15
Mana lo tiga bule Yarusalemeni ngoai henego ogo
1 Agali maru Yudia howa Andiogo ibuwa tigua Yasu mana yu tiga biaga hearuhondo lawai halu lalu. Mosese heneyangi Mana lo winigodagua dongone podo mabu biagane mana nabirimiyagua Ngode Datagaliwabehanda tí pele nangulebira, lene.✡ LBM 12.3, Yo 7.22, Ga 2.12, 5.2, Kl 2.8, 2.11, 2.16 2 Ani layagola hale howa Polo Banabasalame, Bi nakarulape larimigo, lalu ti heba lai gibi lalu hene. Ani lowa tigua lo manda bialu Polobi Banabasabi Keriso hameigini maru Andiogoni hearubi tigua mana ogoni lo tiga bule abosolobi agali ala hene miniwibi Yarusalemeni hearu hearia polene nga lo manda bini.✡ Ab 11.30, Ga 2.1
3 Ani lo manda biyagola howa Keriso hameigini hearume tihondo, Pudaba, layagola ti pene. Tigua pialu howa Pinisiahabi Samariahabi Yasu mana yu tiga biaga hearuhondo lalu, Wali agali tara tara karume Ngode Datagaliwabehondo mini mbiraore wu ka, lalu lamima pene. Bi ogoni layago hale howa Yasu mana yu tiga biaga biarume turu timbuni ho hene. 4 Ti Yarusaleme anda piyagola Keriso hameigini hearubi abosolo hearubi agali ala hene miniwi hearubi tigua tihondo, Ibirimida, lowa turu timbuni hene. Ani biyagola Polo Banabasalame Ngode Datagaliwabehanda libuha howa biyago te tihondo lamiai hene.✡ Ab 14.27 5 Ani layago hale howa Perisi aria Yasu mana yu tiga bu hearume heyuwa lalu, Agali tara tara Yasu mana yu tiga bulene manda bu kayagua ti dongone podo mabu bulene nga. Mosese heneyangi Mana lo winigobi tigua bilo lamulene nga, lene.
6 Bi ogoninaga lo tiga bule abosolobi agali ala hene miniwibi hearu ngoai hene. 7 Bi lagalaga biaabo halu howa Pidahanda heyuwa lalu, I̱ hameneru-o wali agali tara tarame Bi Mana Debene hale howa yu tiga bilo i̱na tihondo lamuliya abaleore Ngode Datagaliwabehanda tíha howa i̱ dabenego manda bidami.✡ Ab 10.1-43 8 Ngode Datagaliwabe ibu wali agali ta nabi bibahendenaga bu mini manda biai kago ibugua wali agali tara tara Yasu mana yu tiga bu hearu tibi karulape ka walia halu ibu Dinini ina ngiyadagua tihondobi miya.✡ 1 Bit 28.9, Ab 1.24, 2.4, 10.44, 11.15 9 Ngode Datagaliwabehanda inabi tibi dombeni tu nawini. Tigua Yasuhondo mini mbiraore wiyagola tinaga ko biyago ibugua domo wahai hene.✡ Ab 10.15, 10.28, 10.34-35, Lm 10.11, 1 Ko 1.2, 1 Pi 1.22 10 Anigo tígua Ngode Datagaliwabe ba hondole lowa nu genda timbuniore inamebi ina mamalimebi nahanabeheore biago Yasu mana yu tiga biaga karume henelo mo hana haramigo aginagabe.✡ Md 11.30, 23.4, Lg 11.46, Ga 3.10, 5.1 11 Ani bulene nawi. Iname Ngode Datagaliwabehondo mini mbiraore weramagola Anduane Homogo Yasunaga biamogo bia holeneme ina pele ngiagadagua ti nde pele miaga, Pidahanda lene.✡ Lm 3.24, Ga 2.16, Eb 2.5-8, Ta 2.11
12 Ani layagola Banabasa Pololame Yu wali agali ndo tara tara heba howa Ngode Datagaliwabehanda libuha howa agalime nabiagane alebi nahendene alebi bibahende biyagoni libugua ngoai ho berearu lamini. Lamialu hearia ti bi naleore haleho berene.✡ Ab 14.27 13 Libugua bi lai hayagola Yamesehanda lalu, Hameneru-o i̱na bi larogo hale hadaba.✡ Ab 12.17, Ga 2.9 14 Ngode Datagaliwabe ibugua Yu wali agali ndo tara tara karu hame layago abale walia halu maru ibunaga helo dabayago Saimonohanda ina bayuwa langiya.✡ Ab 15.7-9 15 Langiyadagua Ngode Datagaliwabe mana latagi haga hearume bi ogoniore lowinigo nga. Anduane Homogonaga mbugani lo ngago ogo,
16 Anduane Homogohanda lalu, Awe i̱ dai bulebero.✡ Amo 9.11-12
Dai buwa i̱na Debidihanda ala handame ho henedagua lone mbiralime handame helo helolebero.
