biyagome inabi mo heya holebiraore manda bialu mini dunu bia ho kama.✡1 Ko 15.20, 2 Ko 1.3, Eb 1.3, Ya 1.18 4 Ani bu howa Ngode Datagaliwabehanda turu holene tara tara baya gibiore wini ngaru ibunaga wali agaliruhondo mule lowa wia hene ngago iname muleore lowa minime dunu bia ho kamagoni. Uruni tínaga ngaru ko holilono Ngode Datagaliwabehanda dahuliya andagaha mo do ho kagoni.✡Kl 1.5, 1.12, 2 Ti 4.8, Ya 5.4 5 Horo ha maro birangi Ngode Datagaliwabehanda pele mulene walia hole mo manda bu wini ngago ogoni mule hondo kamigoni. Ani hondo howa tí Ngode Datagaliwabehondo mini mbiraore weramigola ibunaga hongome tí mamage ho kago uruni tínaga lalu ibugua wia ka.✡Yo 10.28-29, 17.11-15, Yu 1 6 Anigo áyu mo tandaga holene tara tara dewa ngagola genda tandaga tigi mbira hangunaga nalu kamigonigoyu Ngode Datagaliwabehanda tínaga uruni wia do hayago mitangi bialu turu ho halimu.✡Lm 12.12, 2 Ko 4.17, 6.10, Ya 1.2, 1 Pi 5.10 7 Mo tandaga holene ngarume tí Ngode Datagaliwabehondo mini mbiraore henemane wu kamigo walia halimulonaga nga. Bi manane mbira ogo ala laro. Dindi tawe ngolo dudu baga bialu mo koore habehe ngago ogoni ngolo ibunioredabe be ngolo ibuni ndodabe hondole agalime irani delaga. Anigo tígua Ngode Datagaliwabehondo mini mbiraore wirimigo ngolo ale ndo baya gibiorego hongo ho wiaabo halimulonaga Ngode Datagaliwabehanda ba hondolene nga. Hongo ha ho wiaabo hararume Horo Mbira Yasu Keriso ha pani harangi mini mo yaraga holenebi wá taraore holenebi mini lene holenebi tínaga wulebira.✡Yob 23.10, Iba 66.10, Min 17.3, Ais 48.10, Seg 13.9, Mal 3.3, Lm 2.7, 2.10, Ya 1.3 8-9 Tínaga deme ibu nahende howa ibuhondo gubalini ho haabo haramili. Áyubi deme ibu nahende dege howa ibuhondo mini mbiraore wu kami. Mini mbiraore wu kamigo irane ibugua tíhondo pele mulene ngiyagome. Ogonigo tí turu holene baya gibi nalabeheore yu kamigoni.✡Lm 6.22, Yo 20.29, 2 Ko 5.7, Hi 11.1, 11.27, 1 Yo 4.20 10 Bamba Ngode Datagaliwabe mana latagi haga henerume pele mulene ogoni tini manda bule baya hangu tai biaabo halu begelo handalu howa Ngode Datagaliwabehanda tíhondo áyu ngirago ngulebira lalu ala mbiwia hene.✡Dan 2.44, Hag 2.7, Seg 6.12, Md 13.16-17, 2 Pi 1.19-21 11 Keriso Dinini ibugua Ngode Datagaliwabe mana latagi haga biaruha howa Keriso tandaga nolebira lalubi mani ibu mini lene daliga holene wulebira lalubi walia hayagola tigua ogoni angi ibulubadabe agua ibulubadabe lowa tai biaabo halu hene.✡Iba 22, Ais 53, Lg 24.26-27, 1 Pi 3.19, 2 Pi 1.21 12 Ani bialu heagola Ngode Datagaliwabehanda o biaruhondo mo walia halu, Bi uruni tí manda bilimulonaga ndo wali agali mani hararume manda bilonaga nga, lalu mo walia hene. Anigo Ngode Datagaliwabehanda ibu Dinini dahuliya andaga howa ibilayagola ibunaga hongome Bi Mana Debene lawai haga karume tíhondo bi uruni langiya. Bi uruni dahuliyaliru tibi handawa bialu manda bua ka.✡Dan 9.24, Eb 3.10, Hi 11.13, 11.39-40
Ina Ngode Datagaliwabenaga deni dodo nahe mini tigabi holenaga ibugua bilimu larago ogo
