Maga
Magahanda Bi Mana Debene gili binigo ogo
Mbuga ogoha gilibu ngarunaga nemandi ogo
Bi Mana Debene Maga mbugani gilibu ngagome pigane tenialu, Yasu Keriso Ngode Datagaliwabe Iginiorenaga Bi Mana Debene, lalu gilibu nga. Magahanda Yasu ibu biabe biaga henegobi hongo holene yu henegobi walia halu gili bini. Yasuhanda mana lawai henegobi dama daragahe hearu wara tagi henegobi wali agalime ko biyaru domo wahaga henegobi ogonidagua bigi bialu howa ibunaga hongo walia halu hene. Yasu ibuni mitangi bialu lalu, Agali Hole Ibiyagome ibunaga holene wali agalinaga pela hole ibiya, lene.
Yasuhanda mana bialu henego Magahanda mo duniniore ho hene. Ani bialu ibugua pigane howa baboraya biaga Yonenaga te gili buwa Yonehanda Yasu baboraya bia henegobi dama Heyolabeme Yasu ba hendenegobi bi nemandi hangu gili buwa Yasuhanda biabe hongo howa bialu henegobi walia halu gili bini. Wali agali Yasu haruru piaga henerume Yasuhanda bule ibinigo irane ogo ale bule ibiralo ti manda nabi hene. Ani bialu heagola Yasu handabe manga haga maru hearume pigane emene hongo nahe howa mani hongo timbuniore halu ti Yasula waitigi ho hene.
Magahanda gilibu maro bialu Yasu ibu Yarusaleme anda puwa Sarere mbirani bialu henegobi homo aribia halu mo heya henegobi gilibu winigo nga.
Bu̱lu̱ baga buwa kuni gilibu ngago
1.1-13
Bi Mana Debene Pigane teninigo 1.14–9.50
Yasuhanda Galilini howa biabe taratara bialu henego 10.1-52
Yasu ibu Galili howa Yarusaleme penego 11.1–15.47
Sarere mbirani Yasuhanda Yarusalemehayagi howa bialu henego 16.1-8
Yasu homalu ibuni heyu henego 16.9-20
Yasu ibu horo dewaru ha pani haga bima pialu dahuliya andaga iraga halu penego
1
Baboraya biaga Yonehanda bi mana lamialu henego ogo
(Madiu 3.1-12, Lugu 3.1-18, Yone 1.19-28)
1 Bi ogo Ngode Datagaliwabe Igini Yasu Kerisonaga Bi Mana Debene pigane teninigo ogo. 2 Ngode Datagaliwabe bi mana latagi haga Aisaiahanda mbiwia halu lowinigo ibunaga mbugani gilibu nga.✡ Ais 40.3, Mal 3.1, Md 11.10, Lg 7.27
Ngode Datagaliwabehanda lalu, Hale hadaba. I̱naga bi lamule pu larogome í̠naga hariga ba helo ibuhondo, Bamba ha, lolebero, lene.
3 Dindi ko yobi wali agali nahaga wiagoria howa mbiralime olalu,✡ Ais 40.3, Md 3.3, Lg 3.4, Yo 1.15, 1.23
Anduane Homogo ibilo hariga ba hole manda manda bialu halimu.
Hariga ogoni tigabiore wilo ba halimu, lalu ka,
lenego gilibu nga.
4 Yone ibugua ogonidagua dindi ko wali agali nahaga wiagoria ibuwa bi mana lawai halu baboraya bia hole ibini. Ibugua ibuwa lalu, Ko birimigo domo wahelo tí bu mini beregedalu baboraya bulene nga, lalu lamialu hene.✡ Ab 13.24, 19.4 5 Wali agali Yudia dindi howabi Yarusaleme howabi bibahende hearu ibu hearia ibai hene. Tigua ibuwa ko biniru la pani haga biyagola Yone ibugua iba Yodanani ti baboraya biahaga bini.