Handame ho holene ogoni podo ibira ho ngago muwa i̱na mo gini bialu
mo hongo ho helolebero.
17 Anigo wali agali tara tara bibahendeme i̱ kogoria ibulebira.
Dindi tara tarali i̱naga helo i̱na olaruru bibahende ibai holebira.
18 Bambaore Anduane Homogohanda wali agalime bi ogoni manda bilo anidagua lene,
lalu, gilibu nga, lene.
19 Yamesehanda bi laabo halu lalu, I̱na manda bidogo ogo laro. Yu wali agali ndo tara tarame Ngode Datagaliwabehondo mini mbiraore wu karu ti iname mo genda holene nawi. 20 Ti genda nayilo iname tihondo beba gilibu pelami̱ya. Gili bialu lalu, Mbira ogo, Ne nolenebi nogobi damahondo bo minigo nolene nawigo nanalimu. Mende ogo, Wali agali kayu nayalimu. Tebone ogo, Nogo tara tararu egarubi ma gingima binigo darama heba nanalimu. Mane ogo, Darama ibuni nanalimu. Uruni hangu gilibu pelami̱ya.✡ Pig 9.4, Har 34.15-17, LBM 17.10-16, 18.6-23, 1 Ko 6.9, 6.18, 8.1, Ga 5.19, Eb 5.3, Kl 3.5, 1 Pi 4.3 21 Ogonigo bambaore howa Mosese heneyangi Mana lowinigo ngago Sabada horo bibahendengi ngoai hagane andaruha howa daga laabo haga. Mosese bi mana ogonibi tano bibahendeha agali marume lamiaabo haga, Yamesehanda lene.✡ Ab 13.15
Wali agali tara tara Yasu mana yu tiga bu hearuhondo beba pelenego ogo
22 Ani layagola howa abosolobi agali ala hene miniwibi Keriso hameiginirubi ti bibahende hearume lo mbiraore howa lalu, Ina kamaru aria agali maru Polo Banabasala heba Andiogo pelo dabami̱ya, lene. Ani lowa tigua Yudasa ibu mini mende Basabasa Sailasala ogoni labo dabene. Yasu mana yu tiga bu hearume agali ogoni laboha mini hana ho haga hene. 23 Beba ti yalu pelo gilibu minigo ogo.
Ina abosolobi agali ala hene miniwibi tínaga Keriso hamene kamarume tí Yu wali agali ndo tara tara Keriso hameigini Siria dindihabi Siria dindinaga tano Andiogohabi Silisia dindihabi kamiru tíhondo turu howa beba ogo gilibu wia harama. 24 Ina aria marume tíhondo bi mana nakarulape langiyiyagome tí mini burugulo halimulo mo lulu ya hayiyago hale harima. Tigua ogonidagua lelo iname ani lalimu nale.✡ Ab 15.1 25 Anigo ina ngoai howa agali kira dabalu tí kamiria ibilo iname, Pudaba lami̱ya, lalu ina bibahende ani lo mbiraore harima. Libu inanaga hameneore Banabasa Polola heba ibulebira. 26 Banabasa Polola ogoni labome ina Anduane Homogo Yasu Kerisonaga biabe bialu homolene wiagoria kaware haabo hene.✡ Ab 13.50, 14.19, 1 Ko 15.30, 1 Ko 11.23, 11.26 27 Ani binigo Yudasa Sailasala dabarimago labome bebani bi gili birimadagua bime libugua langilo tí kamiria, Pudaba, larima. 28 Iname genda mbira tíhondo mo tago holilono Ngode Datagaliwabe Dinini ibubi inabi mini mbiraore howa galone maria dege tígua nabilimulo langerama uru.✡ Md 23.4 29 Mbira ogo, Ne nolenebi nogobi damahondo bo minigo nolene nawigo nanalimu. Mende ogo, Darama ibuni nanalimu. Tebone ogo, Nogo tara tarabi egarubi ma gingima binigo darama heba nanalimu. Mane ogo, Wali agali kayu nabilimu. Uruni nayalimu larimago nabi wandialu harimiyagua bayale holeberami. Ai ogoni tí mitangi timbuni bu kama larama.✡ LBM 17.14, Ab 15.20, 21.25, Mo 2.14, 2.20
Beba ogoni gilibu wia hene.