13 Anigo tínaga miniha dengala howa biabe bule manda manda bu halimu. Ani bialu howa Yasu Keriso ha pani haragola Ngode Datagaliwabehanda tí biamogo bialu mo turu holebirago manda buwa mini dunubia ho halimu.✡Lg 12.35, Lm 13.13, 1 Ko 1.7, 1 Te 5.6-8 14 Ngode Datagaliwabenaga bi hale halu bilimu. Ani bialu howa Ngode Datagaliwabe manda nabi hemingi hame laramiligome tínaga miniha lone karuloligo henge namilimu.✡Lm 12.2, Eb 2.3, 4.17-18, 1 Te 4.5 15 Ngode Datagaliwabe ibugua ibu mini baya burugule taraore howa tí olayago tígua mbirale tara tara bibahende beramigo bialu howa tíbi nde mini baya burugule taraore dege howa bialu halimu.✡2 Ko 7.1, Hi 12.14, 2 Pi 3.11 16 Anduane Homogonaga mbugani lo ngagome lalu, I̱ mini baya burugule taraore kodagua tíbi nde mini baya burugule taraore dege halimu, lalu gilibu nga.✡LBM 11.44-45, 19.2, 20.7, Md 5.48
Ina dariba ho hemaria Ngode Datagaliwabehanda ina golope halu yolo binigo ogo
17 Tígua Ngode Datagaliwabehondo bi lalu howa, Aba-o, laramiligo ibugua wali agali bibahende dabaga kago ibu mini kira nawiaga howa hangu hangume biyagonaga tigatiga dabaga ka. Ani dabaga kago manda buwa dindi ogoriani kamingi ibu mitangi bialu ibu andaneha haabo halimu.✡Man 10.17, Md 6.9, Ab 10.34, Lm 2.11, 2 Ko 5.6, 7.1, 2 Ti 4.14, Hi 11.13, 12.28, Mo 2.23 18 Tí mamalime mana nahabane lawai hayagome tí dariba hearia ibugua tí golope hole yolo biyago manda biai kami. Tí golope hole ngolo silibabi ko haga ogoni aleme tí yolo bini ndo.✡Ese 20.18, 1 Ko 6.20, 7.23, 1 Pi 4.3 19 Nogo sibi igini duru nabiorego Ngode Datagaliwabehondo bo miaga henego ale Kerisonaga darama baya buruguleoreme tí golope halu pele ngini.✡Har 12.5, Ais 53.7, Yo 1.29, 1.36, Ab 20.28, 1 Ko 5.7, Hi 9.12-14, 1 Pi 1.2, Mo 5.9 20 Ngode Datagaliwabehanda dindi wa nabi howa Keriso loma bia ho helenego maha tí biamogo bulenaga ibu ha pani helene.✡Ab 2.23, Ga 4.4, Eb 1.4, 1.10, Kl 1.26, Ta 1.2-3, Hi 9.26 21 Ngode Datagaliwabehanda Yasu Keriso homenego mo heya howa ibu daliga taraore yaraga ho helene. Ani biyagola Yasu Kerisoha howa tígua Ngode Datagaliwabehondo mini mbiraore wu kami. Ogoninaga tígua mini mbiraore wulenebi mini dunubia ho holenebi Ngode Datagaliwabe ibuni kagoni.✡Yo 14.6, Ab 2.24, 2.33, Lm 4.24, 5.1-2, 10.9, Pb 2.9, Hi 2.9, 1 Pi 3.22
Inane gubalini hagahagabu holene ngago ogo
22 Bi mana heneneore lo ngago biai harimigome tíni mo gahenge harimi. Ani buwa tígua Kerisohondo mini mbiraore wu kamidagua marumebi mini mbiraore wu kago ti heba turu howa nenege hinu kamigoni. Ani bu howa tíni gubalini hagahaga bu halimu.✡Yo 13.34, Ab 15.9, Lm 12.9-10, 1 Ti 1.5, 2 Pi 1.7, 1 Yo 3.18 23 Tí tingini togo biaga arianaga waneigini halimulo ndo tingini togo nabi haabo holene arianaga waneigini halimulo Ngode Datagaliwabe mana wiaabo hene ngagome tí halu mende taba henene kami.✡Yo 1.13, Hi 4.12, Ya 1.18, 1 Yo 3.9 24 Anduane Homogonaga mbugani lo ngagome lalu,✡Iba 103.15, Ais 51.12, Ya 1.10-11✡Ais 40.6-8
Wali agali bibahende karu datani anda hagadagua anda haga ka.
