10
Bi yobage lalu nogo sibi haru haganenaga te lenego ogo
Yasuhanda lalu, Tíhondo heneneore laro. Mbirali nogo sibi anda panga dugualu anda nape howa leneha iraga halu anda piagago ibu ohowa page biagane agalibi page bule bo wahagane agalibi ka. Panga dugualu anda piagago ibu nogo sibi haru hagane agali ka. Ibu anda ibilo panga mamage hagane agalime panga duguaga. Nogo sibi haru hagane ogonime ibuninaga nogo sibi hangu hangu mini olaragola tigua hale howa ibu poradagua haruru piaga. Ibunaga nogo sibi haru tagira puwa ti maha ibilalu ibuni ala bamba halu piaga. Nogo sibime ibunaga bi manda buwa haruru piaga. Yo 10.27 Agali taranaga bi hale halu haruru nape agali tarame olara manda bialu ibida piai haga.
Yasuhanda tihondo bi yobage ogonidagua lamiyagola tigua irane manda nabi hene. Yo 16.25
Nogo sibi haru haga bayale Yasu kago ogo
Ti manda nabi heago hondowa Yasuhanda halu mende lalu, Tíhondo heneneore laro. Nogo sibinaga panga i̱ kogoni. I̱ naibiwaha ala bamba halu ibiniru ti bibahende ohowa page biagane agalibi page bule bo wahagane agalibi ibini. Tinaga bi nogo sibime hale nahaga hene. Yar 23.1-2, Ese 34.2-3 Panga i̱ kogoni. I̱ kogoria anda ibirago pele mulebero. Pele merogola anda íbu tagira pu bialu howa tani bayale handa walia holebira. Iba 118.20, Yo 14.6, Eb 2.18 10 Pagebibime page bulebi bo waholebi mo ko holebi hangu ibaga. I̱na tíhondo holene gahenge ngule íbu kogoni. Holene gahenge tíha to̱lo tagi helo ngule íbu kogoni.
11 Nogo sibi haru hagane bayale i̱ kogo. Nogo sibi haru haga bayale ibugua ibunaga nogo sibi nahomelo ibuninaga holene pela holebira. Iba 23.1, Ais 40.11, Ese 34.11-23, Yo 15.13, Hi 13.20, 1 Pi 2.25, Mo 7.17 12 Nogo sibi anduane ndo agali yolo hangu mitangi buwa haru haga kagome biango dudume nogo sibi bo nole ibira handala hondowa ibuni ibida piaga. Ibida poragola biango dudume nogo sibi hanu tali togo laga. Seg 11.16-17, Ab 20.29 13 Nogo sibi anduane ndo howa yolo hangu mitangi buwa haru hagame nogo sibi mitangi nabi howa ibu ibida piaga. 14-15 Nogo sibi haru hagane bayale i̱ kogo. I̱ Abahanda i̱ manda bia i̱nabi ibu manda bia bu kabadagua i̱naga nogo sibi mbira embeda nahe manda biai ho ko. Tiguabi i̱ manda biai ho ka. I̱na ti nahomelo i̱ninaga holene pela holebero. Yo 10.27, 2 Ti 2.19 Md 11.27, Lg 10.22, Yo 15.13, 1 Yo 3.16 16 Nogo sibi anda o kagoha karunaga hangu ndo i̱naga nogo sibi maru tagiraha tara hama pedago tibi i̱na haru ibua ho ko. Haru eberogola tiguabi i̱naga bi hale howa ti mandagi mbiraore halu ale ha nogo sibi haru hagane mbiraore holebira. Ais 56.8, Ese 34.23, 37.22-24, Yo 11.52, Eb 2.14, 1 Pi 2.25
17 I̱na i̱naga holene pela holeberogobi pela howa lone karuloleberogobi mitangi buwa i̱ Abahanda i̱hondo gubalini timbuniore ho ka. Ais 53.7-8, 53.12, Pb 2.8-9, Hi 2.9 18 Mbiralime i̱naga holene nayamulebira. I̱ni peloa howa pelolebero. Pelolenebi lone karulolenenagabi hongo yu kogo. I̱ Abahanda i̱hondo bibe lenedaguaore laro, lene. Yo 2.19, 5.26, 6.38, 14.31, 19.11, Ab 2.24, 2.32
19 Ibugua ani layago hale howa wali agali hearu lone talebu ki buwa Yo 7.43 20 ti dewalime lalu, Ibu dama daraga ho howa lulu bi lalu kagodago agi bule hale haramibe, lene. Yo 7.20, 8.48, 8.52
21 Marume lalu, Ibugua bi lalu kago dama daragaheme lagadagua ndo lara. Damame wali agali de kohe de hendelo mo bayale hagabe, lene. Iba 94.9, 146.8, Yo 9.6-7, 9.32-33
Yu wali agalime Yasu hame nalenego ogo
22 Ira yuni gilope howa dagare biagane hororu hayagola Anduane Homogonaga anda Loma Bia Henegonaga horo hayangi Yarusalemeni ngoai ho hene. 23 Anduane Homogonaga andaha anda polene bugu hama mbira mini Solomononaga laga wiagoriani Yasu ibu pialu hearia 24 Yu wali agali ti ngoai howa Yasu ho mabu buwa lalu, Í̠ni ogo ko lalu inahondo angi languleberebe. Í̠ Mbirali Dabo Helenego íbu keyagua tiga tiga latagi halu langiai ha, lene. Ab 3.11, 5.12, Lg 22.67
25 Ani layagola Yasuhanda tihondo ladai bialu lalu, Bamba i̱na langiai harugo tí yu tiga nabi haabo kami. I̱ Abanaga hongoni howa biabe bialu kogome i̱ tí walia haragoni. Yo 3.2, 4.26, 5.36, 10.38 26 Tígua i̱na biabe bialu kogoni de hondowa i̱hondo mini mbiraore nawi kamigo i̱naga nogo sibi ndo kami. Yo 6.64, 8.45-47, 1 Yo 4.6 27 I̱naga nogo sibi karu i̱ni manda bido. Tigua i̱naga bi hale howa i̱ talima ibaga. Yo 8.47, 10.3-4, 10.14 28 I̱na ti mitangi bialu tihondo haabobo holene miruligo ti haabo howa nahomolebira. I̱na ti i̱naga gime yani ho kogola mbiralime gingila mibe nahe holebira. Yo 3.16, 6.37-39, 17.11-12, 18.9 29 Bibahende dindini ngaru emene nira lowa i̱ Abahanda i̱hondo ngiyaru ti duniniore ka. Anigo ibunaga gime yani ho kagola mbiralime gingila mibe naheore ka. Yo 14.28, 17.2, 17.6 30 I̱ Aba i̱bi iya mbiraore kaba, lene. Yo 17.11, 17.22
31 Ani layago hale howa Yu wali agali tigua ibu ege to̱le̱me bole to̱le̱ lone mini. Yo 8.59 32 Ani miyagola Yasuhanda tihondo lalu, Abahanda bia layadagua bialu ti hendedamiore i̱na bayale dewa bialu harugo ago birugonaga i̱ bole kamibe, lene.
33 Tigua ladai bialu lalu, Í̠na bayale bigi birigonaga ndo Ngode Datagaliwabe mege birigonagabi í̠ agali howa í̠ni mo Ngode Datagaliwabe bu hinarigonagabi iname í̠ ege to̱le̱me bole kama, lene. LBM 24.16, Md 26.65, Yo 5.18
34 Yasuhanda ladai bialu lalu, Tínaga Mana lowinigo ngagome, Ngode Datagaliwabehanda tí Daligaorene Daliganaga waneigini dege kami, lalu gilibu nga ndobe. Iba 82.6 35 Anduane Homogonaga mbugani lo ngago bibahende henene wiaabo holebira manda bu kama. Ngode Datagaliwabenaga bi wali agalihondo laminiru o biaruhondo, Tí Ngode Datagaliwabe waneigini kami, lene ndobe. Md 5.18 36 I̱ Abahanda mbirali ibunaga helo loma bia howa dindini ibilenego i̱ kogome, I̱ Ngode Datagaliwabe Igini ko, lalu kogola tígua í̠na Ngode Datagaliwabe mege bialu ke larimigo irane agibe. Yo 3.17, 5.17-18, 6.27, 9.35-37 37 Abahanda biabe ogoni bia laradagua i̱na nabi koria handarimiyagua i̱hondo mini mbiraore nawilimu. 38 I̱naga bi hale howa mini mbiraore nawirimiyagua i̱ha Aba kagobi i̱ Abaha i̱ kogobi manda bilimulonaga biabe i̱na beroru handalu tí mini mbiraore wulene nga, lene. Yo 14.10-11
39 Ani layago hale howa tigua ibu minule biyagola ibu pu yola halu pene. Lg 4.30, Yo 8.59
40 Yasu ibu Iba Yodana lone domalu ange ederayagi Yonehanda pigane baboraya bialu henegoria pu hene. Yo 1.28 41 Ani pu hearia wali agali dewa íbu ngoai howa tigua lalu, Yonehanda agalime nabiagane ale mbira nabi hayago agali ogome maha ogodagua bulebira, lalu Yone ibugua layaru uruni henene lola haiore haragoni, lalu 42 dewalime Yasuhondo mini mbiraore wini. Yo 7.31

