92
Anduane Homogonaga mini yaraga halu iba gana lenego ogo
1 Anduane Homogo-o í̠hondo ka̱i̱ lolene bayaleoreda.
Í̠ Ngode Datagaliwabe Daligaorene Daliga kegoni lalu
í̠ mini yaraga halu iba gana lolene bayaleore ngagoni.
2 Egerebagi bibahendengi í̠na i̱ gubalini ho haabo kegonaga lolene karulape ogoni.
Mbiraga bibahendengi i̱na í̠ mini bilinahe kegonaga lolebero.
3 I̱na ngida ale tara tararu balu í̠naga mini yaraga holebero.
4 Anduane Homogo-o í̠na biabe hongohe biriru mitangi bialu i̱ turuho kogoni.
Í̠na bayaleore dewa birigonaga
i̱na turuore halu iba ganaru lolebero.
5 Anduane Homogo-o í̠na biabe biriliru timbuniore hongohe biaga ke.✡ Iba 139.17, Ais 28.29, 55.8-9, Lm 11.33-34
Í̠naga miniha mitangi bideru iname manda bibe nahe kamagoni.
6 Wali agali mini nawi karumebi mini giga nabi karumebi
mbirale uru manda nabibehe ka.
7 Wali agali mini kowi bu karu ti datani bu hagagobi ka.
Ko biaga bu karume mbirale ngago damene yu howa homogo ha holebira.
Ani bulebiragoyu ti mo ko hai halu erebaore holebira.
8 Anduane Homogo-o í̠ni kini haluhe haabobo hagaore kegome ti ani bulebira.
9 Agali í̠la waitigiho karu ti homalu
agali mini kowi karu bope hai holeberego ina mandabu kamagoni.
10 Í̠na nogo bulumaga wangabe gabuanaga hongo kaligobi i̱ha hongo timbuni helari.
Í̠na i̱hondo bayale birigonaga turuore ho kogoni.
11 I̱ waitigi bu hearu mo ko hai harigo de handalu
agali ko hearu yiya lalu dugu biayuago hale haru.
12 Wali agali mini tigabi bu karu ti ayage timbuni andaho karubi holebira.✡ Iba 1.3, 52.8, Ais 65.22, Hos 14.5-6
Ti Lebanono irabuha ira tamia bayale timbuni bu karubi holebira.
13 Ti Anduane Homogonaga anda haneni ira hengene mbira haradagua bida.✡ Iba 100.4, 135.2
Inanaga Ngode Datagaliwabe ibunaga andaha howa ti bayaleore holebira.
14 Ti lu ho waheneore heaguabi lini bayale daabo haga kagoni.✡ Iba 1.3, Yo 15.2
Tinaga yuniru gahenge halu
ti hongohe haabo howa gabu nahaga ka.
15 Ti ogonibi kagome Anduane Homogo ibu mini tigabiore kago hendelo mo walia ka.
I̱naga hapai haga kago ibuha lehe mbira nawiore.