20
Yasu ibuni mo heya henego ogo
(Madiu 28.1-8, Maga 16.1-8, Lugu 24.1-12)
1 Horo Sandengi egerebagiore muna biyagola Magadala wali Meri ibu Yasu hora hayagoria puwa ege to̱le̱me panga payinigo dugua ho wiaria de hendene.✡ Md 28.1, Mg 16.1, Lg 24.1 2 De hondowa ibugua Saimono Pidala talima piaga mende Yasuhanda gubalini ho haga henego ibula hearia wali biagome gerai lalu puwa libuhondo lalu, Anduane Homogo hora hayagoria nawiyago ti mo yalu piyiya. Agoha yalu puwa ngabe manda nabi kama, lene.✡ Yo 13.23, 19.26, 21.7, 21.20, 21.24
3 Ani layago hale howa Pidala talima piaga mendela libu tagira puwa Yasu hora hayagoria de hondo pene. 4 Libu gerai lalu pialu talima piaga mende biagome Pida yu wahalu hora hayagoria ibu abale pene. 5 Abale puwa ngabe hondole bulu paluwa handa anda halu hearia labolabo pele bayaore biago dege wiago de hendene. Wiago hondowa anda nape tagira hearia✡ Yo 19.40 6 Saimono Pida ibu mama ibuwa egeanda biagoha anda puwa labolabo pele bayaore biagobi 7 mende Yasunaga embone huba binigobi mandagi nawi hangu hangu wiaria de hendene.✡ Yo 11.44 8 Talima piaga mende abale gerai lalu ala íbu hene biago ibubi hora hayago egeanda biagoha maha anda pene. Anda puwa ogoni de hondowa mini mbiraore wini. 9 Anduane Homogonaga mbugani lo ngago, Ibu homowa heyalu polebira, lalu gilibu wini biago irane libugua bayuwa manda nabi hene.✡ Iba 16.10, Ab 2.25-31, 13.34-35 10 De handalu libu andaga dai bini.
Magadala wali Meri hearia Yasu ha pani henego ogo
(Madiu 28.9-10, Maga 16.9-11)
11 Yasu hora hayagoria Meri ibu tagira howa dugu bialu hene. Dugu bialu howa hora hayagoria bulu paluwa handa anda halu hearia✡ Mg 16.5 12 dahuliyali kira labolabo pele karule berearia de hendene. Yasunaga tingini winigoria mende Yasunaga embone winigohayagi bira mende Yasunaga ge winigohayagi bira biago de hendene. 13 Libugua ibuhondo lalu, Wali-o í̠ dugu berego aginagabe, lene.
Ani layagola ibugua libuhondo lalu, I̱naga Anduane Homogo tigua yalu piyadago agoha ngabe toba howa dugu bero, lene.
14 Ani lowa ibu beregedalu hearia Yasu heago hondowa ibu Yasuda manda nabi hene.✡ Md 28.9, Mg 16.9, Lg 24.16, 24.31, Yo 21.4 15 Yasuhanda ibuhondo lalu, Wali-o í̠ dugu berego aginagabe. Ái hai bialu kebe, lene.
Ani layagola ibu mabu biabe biaga agali kabe toba howa ibuhondo lalu, Agali-o í̠na yalu piriyagua i̱ni mo poliya ogoha yalu pu ngo lalu langi, lene.
16 Ani layagola Yasuhanda ibuhondo lalu, Meri-o, lene.
Ani layago hale howa Meri ibu beregedowa ibuhondo Hiburu bi lalu, Labonai, lene. Inanaga bi lalu, Lawai haga.
17 Yasuhanda ibuhondo lalu, I̱ Aba karia iraga nahe kogo i̱ ela nahabe. I̱naga hameneru kagoria puwa au labe. I̱naga Ababi tínaga Ababi i̱naga Ngode Datagaliwabebi tínaga Ngode Datagaliwabebi karia iraga hole kogo laya labe, lene.✡ Iba 22.22, Md 28.10, Lm 8.29, Eb 1.17, Hi 2.11-12
18 Ani layago hale howa Magadala wali Meri ibugua talima piaga biaru hearia puwa tihondo lalu, Anduane Homogo de handaru, lalu ibuhondo layagobi lamiai hene.
