14
Hoseahanda Isaraelealiruhondo, Anduane Homogo karia dai bidaba, lenego ogo
Isaraele wali agaliru-o tígua ko birimirume tíni mo pila hayago ai Anduane Homogo tínaga Ngode Datagaliwabe karia dai bulene nga. Tígua Anduane Homogo ibuni karia dai buwa ibunihondo bi ogo loma ale lomialu lolene nga. Tígua ibuhondo bi ogodagua lalimu. Anduane Homogo-o iname mana ko birimaru bibahende domo wahai halu inanaga bi laramaru loma ale lo ngeramago í̠na áyu hale habe. Ai iname abale í̠hondo mana bayaleore bule lalu bi pongobo wirimaru bi ogoni larimadagua bialu í̠naga mini yaraga holeberama. Asiriali karume ina gi mialu pele nangibehe ka. Nogo hosini biruwa wai bu piaga karume ina mo wiabi nabibehe dege ka. Iname mbirale gime wabiniruhondo inanaga Ngode Datagaliwabe kamigoni lalu bi pupu nawuleberama. Anduane Homogo-o ina biamogo bulene mbira naheore waneigini aba ai̱yala nahe hono wahene ale kamago í̠na dara howa biamogo birilidagua bibe lalimu, lalu Hoseahanda lene.
Anduane Homogohanda, Isaraele wali agali holene gahenge yu holebira, lenego ogo
Anduane Homogohanda lalu, I̱naga wali agali i̱ yu wahalu pene uruni lone haru dai bulebero. I̱ninaga bu minime ti gubaliniore howa tihondo keba lone naholebero. Dindi ko yobi iba dalu naibaga ngagoria dalu ibilalu dindi mo gomba hagadagua bialu i̱na Isaraele wali agali mo bayale holebero. Ti ira lini baya tara daraligobi halu Lebanono dindiha ira timbuni karu tinaga pini dindiha anda pialu unuraore pu wahagagobi ti holebira. Ti ira yuniru bayale mbirimbarale howa ira olibe bayale kaligobiore holebira. Ira tamia Lebanono dindi taweme bayale nga biraligobi bialu wali agalime ti turu taraore holebira. Ti ibalu i̱ni baba kagola i̱na ti handayaho holebero. Tinaga mabuha tomorubi gerebi lini daganebi bayale anda haradagua bialu nolene liniru dewa dedaligobi dege holebira. Waini iba Lebanonoha howa dendebiore berelowa mini lene wiraligobi tiore holebira. Isaraele wali agaliru-o tígua mbirale gime wabiniruhondo lone bi pupu nawuleberami. I̱nime tínaga bi laramigo hale howa bayuwa handayaho holebero. Ira timbuni yuni dewahe kago andaneha ni gumba biragadagua i̱ni kogoha ibai holeberami. Tígua bayale bibahende yu kamigonaga tene i̱niore kogoni ndobe, lalu Anduane Homogohanda Hoseaha howa bi ogoni lai hene.
Bi lamaro binigo ogo
Wali agali mini gigabiwi karume mbuga ogoha bi lo wini gilibu ngaru daga lalu manda buwa bu miniha yu tiga bialu talima polene nga. Anduane Homogonaga mana bibahende tigabi dege ngago wali agali mini tigabi karume manda bialu biaga ka. Anigo wali agali mana ko biaga karume bi uruni hale halu donge howa nabiagagome tini pilaga ka. Min 10.29, Dan 12.10, Yo 8.47, 2 Ko 2.16, 1 Pi 2.7-8

14:9: Min 10.29, Dan 12.10, Yo 8.47, 2 Ko 2.16, 1 Pi 2.7-8