12
Anduane Homogohanda biamogo bilonaga bi lenego ogo
1 Anduane Homogo-o í̠na i̱ biamogo bibe.✡Ais 57.1, Mai 7.2
Mbirali bayale mbira naheorego.
Tigabi biaga mbira karia nahondolebere.
2 Wali agali bibahendeme ke̱ dege haga ka.✡Iba 41.6, Yar 9.8, Lm 16.18
Tigua mendeali kago mo guya halu bi ladebodebo biaga ka.
3 Anduane Homogo-o wali agali bi ladebodebo biaga karunaga ne harigabi
mine haga karunaga hégebi
bibahende bo ndibu lai habe.
4 Wali agali ko biaga uruni tigua lalu,
Inanaga hégeme wayali holeberama.
Inanaga ne hambu anduane aibe.
Ina handayaho haruago aibe, laga biaga ka.
5 Anduane Homogo ibugua lalu,✡Iba 10.18, 34.6, 35.10, Ais 33.10
Ko biaga bu karume yagibano karu hengedape hayadago hondowabi
burupale karu ti dugu biaruago hale howabi
i̱ni abale ibulebero.
Tini bayale holenenaga maliaho karu
i̱na ti ogoriani mo helolebero, laya.
6 Anduane Homogonaga bi lo winigo bibahende heneneore lo nga.✡Iba 119.140, Min 30.5
Ibunaga bi bayaleore laganego
siliba irani ka halu delene ngarale ngaligobiore ngagoni.
7 Anduane Homogo-o í̠nime ina bu kamaru✡Iba 37.28, 97.10
baya hangu de handayaho habe.
Ko biaga karume ina mo ko holigo
í̠na ina baya hangu mamageho haabo habe.
8 Ko biaga karu tigua dindi bibahendeha mine halu ibaga biame haga ka.✡Iba 55.10-11
Wali agali bibahende karume mana ko bulenego hame lowa
mana ogoni bayaleda mitangi biaga ka.