8
Wali mbira kayu bialu hearia mininigo ogo
Yasu ibu Hari Olibe heagoria pene. Lg 21.37 Egerebalene ibu Anduane Homogonaga andaha dai buwa ibu hearia wali agali dewaore íbu ngoai hayagola Yasu ibugua biruwa ti lawai halu hene. Mana lowinigo lawai haga hearubi Perisi agali hearubi tigua wali mbira kayu bialu hearia handa walia howa Yasuhanda mana lawai halu berearia wali ogoni minu yalu ibini. Minu yalu ibuwa dombeni helowa tigua ibuhondo lalu, Lawai haga-o wali ogoni kayu bialu hearia handa walia howa minu yalu ibirima. Inanaga Mana lowinigo ngagome, Mosesehanda lalu, Wali ogoni ale biagago homelo ege to̱le̱me balimu, lalu gilibu ngago í̠na au loleberebe, lene. LBM 20.10, Man 22.22-24 Tigua ibu kagua laya lolenaga bi ko mbira lelo manda buwa mo la halu hene. Ti ani lalu helowa Yasu ibu ge dayama biruwa ibunaga gi hondoneme dindini gili bialu berene. Md 22.15
Tigua ibuhondo layadagua loyane yane bialu haabo hayagola ho tiga buwa ibu tihondo lalu, Tí agali ko mbira nabiaga bayaleore mbira kamigome wali o kagoni homelo to̱le̱ pigane í̠na babe, lene. Man 17.7, Lm 2.1 Ani lowa ibu lone ge dayama biruwa dindini gili bialu berene. Bi ogoni layago hale howa ti lo hende mbira pugu bialu agali wahe hearu ala pu yola halu maha igiri hearu pu yola hai halu piai hene. Yasubi wali biagobi libu hangu hene. Md 22.22 10 Yasu ho tiga buwa ibu wali biago hangu hearia de hondowa lalu, Wali-o í̠ haru ibiyaru abiyabe. Í̠ pani ngulene mbirali nahedabe, lene.
11 Wali biagome lalu, Agali timbuni-o mbirali nahe, lene. Yo 3.17, 5.14
Ani layagola Yasuhanda ibuhondo lalu, I̱nabi í̠ pani nanguleberogo pu. Í̠na ko lone nabibe, lene.]
Yasuhanda dindi bibahendeni karunaga wá holene i̱ kogoni, lenego ogo
12 Maha Yasuhanda Perisi agaliruhondo lone lalu, Dindi bibahendeni karunaga wá holene i̱ kogo. Wali agali i̱ porodagua talima ibiraru arumaha nape holene gahengenaga wá holene yu ibaga bu holebira, lene. Ais 49.6, Md 5.14, Yo 1.4-9, 3.19, 9.5, 12.46
13 Ani layago hale howa Perisi agalirume ibuhondo lalu, Í̠ni birigonaga í̠nime latagi halu lama ibaga bialu kego henene larebe ina manda nabi kama, lene. Yo 5.31
14 Ani layagola Yasuhanda tihondo ladai bialu lalu, I̱na birugo i̱nime latagi halu langialu kogo heneneore langialu ko laro. I̱ni hangume i̱ ogoria howa ibirugoni ai ogoha pole kogoni manda bu ko. Tígua i̱ agoha howa ibini kabe agoha pole kobe tí manda nabi kamigoni. Yo 5.31-32, 7.28-29, 9.29 15 Tígua agalime daba ki biagadagua beramili. I̱na mbirali daba ki nabiruli. Yo 7.24, 12.47 16 I̱na mbirali daba ki biruyagua heneneore hondowa bulebero. Irane i̱ni hangu ndo kogoni. I̱ Abahanda i̱ pu layago iya haru kabagoni. Yo 5.30, 8.29 17 Tínaga Mana lowini ngagome lalu, Mbiralime layadagua dege mendealime layagua heneneore lara manda bilimu, lalu gilibu nga. Man 17.6, 19.15, Md 18.16, 1 Ko 13.1, Hi 10.28 18 I̱ni birugo latagi hagane i̱ni kogo. Mende i̱ Aba i̱ pu layago ibugua i̱ni birugo latagi haga ka, lene. 1 Yo 5.9
19 Ani layago hale howa tigua ibuhondo lalu, Í̠ Aba agoha kabe, lene. Yo 8.55, 14.7, 16.3
Ani layagola Yasuhanda ladai bialu lalu, I̱bi i̱ Ababi tí manda nabi kami. I̱ ogo kalo manda bidamile i̱ Ababi manda bidamile, lene.
20 Yasuhanda Anduane Homogonaga anda loma muni wiaga hobane mbiraha howa bi ogoni lalu hene. Tigua ibu minule manda bu henego ibunaga horo ogoningi ndo hayagola mina nabi wahene. Yo 7.30
I̱ poleberogoha tí naibabehe kami, lenego ogo