10:4: Yo 10.27

10:6: Yo 16.25

10:8: Yar 23.1-2, Ese 34.2-3

10:9: Iba 118.20, Yo 14.6, Eb 2.18

10:11: Iba 23.1, Ais 40.11, Ese 34.11-23, Yo 15.13, Hi 13.20, 1 Pi 2.25, Mo 7.17

10:12: Seg 11.16-17, Ab 20.29

10:14-15: Yo 10.27, 2 Ti 2.19

10:14-15: Md 11.27, Lg 10.22, Yo 15.13, 1 Yo 3.16

10:16: Ais 56.8, Ese 34.23, 37.22-24, Yo 11.52, Eb 2.14, 1 Pi 2.25

10:17: Ais 53.7-8, 53.12, Pb 2.8-9, Hi 2.9

10:18: Yo 2.19, 5.26, 6.38, 14.31, 19.11, Ab 2.24, 2.32

10:19: Yo 7.43

10:20: Yo 7.20, 8.48, 8.52

10:21: Iba 94.9, 146.8, Yo 9.6-7, 9.32-33

10:24: Ab 3.11, 5.12, Lg 22.67

10:25: Yo 3.2, 4.26, 5.36, 10.38

10:26: Yo 6.64, 8.45-47, 1 Yo 4.6

10:27: Yo 8.47, 10.3-4, 10.14

10:28: Yo 3.16, 6.37-39, 17.11-12, 18.9

10:29: Yo 14.28, 17.2, 17.6

10:30: Yo 17.11, 17.22

10:31: Yo 8.59

10:33: LBM 24.16, Md 26.65, Yo 5.18

10:34: Iba 82.6

10:35: Md 5.18

10:36: Yo 3.17, 5.17-18, 6.27, 9.35-37

10:38: Yo 14.10-11

10:39: Lg 4.30, Yo 8.59

10:40: Yo 1.28

10:42: Yo 7.31