6 Yone ibu nogo kamele irinime aga wabinigo karulowa mandibu nogo dongoneme wuwa hene. Ibu pagayabi mone taranaga ibanebi naga hene.✡ LBM 11.22, 2 Kin 1.8, Md 11.8 7 Ibugua mana lamialu lalu, I̱ ala íbu kogonigo maha mbirali i̱ dindiha lowa ibu daliga timbuniore kago ibulebira. I̱ bayale ndo kogome i̱na bulu paluwa ibunaga ge habe gamu pu hadolene nakarulapeore kogoni.✡ Ab 13.25 8 I̱na tí ibame baboraya bialu kogo ibugua Ngode Datagaliwabe Dininime tí baboraya bia holebira, lene.✡ Ais 44.3, Yol 2.28, Ab 2.4, 10.45, 1 Ko 12.13
Yonehanda Yasu baboraya bia henego ogo
(Madiu 3.13-17, Lugu 3.21-22)
9 Horo odarungi Yasu ibu Galili dindi Nasarete tano howa ibiyagola Yonehanda Yasu iba Yodanani baboraya bia hene. 10 Yasu ibaha howa hayayigola dahuliya andaga dugua hayago de hendene. Ani dugua hayagola Ngode Datagaliwabe Dinini ega malibu ale dalialu Yasuni birayago de hendene. 11 De handalu hearia dahuliya andaga howa bi ladali halu lalu, I̱ Iginiore i̱na í̠ gubalini ho howa í̠hondo turu timbuni ho kogoni, lene.✡ Pig 22.2, Iba 2.7, Ais 42.1, Md 3.17, 12.18, Mg 9.7, Lg 3.22
Dama Heyolabeme Yasu ko mo bia habehedabe hondole ibinigo ogo
(Madiu 4.1-11, Lugu 4.1-13)
12 Ogoniore lai heagola Ngode Datagaliwabe Dinini ibugua Yasu dindi ko wali agali nahaga wiagoria haru pu hene. 13 Ani haru pu hayagoha ibu horo pira maria (40) hene. Yasu hearia dama Heyolabeme ibu ko mo bia habehedabe hondole ibini. Yasu nogo gabua tara tara bu heagoha hearia dahuliyalirume ibu biamogo bule ibini.✡ Iba 91.11-13
Yasuhanda Galilini biabe pigane tenialu bialu henego ogo
(Madiu 4.12-17, Lugu 4.14-15)
14 Yone garabaya biya handala Yasu ibu Galili puwa Ngode Datagaliwabenaga Bi Mana Debene lamialu hene.✡ Mg 6.17 15 Yasuhanda lalu, Horo tu winigo áyu ogoni lola haragoni. Ngode Datagaliwabehanda Handame Ho Holene kaware ngagoni. Tígua ko birimigonaga mini beregedalu Bi Mana Debene yu tiga bilimu, lalu lamini.✡ Dan 9.25, Md 3.2, Ga 4.4, Eb 1.10
Yasuhanda agali maria wena minagaru olenego ogo
(Madiu 4.18-22, Lugu 5.1-11)
16 Yasu ibu Galili iba timbuniore bereago angeni pialu howa wena minaga agali kira Saimonobi ibu hamene Andurubi libugua wena nu ibaha ibira howa wena minalu hearia de hendene. 17 De hondowa Yasuhanda libuhondo lalu, Libugua agali minalibulo i̱na minawai holiya i̱ porodagua talima ibidaba, lene.✡ Md 13.47, Lg 5.1-11 18 Ani layagola libugua libunaga wena nu abale ngelalu ibu talima pene.✡ Mg 3.20, Md 19.27, Lg 5.11
19 Yasu emene lu pu howa ibugua Sebedi igini Yamesebi ibu hamene Yonebi libu iba taluni howa wena nu mo tiga bialu hearia de hendene. 20 De hondowa abale olayagola libu aba Sebedibi yolo biabe biaga hearubi ti iba taluni helalu libu Yasu talima pene.
Agali mbira dama daragahe hearia Yasuhanda waratagi henego ogo
(Lugu 4.31-37)
21 Ti Kabaniama tano anda puwa Sabada horongi Yasu ibu ngoai hagane andaha✡ Mg 4.13 puwa ibugua mana lawai halu hene. 22 Mana lowinigo lawai haga hearume lawai hagadagua ndo Yasuhanda hongo holene taraore yu howa lawai hayagola wali agali hearume hale howa ti miniha mogo lai hene.✡ Mg 7.28-29
23 Ani lawai halu heagola agali dama daragahe mbira ngoai hagane anda biagoha abale anda ibuwa ibugua ga̱ lowa lalu, 24 Nasaretaeali Yasu-o ina kamagoha í̠na agi bule ibiribe. Ina bo wahole ibiribe. I̱na í̠ manda bido í̠ agali bayale tigabi Ngode Datagaliwabe ibuni kagoria howa ibini kegoni, lene.✡ Mg 5.7
25 Ani layagola Yasuhanda dama biago talialu, Bi nale agali ogo helalu í̠ tagira pu, lene.
26 Ani layagola damame agali biago mo biango bibi bia halu ga̱ lo helalu tagira pene.✡ Mg 9.26 27 Ani biyagola wali agali bibahende bu hearume tini degedege lagalaga bialu lalu, O biyagoni agiyabe. Mana gahenge ogonida. Damarume ibugua bidaba laradagua bilo bidaba lolene hongo yu kagoni, lene.
