8
Wagaya ale mbuga ndibulo para henego aria kanego laga lenego ogo
1 Nogo Sibi Igini biagome wagaya ale ndibulo para hayago aria kanego laga layagola dahuliya andagaha bi mbira nale dege wiane hina guyini duguabehe wiya.✡ Hab 2.20, Mo 6.1 2 Ani biyagola i̱na handalu hewaria dahuliyali kariali Ngode Datagaliwabenaga wanakuihayagi hagaruhondo mbelo biguli karia mo miyane handaru.✡ 2 Bit 29.25-28, Md 18.10, Lg 1.19
3 Dahuliyali mendeme mbirale nga biaga mini inisenesi ogoni delaga be ngolome wabini wiago yalu lomabu delagane dabu heagoria íbu haya. Ani heagola Ngode Datagaliwabenaga wali agali bibahendeme ibuhondo bi larago heba biamaga helo mbirale ira hagua ngabilo mini inisenesi delelonaga dewa ibuhondo miya. Ani miyadagoni ibugua lomabu delagane dabu ngolome wabini heago handame ho biragane dagia wiagoria buhayagi heago ogoriani delelo miya.✡ Har 30.1-3, Amo 9.1, Mo 5.8, 9.13 4 Dahuliyali biagome Ngode Datagaliwabe wanakuihayagi howa ngabilo delaga mini inisenesinaga haguabi Ngode Datagaliwabenaga wali agalime ibuhondo bi lararubi biamaga halu ibunaga gini howa iraga helaya.✡ Iba 141.2, Lg 1.10, Mo 5.8 5 Ani buwa dahuliyali biagome mbirale ngabilo mini inisenesi delaga be mo yuwa lomabu delagane dabu biagoria ira deago tabo gambiru to̱lowa be heba dindini ibira haya. Ani biyagola hari kilikulu lalu hari kulu timbuni lowa hari dababi bialu dindi dumbirumbibi bialu uruni bibahende biai haya.✡ Har 19.16-19, LBM 16.12, 1 Kin 19.11, Ese 10.2, Ab 4.31, Mo 4.5, 11.19, 16.18
Mbelo biguli pu leneru ogo
6 Ani biyagola dahuliyali kariali biarume mbelo biguli karia yu hayaru pu lole manda manda biya.
7 Dahuliyali uruni aria mbiragome ibunaga biguli yayago pulaya. Ani pu layagola dalu dindi gunibi ira deaorebi darama heba bimaga howa dindini ibira haya. Ani biyagola dindi bibahende halu tebo tu wuwa tebonego dindibi irabi datanibi daiore haya.✡ Har 9.23-25, Ais 2.13, Ese 38.22, Yol 2.30, Mo 9.4, 16.2
8 Ani biyagola dahuliyali mendegome ibunaga biguli yayago pulaya. Ani pu layagola mbirale mbira deago dindi hari timbuniore handaleheni ira daradagua biaore iba solowaraha bape haya. Ani biyagola solowara bibahende halu tebo tu wuwa tebonego mo darama bia haya.✡ Har 7.20-21, Yar 51.25, Ese 14.19, Amo 7.4, Mo 16.3 9 Ani biyagome ibaha wabu bereleneru halu tebo tu wuwa tebonego homai haya. Iba sibi ibani wiaru halu tebo tu wuwa tebonego mo ko hai haya.✡ Ais 14.12
10 Ani biyagola dahuliyali tebonegome ibunaga biguli yayago pulaya. Ani pu layagola yakundi timbuni mbira ira hale daradagua deaore hariha howa iba piyagobi iba duguayagobi bibahende halu tebo tu wuwa tebonegoria ibira haya.✡ Ais 14.12, Mo 9.1, 16.4 11 Yakundi biago mini Kau Bulene. Iba nolene bibahende halu tebo tu wuwa tebonego kaubi haya. Kau biyagola wali agali dewame iba ogoni nayaru homai haya.✡ Har 15.23, Yar 9.15, 23.15
12 Ani biyagola dahuliyali manegome ibunaga biguli yayago pulaya. Ani pu layagola ni halu tebo tu wuwabi ege halu tebo tu wuwabi yakundi bibahende halu tebo tu wuwabi tebonego dege degenaga wá holene hundiya. Ani biyagome horo mbirago halu tebo tu wuwa tebonegonaga wá holene nawiya. Ogonidagua dege mbi mbirago halu tebo tu wuwa tebonegonagabi wá holene nawiya.✡ Ais 13.10, Ese 32.7, Yol 2.10, 2.31, 3.15, Amo 8.9, Mo 6.12-13
13 Ani biyagola i̱na handalu hewaria ega bodo hariawe ale mbira daligaha yagalalu pialu howa bi dalimu lalu, Hiriribiore hiriribiore. Dahuliyali dauni waragane kane biarume tinaga mbelo biguli yu karu pu laragola wali agali bibahende dindini bu karu abiore holobada, lalu layuagola hale haru.✡ Mo 9.12, 11.14
✡8:2: 2 Bit 29.25-28, Md 18.10, Lg 1.19
✡8:3: Har 30.1-3, Amo 9.1, Mo 5.8, 9.13
✡8:4: Iba 141.2, Lg 1.10, Mo 5.8
✡8:5: Har 19.16-19, LBM 16.12, 1 Kin 19.11, Ese 10.2, Ab 4.31, Mo 4.5, 11.19, 16.18
✡8:7: Har 9.23-25, Ais 2.13, Ese 38.22, Yol 2.30, Mo 9.4, 16.2
✡8:8: Har 7.20-21, Yar 51.25, Ese 14.19, Amo 7.4, Mo 16.3
✡8:10: Ais 14.12, Mo 9.1, 16.4
✡8:11: Har 15.23, Yar 9.15, 23.15
✡8:12: Ais 13.10, Ese 32.7, Yol 2.10, 2.31, 3.15, Amo 8.9, Mo 6.12-13