30 Yasu mana yu tiga biarume agali o biaruhondo, Pudaba, layagola ti Andiogo pene. Anda puwa tigua Yasu mana yu tiga bu hearu bibahende mo ngoai howa beba biago tihondo mini. 31 Ani miyagola Yasu mana yu tiga bu hearume beba dagalowa bi bayale o daga layagonime ti mo turu hai hene. 32 Yudasa Sailasala biago labo libugua Ngode Datagaliwabe mana latagi haga howa Yasu mana yu tiga bu biaru elahe helo mo hongo halu tihondo bi lamiaabo halu hene.✡ Ab 11.27, 13.1, 14.22 33 Libu Andiogoni Sarere dewa halu tinaga aria pigane, Pudaba, layaru hearia dai bilo Yasu mana yu tiga bu biarume turu howa, Dai bidaba, lene. [ 34 Sailasa ibu Andiogoni hole manda buwa nape hondo hene.]
35 Polo Banabasala Andiogoni ege dewani howa libubi agali maru dewa heba tigua Anduane Homogonaga bi mana lawai ha lamigi bialu haga hene.
Polo Banabasalame lai lalu hangu hangu henego ogo
36 Ege maru howa Polohanda Banabasahondo lalu, Tano bibahende Anduane Homogonaga bi mana lamiribagoha Keriso hameigini karu ti agi bialu kabe handama mbaliya, lene. 37 Ani layagola Banabasa ibugua Yone ibu mini mende Maga mitangi bialu, Ina haru mali̱ya hamelo ko, lene.✡ Ab 12.12, 12.25, Kl 4.10, 2 Ti 4.11 38 Ani layagola Polohanda ladai bialu lalu, Yone Maga ogoni ibu ala iya heba pialu ina biabe biai nahe hema handala Pambiliani howa ibu iya wahalu dai biyago lone polene nakarulape, lene.✡ Ab 13.13, Kl 4.10 39 Ani layagola Polo Banabasalame lai timbuni lalu mini mbiraore nahe howa Banabasahanda Magahondo, Mba, lowa libu Saibarasa pole iba taluni biralu pene. 40 Ani biyagola Polohanda Sailasa dabowa Yasu mana yu tiga biaga Andiogoni biarume libuhondo lalu, Ngode Datagaliwabenaga biamogo bia holene libu heba helo, layagola libu haru pene. 41 Polohanda Sailasa heba Siriahabi Silisiahabi ibaga bialu howa Keriso hameigini dindi uruniha hearu ti Yasu mana yu haabo helo mo hongo hama pene.
✡15:1: LBM 12.3, Yo 7.22, Ga 2.12, 5.2, Kl 2.8, 2.11, 2.16
✡15:8: 1 Bit 28.9, Ab 1.24, 2.4, 10.44, 11.15
✡15:9: Ab 10.15, 10.28, 10.34-35, Lm 10.11, 1 Ko 1.2, 1 Pi 1.22
✡15:10: Md 11.30, 23.4, Lg 11.46, Ga 3.10, 5.1
✡15:11: Lm 3.24, Ga 2.16, Eb 2.5-8, Ta 2.11
✡15:20: Pig 9.4, Har 34.15-17, LBM 17.10-16, 18.6-23, 1 Ko 6.9, 6.18, 8.1, Ga 5.19, Eb 5.3, Kl 3.5, 1 Pi 4.3
✡15:26: Ab 13.50, 14.19, 1 Ko 15.30, 1 Ko 11.23, 11.26
✡15:29: LBM 17.14, Ab 15.20, 21.25, Mo 2.14, 2.20
✡15:37: Ab 12.12, 12.25, Kl 4.10, 2 Ti 4.11