21 Ani lowa Yasuhanda tihondo lone lalu, I̱ pole kogo porogola tígua i̱ hai buleberami. Hai bialu tínaga ko birimigo nadome wiaabo ka handala tíni homoleberami. I̱ poleberogoha tí haruru naibabehe kami, lene. Yo 7.34-36, 8.24, 13.33
22 Ani layago hale howa Yu wali agali haru haga biarume lalu, Ibugua i̱ poleberogoha tí haruru naibabehe kami layago ibunime ibuni bo wahole howa lalu ka mbauleda, lene. Yo 7.35
23 Yasuhanda tihondo ladai bialu lalu, Tí dindini hene kami. I̱ daliga howa ibini ko. Tí dindi ogoriani hene kamigo i̱ dindi ogoriani hene ndo ko. Yo 3.31 24 Irane ogonigo i̱na tínaga ko birimigoni nadome wiaabo kaore tíni homoleberemi larugo. Tígua tíni minime I̱ I̱ni Haluhe Henego Haabo Hole Kogo tí manda nabi mini mbiraore nawi haabo harimiyagua tí ko bialu kamigoria howa homai holeberami, lene.
25 Ani layago hale howa tigua ibuhondo lalu, Í̠ ai howa lalu kebe, lene.
Yasuhanda tihondo ladai bialu lalu, I̱ ogo ko lalu bamba piganeore howa langialu harugoni. 26 Tígua bialu kamigo i̱na langulenebi dabolenebi dewa mo yai ko. I̱ pu layago ibu henene kago ibugua la laradagua hangu dindi bibahendeni kamiruhondo langialu kogoni, lene. Yo 7.28, 12.49
27 Ani layagola tigua ibu Aba ka lalu langira manda nabi hene. 28 Manda nabi heagola Yasuhanda tihondo lalu, Áyu manda nabi kamigo maha Agali Hole Ibiyago tígua mo yaraga haramingi I̱ I̱ni Haluhe Henego Haabo Hole Kogo manda buleberami. I̱ni hongoni howa mbira nabiaga i̱ Abahanda labe lenedaguaore laga henedalo manda buleberami. Yo 3.11, 3.14, 5.19, 5.30, 12.32, Lm 1.4 29 I̱ pu layago iya haru haabo kaba. I̱na ibugua hameledadagua hangu biaabo haruligo i̱ hangu helalu ibu napiaga ka, lene. Yo 8.16, 16.32
30 Ani layago hale howa wali agali dewalime ibuhondo mini mbiraore wini. Yo 7.31
Henene loleneme tí golope holebira, lenego ogo
31 Yasuhanda ibuhondo mini mbiraore wiyaruhondo lalu, I̱na bi lalu kodagua bialu harimiyagua i̱naga talima ibagane wali agali heneneore holeberemi. 32 Tígua henene lolene manda biai holeberami. Ani beramigola henene loleneme tí golope hai holebira, lene. Lm 6.14, 6.18, 6.22, 8.2, Ya 1.25
33 Tigua ladai bialu lalu, Ina Abarahama aguanene hama ibinigo kama. Ina mbiralinaga garabaya biabe ale bia nahene kamago golope hai holebira larigoni agua laribe, lene. Md 3.9, Lg 3.8
34 Ani layagola Yasuhanda tihondo lalu, I̱na tíhondo heneneore larogo. Wali agali ko bialu karu ti ko bulenenaga garabaya biabe ale bia haga ka. Lm 6.16, 6.20, 2 Pi 2.19 35 Garabaya biabe ale bia hagane kago ibu anduane andaga haabo nahaga. Aba igini henene kago ibu dege abala haabo haga ka. 36 Ngode Datagaliwabe igini ogoni ibugua tí golope hayagua tí golope heneore holeberami. Lm 8.2, Ga 5.1 37 Tí Abarahama aguanene hama ibinigo kama larimigo i̱ manda bido. I̱na bi mana lawai haruligo tígua tínaga miniha nayami kamigo howa i̱ homelo bole manda bu kami. Yo 5.38, 7.19, 8.40 38 I̱na i̱ Abahanda walia hayaru langialu kogo tígua tí abahanda bilimu layadagua bialu kami, lene. Yo 3.32, 5.19, 5.30
39 Ani layagola tigua ladai bialu lalu, Ina aba Abarahama hene, lene. Md 3.9, Lm 2.28, Ga 3.7, 3.29
Yasuhanda tihondo lalu, Tí Abarahama waneigini heneneore kamile Abarahamahanda binidagua tígua bialu kamile. 40 I̱na langialu harugo Ngode Datagaliwabehanda bi henene i̱hondo langiyago tí langulenaga lalu kogola tígua i̱ homelo bole manda bialu kami. Ogonidagua Abarahamahanda nabiaga hene. Yo 8.26, 8.37 41 Tí abahanda biagadagua bialu kami, lene. Man 32.6, Ais 63.16, 64.8
