1 Yasu iba taluni biralu iba bereago doma dai bialu ibuni haga biagoha dai bu heagola 2 agali marume agali mbira kuduguhe henego ibu lebereni ira ho yalu ibini. Ani yalu ibiyagola tigua mini mbiraore wu howa biyago hondowa Yasuhanda agali kuduguhe biagohondo lalu, I̱ igini-o í̠naga ko birigo domai hayago gi nahe turu habe, lene.✡Md 8.10, Mg 2.3-5, Lg 5.18-20

3 Ani layagola Mana lo winigo lawai haga hearume tini hangu la la bialu lalu, Ngode Datagaliwabe ibuni hangume wali agali ko biyago domo wahabehe kagodago agali ogonime Ngode Datagaliwabe mege bialu kagoni ibu aidabe, lo manda bialu berene. 4 Ti ani lo manda bialu bereago hondowa Yasuhanda tihondo lalu, Dama biangome mini wini manda bialu bedamigoni agibe.✡Iba 94.11, Md 12.25, Lg 6.8, 9.47, Yo 2.25 5 Í̠naga ko domai haya lolenego taibidabe be heyalu ibaga bu ha lolenego taibidabe.✡Mg 2.5, 2.9, Lg 5.20, 7.48 6 Anigo Agali Hole Ibiyagome dindini howa wali agalime ko biyago domo waholene hongo yu kago tí manda bilimulo walia haro, lene. Ani lowa ibugua agali kuduguhe biagohondo lalu, Heyuwa í̠naga lebere mo yalu andaga pamia, lene.✡Yo 5.8, 17.2

7 Ani laya handala agali biago ibu heyalu andaga pene. 8 Ani biyagoni hondowa wali agali hearume gi hai howa agali biago Ngode Datagaliwabe ibugua hongo taraore miyiyagonaga tigua Ngode Datagaliwabenaga mini yaraga hene.

9 Yasu ibu ani bialu harigani pole pialu hearia agali mbira dagisi muni miaga mini Madiu ibu dagisi muni miaganenaga andaha berearia hondowa Yasuhanda ibuhondo lalu, I̱ porodagua talima íbu, lene.

Ani layagola Madiu ibu abale heyalu Yasu talima pene.

10 Puwa Yasu ibu Madiu andaga tomo nalu berearia dagisi muni miaga hearubi mana ko biaga dewali hearubi ti Yasubi ibunaga talima piaga biarubi tomo nalu berearia ibalu biraganeni bira para ho berene.✡Lg 15.1-2 11 Ani bialu bereagola Perisi agali maru hearume hondowa ibunaga talima piaga biaruhondo lalu, Tínaga lawai haga ibu mana ko biaga karu heba mandagi tomo nalu bedago irane agibe, lene.✡Md 11.19, Mg 2.16, Lg 5.30, 19.7

12 Bi ani layago hale howa Yasuhanda lalu, Wali agali warago nabe karu anogodame ti biamogo bilo ibu karia napiagago warago bo ngaru hangu anogodame ti biamogo bilo ibu karia piaga.✡Mg 2.17, Lg 5.31 13 Anduane Homogonaga mbugani lo ngago ogo, I̱ mbirale tara tara bo ngulene hame nale howa dara halu biamogo bulene hame ledo, lalu gilibu nga. Bi ogoni irane aginaga layadabe dabo hondole pudaba. I̱ ibirugo wali agali bayale karu olole ndo wali agali ko biaga karu olole ibirugoni, lene.✡Hos 6.6, Md 12.7, Mg 2.17, Lg 5.32, 1 Ti 1.15

14 Ani biyagola baboraya biaga Yonenaga talima piaga hearume Yasu hearia ibuwa ibuhondo lalu, Inabi Perisi agali karubi ina tomo nane haga beramaligo í̠naga talima piaga karume tomo nane nahagadago irane agibe, lene.✡Lg 18.12

15 Ani layagola Yasuhanda tihondo ladai bialu lalu, Tígua agali mbirame wali dabu biragola howa wali agali tomo nole ngoai ho hararume agali wali dabu biaga biago heba mandagi biruwa tomo nole lowa nane darabini ale ho heloleberamibe. Ani naberamili. Horo mbiru agali wali dabu biaga biago ti kagoria howa marume ibu haru poragola tigua tomo nane holebira.✡Yo 3.29

16 Mbiralime aga gobani aga gahengeme lebu para nahaga. Ani lebu para hayagua aga gahenge biago migimugu lalu aga ala tawe biago buda timbu holebira. 17 Ogonidagua dege mbiralime waini iba gahenge bedago be nogo dongoneme wabini bamba taweha odo bere nalaga. Mbiralime odo bere layagua waini iba biagome be mo lere lalu tagira polebira. Ani biragola be biagobi ko dege holebira. Ani buligo waini iba gahenge bedago be nogo dongoneme wabini gahenge degeha bere laragola libu haru bayale ogobi labolabo holebira, lene.

