130
Mbirali ibu Anduane Homogohondo biamogo bia lalu lenego ogo
1 Anduane Homogo-o i̱naga bu miniha gendaore gibi ho howa í̠hondo bi larogoni.✡ Dug 3.55, Yna 2.2
2 Anduane-o i̱na í̠hondo duguore bialu bi larogoni hale habe.
Í̠na i̱ biamogo bia lalu olarogoni hale habe.
3 Í̠na iname ko birimaruni damenego bibahendeore mo ilu wiai ho kele✡ Iba 143.2, Lm 3.20, 3.23-24
ina kamaruni mbira pani nane yo pialu ai pedalebe.
4 Ina mbiraorebi yo napobeheore kamalegoyu✡ Yar 33.8-9
í̠na iname ko beramaru domo wahaga kegoni.
Iname í̠ hondowa giho holoma̱yanaga
ko beremaru í̠na domo wahaga bialu kegoni.
5 I̱ore Anduane Homogohanda biamogo bilo lowa ibuha hana howa miniha didiho haruli.✡ Iba 33.20, 40.1, Ais 8.17, 30.18
Ibugua biamogo bulebero lalu ibunaga bi lo wiyagoria yaniho haabo haruli.
6 I̱ore Anduane Homogohanda biamogo bulebira lowa miniha didiore howa haruli.✡ Iba 63.6, 119.147
Mbiraga mamageali mbira egabi ala la lowa hale gogabu haradagua ndo
i̱ miniha didi gibiore biyagola dugudaga howa yangayangabu haruli.
7 Isaraele wali agaliru-o Anduane Homogo ibugua ina gubalini gibiore haho wiaabo haga kago manda bialu
iname ibuhondo mini mbiraore wialu ibuha hanaho holene nga.
Ina mbira mo ko holani handalu ibugua biamogo biaga kagoni.
8 Ibugua Isaraele wali agali ibuninaga ka lalu✡ Md 1.21, Ta 2.14
tigua ko binidaru domo wahai halu
ti gi mialu haru dai biai haga kagoni.