Ani layagola tigua ibuhondo lalu, Ina Aba mbiraore Ngode Datagaliwabe ibuni dege kago ibu igini heneneore ina kamagoni, lene.
42 Ani layagola Yasuhanda tihondo lalu, Tí Aba heneneore Ngode Datagaliwabe ibuni kale i̱ Ngode Datagaliwabe howa íbu ka manda buwa tígua i̱hondo gubalini ho kamile. I̱ni hangu manda bialu ndo ibugua pu layagola íbu kogo. Yo 16.28, 1 Yo 5.1 43 I̱na tíhondo bi langialu kogo manda nabi kamigo irane agibe. Irane tígua i̱naga bi mana hale hoa nahe kamigome. Yo 7.17, Lm 8.7 44 Tí aba dama Heyolabe waneigini kamigo ibugua bia laradagua bua howa bialu kami. Piganengiore howa ibu bo wahaga henego áyubi bo wahalu haabo kagoni. Ibuha henene lolene mbira nawi howa ibu henene lolenehayagi nahaga ka. Ibu ke̱ hagane howa ibunaga mini ogoni ka. Ke̱ hagane tene ibu howa ke̱ hagane bibahendenaga ababi ibu ka. Md 13.38, 1 Yo 3.8, Yu 6 45 Anigo i̱na tíhondo henene hangu langialu kogo hale howa tígua i̱hondo mini mbiraore nawi kamigoni. 46 I̱na ko mbira biruria de hendene mbirali ai kamibe. Nahe ogoniyagua i̱na tíhondo heneneore langialu kogola tígua i̱hondo mini mbiraore nawi kamigo irane agibe. 2 Ko 5.21, 1 Pi 2.22, 1 Yo 3.5 47 Mbirali ibu Ngode Datagaliwabeha howa íbu kayagua ibugua Ngode Datagaliwabenaga bi hale hagane ka. Tígua Ngode Datagaliwabenaga bi hale nahagane kamigo tí Ngode Datagaliwabeha howa ndo kamigoni, lene. Yo 10.26-27, 18.37, 1 Yo 4.6
Yasu Abarahamala te ogo
48 Tigua Yasuhondo ladai bialu lalu, Iname lalu í̠ Samaria agali dama daraga ho ke laramago henene ndo laramabe, lene. Mg 3.21-22, Yo 7.20
49 Ani layagola Yasuhanda ladai bialu lalu, I̱ dama daraga naheore ko. I̱na i̱ Aba mitangi bialu ibu mini mo yaraga halu kogola tígua i̱ mege bialu kami. 50 I̱na i̱ni mini mo yaraga holene manda nabi ko. Mbirali kago ibugua i̱ mini mo yaraga holene hai bialu i̱hayagi dabalu ka. Yo 5.41, 7.18 51 I̱na tíhondo henene larogo. I̱naga bi mana lawai haruligo hale halu bialu karu ti homolene nawulebira, lene. Yo 5.24, 6.40, 6.47, 11.26
52 Ani layago hale howa tigua ibuhondo lalu, Í̠ dama daraga ke larimago heneneore larimada. Abarahama ibu homene. Ngode Datagaliwabe mana latagi haga henerubi homene. Í̠na lalu i̱naga bi mana lawai haruligo hale halu bialu karu ti homolene nawulebira larigo. Seg 1.5, Hi 11.13 53 Ina aba Abarahama homenego í̠ ibu ale ndo í̠ agali daligaore kebe. Ngode Datagaliwabe mana latagi haga henerubi homenego í̠ ai ale hole manda bu kebe. Yo 4.12
54 Yasuhanda ladai bialu lalu, I̱na i̱ni mini mo yaraga halu kole habane ndo mbira o birarunida ledamile. I̱ mini mo yaraga haga i̱ Aba ibugua. I̱ Aba tígua lalu tíninaga Ngode Datagaliwabe ibu ka lalu kamigo. 55 Tígua ibu manda bidama lalu kamigo manda nabiore kami. I̱na dege ibu manda bu ko. I̱na ibu manda nabi ko ledole i̱bi ke̱ hagane tí ale kole. I̱na ibu manda buwa ibugua bia larago biai halu ko. Yo 7.28-29 56 Tí aba Abarahamahanda i̱ ibulene tu de hondole lowa turu halu hondo haabo henego. Ibiyago hondowa turu hene, lene. Lg 10.24, Hi 11.13
57 Ani layago hale howa tigua ibuhondo lalu, Í̠ mali pira duria (50) agimabi ndo o kegodago Abarahama hendene kebe, lene.
58 Ani layagola Yasuhanda ladai bialu lalu, I̱na tíhondo heneneore laro. Abarahama naheha I̱ Haluhe ko, lene. Ais 43.13, Yo 1.1, Kl 1.17, Mo 1.8
59 Ani layago hale howa tigua ibu homelo bole ege to̱le̱ miya handala Yasu ibu o biagoniha howa ho bilibale bialu Anduane Homogonaga anda howa tagira pene. Yo 10.31