Tinaga yári bulene ngaru balawaya minane anda harago ale nga.
Datani biaru gau lalu balawaya lini dogolopebe biaga ka.
25 Ani biagadagua ndo Anduane Homogonaga bi mana ngago dege wiaabo haga winigo nga,
lalu gilibu nga. Bi Mana Debene tí langiyago ogoni.✡Yo 1.1, 1.14, 1 Yo 1.1-3
✡1:2: Lm 1.7, 8.29, 2 Te 2.13, Hi 10.22, 12.24, 2 Pi 1.2
✡1:3: 1 Ko 15.20, 2 Ko 1.3, Eb 1.3, Ya 1.18
✡1:4: Kl 1.5, 1.12, 2 Ti 4.8, Ya 5.4
✡1:5: Yo 10.28-29, 17.11-15, Yu 1
✡1:6: Lm 12.12, 2 Ko 4.17, 6.10, Ya 1.2, 1 Pi 5.10
✡1:7: Yob 23.10, Iba 66.10, Min 17.3, Ais 48.10, Seg 13.9, Mal 3.3, Lm 2.7, 2.10, Ya 1.3
✡1:8-9: Lm 6.22, Yo 20.29, 2 Ko 5.7, Hi 11.1, 11.27, 1 Yo 4.20
✡1:10: Dan 2.44, Hag 2.7, Seg 6.12, Md 13.16-17, 2 Pi 1.19-21
✡1:11: Iba 22, Ais 53, Lg 24.26-27, 1 Pi 3.19, 2 Pi 1.21
✡1:12: Dan 9.24, Eb 3.10, Hi 11.13, 11.39-40
✡1:13: Lg 12.35, Lm 13.13, 1 Ko 1.7, 1 Te 5.6-8
✡1:14: Lm 12.2, Eb 2.3, 4.17-18, 1 Te 4.5
✡1:15: 2 Ko 7.1, Hi 12.14, 2 Pi 3.11
✡1:16: LBM 11.44-45, 19.2, 20.7, Md 5.48
✡1:17: Man 10.17, Md 6.9, Ab 10.34, Lm 2.11, 2 Ko 5.6, 7.1, 2 Ti 4.14, Hi 11.13, 12.28, Mo 2.23
✡1:18: Ese 20.18, 1 Ko 6.20, 7.23, 1 Pi 4.3
✡1:19: Har 12.5, Ais 53.7, Yo 1.29, 1.36, Ab 20.28, 1 Ko 5.7, Hi 9.12-14, 1 Pi 1.2, Mo 5.9
✡1:20: Ab 2.23, Ga 4.4, Eb 1.4, 1.10, Kl 1.26, Ta 1.2-3, Hi 9.26
✡1:21: Yo 14.6, Ab 2.24, 2.33, Lm 4.24, 5.1-2, 10.9, Pb 2.9, Hi 2.9, 1 Pi 3.22
✡1:22: Yo 13.34, Ab 15.9, Lm 12.9-10, 1 Ti 1.5, 2 Pi 1.7, 1 Yo 3.18
✡1:23: Yo 1.13, Hi 4.12, Ya 1.18, 1 Yo 3.9
✡1:24: Iba 103.15, Ais 51.12, Ya 1.10-11
✡1:25: Yo 1.1, 1.14, 1 Yo 1.1-3