18 Yasu ibu anidagua lalu hearia Yu wali agalinaga hondo hagane agali mbira ibuwa Yasu heagoria wanakuihayagi ge duli hanga ho biruwa lalu, I̱ wane áyu dege tongolo miyago ibu lone dabi helo í̠na gime ela habelo mba, lene.✡Mg 5.22, Lg 8.41-42

19 Ani layagola Yasu ibu abale heyuwa ibu piyadagua piyagola ibunaga talima piaga biaru tibi ibu piyadagua pene.

20-21 Pialu hearia wali mbira mali pira mbirani kira (21) warago taraore baabo haga berenegome ibuni hangu lo manda bialu lalu, I̱na Yasunaga agani ela haruyagua bayale holebero, lowa Yasu erembirahayagi puwa aga nguinini ela hene.✡Mg 5.25, Lg 8.43✡Md 14.36

22 Ani biyagola Yasuhanda beregedalu wali biago hondowa lalu, I̱ wane-o í̠ni Ngode Datagaliwabehondo mini mbiraore wirigome í̠ áyu mo dabi hayago turu halu hongoho habe, lene. Ani layaore dege wali biago warago dabi hai hene.

23 Ani bialu Yasu ibu Yu wali agalinaga hondo haga agali biago andaga anda pene. Anda pialu hearia pilipe alebi ga̱wa̱ alebi hiliyula alebi lalu dugu anda howa lalu walime kiabu dugu bialu hearia hondowa 24 Yasuhanda lalu, Wandari emene ogoni ibu tongolo mia nabi palia dege bidago tí bibahende tagira piai hadaba, lene. Ani layagola tigua Yasu hondo oba halu hene.✡Yo 11.11 25 Wali agali bu hearuni tagira piai hayagola Yasu ibugua wandari biago paliaga hobane mbiraha anda puwa wandari biago gi yamiyagola ibu heyini. 26 Yasuhanda biyagoninaga dindi ogonihayagi hearunime hale ho yogo lai hene.

27 Yasu ibu dindi ogoniha howa tagira puwa ibu harigani pialu hearia agali kira de kohe henego labome Yasu olama mama ibalu howa lalu, Debidi Igini-o iya hondowa dara harene, lene.✡Md 15.22, 20.29-34

28 Yasu ibu andaga anda pu heagola agali kira biago labome talima ibini. Ibiyagola Yasuhanda libuhondo lalu, Libunaga de o dabi habehe i̱ kogo mini mbiraore wu kabibe, lene.

Libugua ladai bialu lalu, Anduane-o e̱ iya mini mbiraore wu kabagoni, lene.

29 Ani layagola Yasuhanda libunaga deni ela halu howa lalu, Líbuni mini mbiraore wu kabigobi dabi hadaba, lene.✡Md 8.13 30 Ani layagola libunaga de biago de ngalayagola Yasuhanda libuhondo hongo howa lalu, O birugoniore libugua mbirali nalamilibu, lene.✡Md 8.4

31 Ani laya handala libu pialu howa Yasuhanda o biyagoninaga dindi ogonihayagi hearunime hale hai helo lo yogo lama pene.

32 Agali biago labo tagira pialu piyagola wali agali marume agali mbiraha dama daraga hayagola bi nalabehe henego haru ibini.✡Md 12.22 33 Dama daraga ho hayago wara tagi hayagola agali biagome bi tenialu lene. Ani biyagola bibahende bu hearume mogo lo nga karu lai howa lalu, Ogonidaguaore mbira Isaraeleni biyaria nahandalu nahende hene kamagoni, lene.✡Mg 2.12

34 Ani layagola Perisi agali hearume mo yo hondowa lalu, Ogoni dama bibahende karunaga haguane mini Heyolabe ibugua dama maru karu wara tagi holenenaga hongo miyagola wara tagi hayadagoni, lene.✡Md 10.25, 12.24, Mg 3.22, Lg 11.15

35 Yasuhanda tano wiaruhabi mabu andaga wiaruhabi wali agali nenege piai halu hene. Ibugua ngoai hagane andaha howa Ngode Datagaliwabehanda Handame Ho Kagonaga Bi Mana Debene lamiabi lawaibi ha bigi bialu howa dongone ko haga biarubi warago tara tara bo wiarubi mo dabi ha bigi bialu hene.✡Md 4.23, Mg 1.39, Lg 4.44 36 Ibugua wali agali dewa bu hearu handalu hearia dara holene ibunaga gubaliniha to̱lai howa hene. Irane ti nogo sibi haru hagane nahe howa hagadagua lulu anda ho pe ho howa mini dege dindi ho heagola dara ho hene.✡Dag 27.17, 1 Kin 22.17, 2 Bit 18.16, Ese 34.5, Seg 10.2, Md 14.14, Mg 6.34 37 Ani bu heago hondowa ibugua ibunaga talima piaga biaruhondo lalu, Tomo bialu mo mogo bulenego timbu halu ai tomo ogoni mo mogo bialu biabe bia hagane agali ndiada.✡Mg 6.34, Yo 4.35✡Lg 10.2 38 Anigo mabu anduane ibunime tomo buwa mo mogo bialu biabe bia hagane maru dabalu pu lelo tígua ibuhondo bi lolene nga, lene.