8:1: Lg 21.37

8:5: LBM 20.10, Man 22.22-24

8:6: Md 22.15

8:7: Man 17.7, Lm 2.1

8:9: Md 22.22

8:11: Yo 3.17, 5.14

8:12: Ais 49.6, Md 5.14, Yo 1.4-9, 3.19, 9.5, 12.46

8:13: Yo 5.31

8:14: Yo 5.31-32, 7.28-29, 9.29

8:15: Yo 7.24, 12.47

8:16: Yo 5.30, 8.29

8:17: Man 17.6, 19.15, Md 18.16, 1 Ko 13.1, Hi 10.28

8:18: 1 Yo 5.9

8:19: Yo 8.55, 14.7, 16.3

8:20: Yo 7.30

8:21: Yo 7.34-36, 8.24, 13.33

8:22: Yo 7.35

8:23: Yo 3.31

8:26: Yo 7.28, 12.49

8:28: Yo 3.11, 3.14, 5.19, 5.30, 12.32, Lm 1.4

8:29: Yo 8.16, 16.32

8:30: Yo 7.31

8:32: Lm 6.14, 6.18, 6.22, 8.2, Ya 1.25

8:33: Md 3.9, Lg 3.8

8:34: Lm 6.16, 6.20, 2 Pi 2.19

8:36: Lm 8.2, Ga 5.1

8:37: Yo 5.38, 7.19, 8.40

8:38: Yo 3.32, 5.19, 5.30

8:39: Md 3.9, Lm 2.28, Ga 3.7, 3.29

8:40: Yo 8.26, 8.37

8:41: Man 32.6, Ais 63.16, 64.8

8:42: Yo 16.28, 1 Yo 5.1

8:43: Yo 7.17, Lm 8.7

8:44: Md 13.38, 1 Yo 3.8, Yu 6

8:46: 2 Ko 5.21, 1 Pi 2.22, 1 Yo 3.5

8:47: Yo 10.26-27, 18.37, 1 Yo 4.6

8:48: Mg 3.21-22, Yo 7.20

8:50: Yo 5.41, 7.18

8:51: Yo 5.24, 6.40, 6.47, 11.26

8:52: Seg 1.5, Hi 11.13

8:53: Yo 4.12

8:55: Yo 7.28-29

8:56: Lg 10.24, Hi 11.13

8:58: Ais 43.13, Yo 1.1, Kl 1.17, Mo 1.8

8:59: Yo 10.31