5
Yonehanda mbuga mbira hendenego ogo
1 Mbirali handame ho biragane dagiani bereagonaga gi tigame mbuga mbira yu hearia handaru. Mbuga ogoni abene mendeha mendehabi gili bume howa wagaya ale kariame mo ndibulo para heneya.✡ Ais 29.11, Ese 2.9-10, Dan 12.4 2 Ani handalu hewaria dahuliyali hongohe mbirame bi dalimu lowa lalu, Mbuga ogoni wagaya aleme ndibulo para ho ngago ogoni mbirali aiwa laga lalu mo anga labehe kabe, laya. 3 Ani layagola dahuliya andagani karu ariamebi dindini karu ariamebi humbirini andagani karu ariamebi mbuga ogoni anga lalu hondolene mbira naheoreya. 4 Mbuga ogoni anga lalu de handabehe mbirali naheoreyagola i̱na yi lalu dugu timbuni biru. 5 Ani birugola dahuliyali haru haga biaru aria mbiralime i̱hondo lalu, Dugu nabibe. Yuda hameiginiha howa budi gabua ale timbuni Laiono ibu Debidinaga aguanene gibiore kago ibugua wayali howa mbuga wagaya ale kariame ndibulo para hene ngago laga lowa anga labehe ibuni dege kagoni handa, laya.✡ Pig 49.9, Ais 11.1, 11.10, Lm 15.12, Hi 7.14, Mo 6.1, 22.16
Yonehanda Nogo Sibi Igini Mbira hendenego ogo
6 Ani handa layagola handalu hewaria Nogo Sibi Igini Mbira handame ho biragane dagia wiago hanuni helowa holenehe mariali helene biarubi dahuliyali haru haga pira kirani maria (24) biarubi ho mabu bu hearia handaru. Nogo Sibi Igini o hayadagoni ibu homelo bene handalehe hea. Nogo Sibi Igini biago ibu haguaneni ne gayane kariahebi de kariahebi hea. De karia uruni Ngode Datagaliwabe Dinini karia ka lalu ti dindi bibahendeha pelaame hayaruya.✡ Ais 53.7, Seg 4.10, Yo 1.29, 1.36, Mo 1.4, 4.5, 5.9, 5.12, 13.8 7 Nogo Sibi Igini biagome mbirali handame ho biragane dagiani bereagonaga gi tigame mbuga yu heago ibu berearia puwa yamiya.✡ Mo 4.2, 4.10 8 Ibugua ogonidagua biyagola holenehe mariali helene biarubi dahuliyali haru haga pira kirani maria (24) biarubi Nogo Sibi Igini biago heagoria buhayagi bulu palu ibira haya. Uruni bibahende hangu hangume ga̱wa̱ ale timbunibi ndisi ngolome wabini hayadaruha mbirale ira hagua ngabilo delaga mini inisenesiru yu hea. Mbirale ngabi uruni Ngode Datagaliwabenaga wali agalime ibuhondo bi laganeru nga.✡ Iba 141.2, Mo 4.8-10, 8.3-4, 15.2 9 Tigua iba gana gahenge lalu,✡ Iba 33.3, 40.3, 96.1, 98.1, 144.9, Ais 42.10, Ab 20.28, Eb 1.7, Hi 9.12, 1 Pi 1.18-19, 1 Yo 1.7, Mo 14.3
Mbuga ogoni mo yuwa wagaya aleme ndibuledaru laga lalu anga labehe karulape í̠ kegoni.
Irane ogoninaga í̠ homabelo bayagola darama pela harigome
wali agali hameigini tara tara karubi bi tara tara laga karubi dindi tara tarani bu karubi tingini tara tara karubi bibahendeoreha howa
ti Ngode Datagaliwabenaga helo haru dai biri.
10 Ani bialu ti Ngode Datagaliwabenaga biabe biaga helo í̠na Ngode Datagaliwabehanda handame ho kagoria loma binigo mo miaga mo hela harigo ka.✡ Har 19.6, Ais 61.6, 1 Pi 2.5, Mo 1.6, 20.6, 22.5
Ani biragome ti dindini howa wali agali haru holebira,
lalu laya.
11 I̱na lone handalu hewaria dahuliyali daosini dege daga labe nahe dewaoreme bi layuago hale haru. Dahuliyali uruni tigua Ngode Datagaliwabenaga handame ho biragane dagiabi holenehe mariali helene biarubi dahuliyali haru haga pira kirani maria (24) biarubi ho mabu bupe ho howa✡ Iba 68.17, Dan 7.10, Hi 12.22, Mo 4.4-6 12 iba gana laraga halu lalu,✡ 1 Bit 29.11, Mo 5.6
Nogo Sibi Igini homelo bayago ibuhondo haru holenebi homogo holenebi mini gigabiwi holenebi hongo holenebi
mini yaraga holenebi mini lene holenebi ka̱i̱ lolenebi
uruni damenego mulene ibuni dege karulape ka,
laya.
13 Hale ha ho wialu hewaria dahuliya andaga hearubi dindini hearubi humbirini andaga hearubi iba solowaraha berearubi mbira mbira tara tara haame hearubi uruni bibahendeoreme iba gana lalu,✡ Lm 9.5, Pb 2.10, 1 Ti 6.16, 1 Pi 4.11, Mo 4.2, 4.10, 6.16, 7.10
Mbirali handame ho biragane dagiani bedagohondobi Nogo Sibi Igini kagohondobi
ka̱i̱ lolenebi mini yaraga holenebi mini lene lolenebi hongo taraore holenebi
wia dege bidane wia ho wilo hame ledama,
lalu laya.
14 Ani layagola holenehe mariali helene biarume ladai bialu lalu, Aniore bilo, laya. Ani layagola dahuliyali haru haga pira kirani maria (24) biarume bulu palu ibira howa libunaga mini yaraga halu hene.
✡5:1: Ais 29.11, Ese 2.9-10, Dan 12.4
✡5:5: Pig 49.9, Ais 11.1, 11.10, Lm 15.12, Hi 7.14, Mo 6.1, 22.16
✡5:6: Ais 53.7, Seg 4.10, Yo 1.29, 1.36, Mo 1.4, 4.5, 5.9, 5.12, 13.8
✡5:8: Iba 141.2, Mo 4.8-10, 8.3-4, 15.2
✡5:9: Iba 33.3, 40.3, 96.1, 98.1, 144.9, Ais 42.10, Ab 20.28, Eb 1.7, Hi 9.12, 1 Pi 1.18-19, 1 Yo 1.7, Mo 14.3
✡5:10: Har 19.6, Ais 61.6, 1 Pi 2.5, Mo 1.6, 20.6, 22.5
✡5:11: Iba 68.17, Dan 7.10, Hi 12.22, Mo 4.4-6
✡5:13: Lm 9.5, Pb 2.10, 1 Ti 6.16, 1 Pi 4.11, Mo 4.2, 4.10, 6.16, 7.10