45
Kini ibu wali dabu biyangi iba gana la henego ogo
1 Bi bayale maru i̱naga miniha yu ko.
I̱na iba gana ogoni podo yuwa kini kagohondo mulene manda bido.
Beba bayale gili biaganaga peni ale howa
i̱naga hégeme bi bayale lalu ko.
2 Í̠ agali bayaore kegoni.
Agali mende í̠ ale naheore.
Í̠na bi laga biriligo baya tigabiore larili.
Ngode Datagaliwabehanda í̠ mo bayale halu haabo kagome
í̠ ogonibi kegoni.
3 Í̠ kini timbuni hongoheore kegoni.
Í̠ baya burugule tara howa mini lene timbuni kegoni.
Í̠naga wai biagane ayu tibu yaganeha yuwa
wai bule manda manda bu habe.
4 Í̠ kini dunini mbira mini leneore kegoni.
Í̠na henene lolene ngagobi
mana tigabi dege bulene ngagobi
ogoni wayali helonaga wai bule í̠naga nogo hosini biralu pobe.
Í̠na wai hongo howa beregome í̠ni wayali holebere.
5 Í̠naga timu de bi̱a̱o̱le ngerume
waitigi bu karunaga gubalinini bolomogo biaga ngegoni.
Í̠na dindi tara taranaga hameigini karu baba wai bialu
bope haregola ti í̠ andaneha hai holebira.
Wali agali í̠na hondo hene karu
mana tigabi ngagoria helo haru haga kegoni.
7 Í̠ mana tigabi bulene ngago hamelowa✡Iba 11.7
mana ko ngago manga haga kegoni.
Irane ogoninaga í̠naga Ngode Datagaliwabe ibugua í̠ dabo helene.
Dabo helalu kini maru karu turu hagadagua ndo
ti bolangua halu í̠naga haguaneni weli odo wiyagola
í̠ mo turu taraore ho helene.
8 Í̠naga aga bayale luni biagimbu bu kegoni
nga baya taraore mini muwe kasiala ngabini mbauleda.
Kini andagaru nogo elebeninaga ne gayaneme mo yáribia halu
anda uruniha tigua í̠ mo turu holenaga ngida aleru lalu kagoni.
9 Kini waneru wali mini lene berearu heba í̠ andagaha biru hayua.
Í̠naga gi tigahayagi kuini wali ibu bedagoni.
Ibu ngolo Obira dindi tawame yári wabini ngaru karulo beda.
10 Kini one wandari mabuage-o
i̱na bi o larogo hale halu manda bibe.
Í̠ damene bu karubi wali agali maru bu karubi mitangi budai nabibe.
11 Í̠na ogonidagua bialu í̠ wandari bayaleoreda de hondowa
kini ibugua í̠ gubalini timbuni ho holebira.
Ibu í̠naga agali haguane ka manda buwa
í̠na ibunaga bi larago hale halu birulene nga.
12 Taia wali agali bu karume
í̠ mo turu holene aleru yalu ibulebira.
Wali agali homogo karumebi í̠ mo turu holene marubi yalu ibalu
í̠hondo mulebira.
13 Kininaga wandari mabuage biago kini andaga tamu hobaneha bedago
ibu baya gibiore mbira bedagoni.
Ibu aga baya taraore pu ngolo aleme wabini mo karulo bedagoni.
14 Wandari o biago ibu aga baya taraore ogoni karula howa
tigua ibu kini berearia haru halu piya.
Wandari maru ibu baba biraga berearubi
ti haru kini andaga pole haru piya.
15 Tigua turu timbuni halu bu miniha dungulo howa
kini andaga anda piai haya.
16 Kini-o í̠ igini dewaore holebiraru
tigua í̠ mamaliru henedagoria kini ha aribia holebira.
Í̠na ti mini leneore helowa
tigua wali agali dindi bibahendeha karu haru helo helolebere.
17 Í̠ mini lene timbuni kego lalu i̱na iba gana ogoni latagi harogola✡Iba 138.4, Mal 1.11
wali agali mani holobadarume
í̠ mitangi biaabo holebira.
Ani mitangi bialu wali agali bibahende bu karume
í̠naga mini yaraga ho haabo holebira.