Yasu ibunaga talima piaga biaru hearia ha pani henego ogo
(Madiu 28.16-20, Maga 16.14-18, Lugu 24.36-49)
19 Horo Sande ogoningi dege alendo ni gai layagola ibunaga talima piaga biaru Yu wali agali haru haga hearume ti hondoligo lowa gi halu panga paya tagi ho berene. Ani berearia Yasu ibuwa ti bereagoria dombeneni íbu hene. Ibugua tihondo lalu, Mo palia holene tí heba helo laro, lene.✡ Mg 16.14, Lg 24.36, Yo 19.38, 1 Ko 15.5 20 Ani lowa ibugua ibunaga gi habebi habianebi tihondo walia hene. Tigua de hondowa, Ina Anduane Homogooreda, lowa ti turu timbuni hene.✡ Yo 16.22, 19.34, 1 Yo 1.1 21 Yasuhanda tihondo halu mende lalu, Mo palia holene tí heba helo laro. I̱ Abahanda i̱ pu layadagua i̱nabi tí pudaba laro, lene.✡ Md 28.18-19, Yo 17.18, 2 Ti 2.2, Hi 3.1 22 Ani lowa ibugua ti bibahendeha buhe̱ pu la anda halu lalu, Ngode Datagaliwabe Dinini tíha helo ngero. 23 Mbiralime ko binigo tígua domarimiyagua domai holebira. Mbiralime ko binigo tígua nadomarimiyagua nadome wiaabo holebira, lene.✡ Md 16.19, 18.18
Yasuhanda Tomasahondo bi lenego ogo
24 Yasu ibiyago ogoningi ibunaga talima piaga mbira mini Tomasa kai mini Hono Palu ibu nabereha ibinigo✡ Yo 11.16, 14.5, 21.2 25 maha talima piaga marume ibuhondo lalu, Iname Anduane Homogo de handarima, lalu lamini.
Ani layagola Tomasahanda tihondo lalu, Ibunaga gi habeni nili motudu ngago de nahende howa i̱naga gi hondoneme ela nahe howabi ibunaga habianeni i̱naga gime ela nahe howabi i̱na mini mbiraore nawulebero, lene.
26 Ani layago Sarere mbira peha ibunaga talima piaga biaru andagaha lone ngoai ho berenego Tomasabi ti heba berene. Panga paya tagi ho berenego ti bereagoria dombeneni Yasu íbu howa tihondo lalu, Mo palia holene tí heba helo laro, lene. 27 Ani lowa ibugua Tomasahondo lalu, Í̠naga gi hondoneme i̱naga gi habeni ela halu handa. Í̠naga gi dogolalu i̱naga habianenibi ela halu handa. Hondowa mini kira nawi mini mbiraore wialu habe, lene.✡ 1 Yo 1.1
28 Ani layagola Tomasahanda ibuhondo lalu, I̱naga Anduane Homogobi i̱naga Ngode Datagaliwabebi í̠ore ke, lene.
29 Ani layagola Yasuhanda ibuhondo lalu, Í̠na í̠naga deme i̱ de hondowa mini mbiraore werebe. Deme i̱ nahende howa mini mbiraore wialu karu ti turu timbuniore halu ka, lene.✡ 2 Ko 5.7, 1 Pi 1.8
Mbuga ogonaga irane ogo
30 Yasu ibugua ibunaga talima piagaru heba howa ti deni agalime nabiagane ale dewaore binigo mbuga ogoha gili nabini.✡ Yo 21.25 31 Mbuga ogoha bi gilibu ngago tí daga lalu howa Mbirali Dabo Helenego ibulebira lowinigo ibu Ngode Datagaliwabe Igini Yasuoreda manda buwa mini mbiraore wialu halimulonaga gilibu wero. Tígua ibuhondo mini mbiraore wialu kamirume holene gahenge yu halimulobi gilibu wero.✡ Lg 1.4, Yo 3.15-16, 5.24, Lm 1.17, 1 Pi 1.8-9, 1 Yo 5.13
✡20:1: Md 28.1, Mg 16.1, Lg 24.1
✡20:2: Yo 13.23, 19.26, 21.7, 21.20, 21.24
✡20:9: Iba 16.10, Ab 2.25-31, 13.34-35
✡20:14: Md 28.9, Mg 16.9, Lg 24.16, 24.31, Yo 21.4
✡20:17: Iba 22.22, Md 28.10, Lm 8.29, Eb 1.17, Hi 2.11-12
✡20:19: Mg 16.14, Lg 24.36, Yo 19.38, 1 Ko 15.5
✡20:20: Yo 16.22, 19.34, 1 Yo 1.1
✡20:21: Md 28.18-19, Yo 17.18, 2 Ti 2.2, Hi 3.1
✡20:31: Lg 1.4, Yo 3.15-16, 5.24, Lm 1.17, 1 Pi 1.8-9, 1 Yo 5.13