8
Yasu inanaga Loma Binigo Mo Miaga Haguane Timbuni kago ogo
Bi o larimaruni irane inanaga Loma Binigo Mo Miaga Haguane Timbuni ogonibi kago dahuliya andaga howa ibu Ngode Datagaliwabe Daligaorene Daliga kagonaga haru howa biragane gi tigahayagi beda lalu larimagoni. Iba 110.1, Eb 1.20, Kl 3.1, Hi 1.3, 3.1, 10.12, 12.2 Yasu ibu Loma Binigo Mo Miaga Haguane Timbuni howa Balai Andaha Loma Bia Heneore Hobane heagoria howa biabe bialu ka. Balai anda henene ogoni agalime bini ndo Anduane Homogohanda helenego ka.
Dindini howa loma binigo mo miaga haguane timbuni mbira mbira ha aribia hagarume Ngode Datagaliwabehondo mbirale tara tara bu milobi nogo tara tara bo loma bialu milobi dabo helaga. Ani biagago inanaga Loma Binigo Mo Miaga Haguane Timbuni kago ibuguabi Ngode Datagaliwabehondo mbirale bo mulene nga. Eb 5.2, Hi 5.1, 9.14 Yu wali agalinaga Mana lowini ngadagua loma binigo mo miaga karu tigua Ngode Datagaliwabehondo mbirale lomabu mialu kagoni. Ani bialu kago Yasu ibu áyu dindini kale ibu loma binigo mo miaga holene nawidale. Loma binigo mo miagame dindini howa bialu kagoni dahuliya andagani biagane tene ibuni ngagonaga manane ale bialu ka. Ani bialu kagoni Mosese heneyangi ogonibi dege wini. Ani winigo Mosese ibu Balai Anda bule manda biyagola Ngode Datagaliwabehanda ibuhondo lalu, Hari Sainaini howa walia harudaguaore bibahende biai holene nga manda bibe, lene. Har 25.40, Dag 8.4, Ab 7.44, Kl 2.17, Hi 9.23 Anigo áyu tinaga loma binigo mo miaganaga biabe bulene miyago nira lowa Yasu ibunaga loma binigo mo miaga biabe daligaore nga. Ogonidagua dege Ngode Datagaliwabela wali agalila Yasu ibugua dombegua howa bolangua holenaga habo nalolene bi mo hongo ho lowinigo nga. Bolangua holenaga habo nalolene bi ogoni tene Ngode Datagaliwabehanda, Wali agali mo bayale holebero, lalu lowinigome nga. 2 Ko 3.6-9, Hi 7.22, 9.15
Habo nalolene bi pigane lowinigo karulape lowinidale nde habo nalolene bi halu mende lowulene nangale. Hi 7.11, 7.18 Anigo Ngode Datagaliwabehanda ibunaga wali agali karunaga ko mbira wiago hondowa ogodagua leda, Yar 31.31-34
Anduane Homogohanda lalu,
I̱na habo nalolene bi gahenge Isaraele wali agalibi Yuda wali agalibi tihondo lo wuleberogo
ogonaga horo kaware ibira.
I̱na bambaore tinaga mamali Iyibini howa ti gini yalu haru tagira pirungi ala tawenaga habo nalolene bi lo wiru.
Ai gahengenaga habo nalolene bi áyu lo wuleberogo ala tawenaga biagobi ndo lowulebero.
Ala tawenaga lowirugo tigua nabiyagola
i̱na ti handaya nahe yu pe haru.
10 I̱na horo mani ibulebiragonaga Isaraele wali agalihondo habo nalolene bi lo wuleberogo ogo, Anduane Homogohanda lene. Seg 8.8, Hi 10.16
I̱na i̱naga bi lowini ngoruni tinaga miniha mo wialu
tinaga bu habaneha gili bule dege bero.
I̱ tinaga Ngode Datagaliwabe holebero.
Ti nde i̱naga wali agali holebira.
11 Isaraele wali agali uruni tigua tinaga nenegealiruhondobi
ti dameneruhondobi lalu, Ais 54.13, Yo 6.45, 1 Yo 2.27
Anduane Homogo manda bia, lalu lawai holene nawulebira.
Ogoninaga irane ti bibahende emene karumebi timbuni karumebi
i̱ manda biai ho holebira.
12 Ani bulebirago i̱na tinaga ko biyaru domo wahalu Lm 11.27, Hi 10.17
tigua nakarulape biyarubi mitangi bia dai nabulebero,
lalu lene. 13 Ngode Datagaliwabehanda habo nalolene bi gahenge laragonime habo nalolene bi bamba lowinigo mo haragaya helara. Mbirale mbira haragaya hayagua abale togo bialu ereba holebira.

8:1: Iba 110.1, Eb 1.20, Kl 3.1, Hi 1.3, 3.1, 10.12, 12.2

8:3: Eb 5.2, Hi 5.1, 9.14

8:5: Har 25.40, Dag 8.4, Ab 7.44, Kl 2.17, Hi 9.23

8:6: 2 Ko 3.6-9, Hi 7.22, 9.15

8:7: Hi 7.11, 7.18

8:8: Yar 31.31-34

8:10: Seg 8.8, Hi 10.16

8:11: Ais 54.13, Yo 6.45, 1 Yo 2.27

8:12: Lm 11.27, Hi 10.17