28 Yasuhanda biyaru Galili dindi bibahendeha wali agali bu hearume hale hai hene.✡ Md 4.24
Yasuhanda wali agali dewa mo dabi haga binigo ogo
(Madiu 8.14-17, Lugu 4.38-41)
29 Yasubi Yamese Yonebi ibunaga talima piaga maru biarubi ti ngoai hagane andaha howa pialu Saimono Andurula andaga pene. 30 Saimono imane warago bowa poboyogo timbuni bu winigo tigua Yasu ibiyagola abaleore lamini. 31 Lamiyagola Yasu ibu wali biago warago bo wiagoria puwa ibugua gini mialu mo heya hene. Ani biyagola poboyogo ala biyago ereba halu dabi howa wali ogonime ti tomo nelo mule manda manda bini.
32 Alendo ni gai lalu paliyagola wali agali bu hearume warago bo wiaru mo yalu dama daragahe hearubi haru ibalu Yasu hearia ngoai hene. 33 Wali agali bibahende dindi ogoriani hearu anda ogoninaga haneni mo ngoai hene. 34 Ani biyagola Yasuhanda wali agali dewa warago tara tara bene wiaru mo dabi haga bialu dama dewa daraga hearu wara tagi haga bialu hene. Ani bigi biyagola dama biarume Yasu ibu ogoore kalo manda bu henego Yasuhanda dama biaruhondo, Bi naladababe, lene.✡ Mg 3.11-12, Lg 4.41
Yasu ibu Galilini bi mana lamima penego ogo
(Lugu 4.42-44)
35 Gao nale aruma ho wiagoha Yasu ibu heyalu tagira pialu mbirali naheore wiagoha puwa Ngode Datagaliwabela bi lalu hene.✡ Md 14.23, Mg 6.46, Lg 4.42 36 Saimonobi ibu heba mandagi hayarubi tigua Yasu hai bima pene. 37 Ani buwa ibu handa walia howa tigua ibuhondo lalu, Bibahende karume í̠ hai bialu ka, lene.
38 Ani layagola Yasuhanda ladai bialu lalu, Dindi maru kaware ngagoria bi mana lawai holiya ma. I̱ ani bule ibirugo, lene.
39 Ani lowa Galili bibahendeni ibaga bialu ngoai hagane anda hearuha puwa Yasu ibugua bi mana lamialu dama daraga hearu wara tagi haga bialu hene.✡ Md 4.23, 9.35
Yasuhanda agali mbira mo dabi henego ogo
(Madiu 8.1-4, Lugu 5.12-16)
40 Ani bialu hearia agali ge hamua mbira Yasu hearia ibuwa ge duli hanga ho biruwa lamialu lalu, Í̠na i̱ mo dabi hoa biyagua nde mo dabi habehe ke, lene.
41 Ani layagola Yasuhanda gubalinime dara howa gi dogola amu howa agali biago ela halu lalu, I̱na í̠ mo dabi hoabago dabi ha, lene. 42 Ani layagola ge hamua ereba hai halu bayale hene. 43-44 Yasuhanda agali biagohondo hongo howa lalu, Ai hale ha. Maru nalami loma binigo mo miaga agali kagome í̠ de hendelo ibu kagoria abale puabo halu pole pu. Ani bialu í̠ dabiore haridago wali agali karume de hendelo walia hole Mosesehanda bi lowini wiyadagua mbirale mbira Ngode Datagaliwabehondo bo mibe, lene.✡ LBM 14.1-32, Mg 3.12, 7.36, Lg 5.14
45 Ani laya handala ibu hale halu agali biagome pialu howa Yasuhanda nalamibe layago donge howa ibugua biyago lamigi bima pene. Ani layagola wali agali bu hearume bi layago hale hai hayagola Yasu ibu tano wiaruha tinaga deni pobe naheyagola wali agali nahaga wiagoria ha dai bu hene. Ani pu hearia wali agali dewa dindi bibahende wiaruha howa Yasu hearia ibugu ibugu bini.
✡1:2: Ais 40.3, Mal 3.1, Md 11.10, Lg 7.27
✡1:3: Ais 40.3, Md 3.3, Lg 3.4, Yo 1.15, 1.23
✡1:6: LBM 11.22, 2 Kin 1.8, Md 11.8
✡1:8: Ais 44.3, Yol 2.28, Ab 2.4, 10.45, 1 Ko 12.13
✡1:11: Pig 22.2, Iba 2.7, Ais 42.1, Md 3.17, 12.18, Mg 9.7, Lg 3.22
✡1:15: Dan 9.25, Md 3.2, Ga 4.4, Eb 1.10
✡1:18: Mg 3.20, Md 19.27, Lg 5.11
✡1:35: Md 14.23, Mg 6.46, Lg 4.42
✡1:43-44: LBM 14.1-32, Mg 3.12, 7.36, Lg 5.14