1 Yasuhanda laabo halu lalu, Ngode Datagaliwabehanda tí beramigo daba ki nabilo tígua wali agali marume biragobi daba ki nabilimu.✡Lg 6.37, Lm 2.1, 1 Ko 4.3-5, Ya 4.11-12 2 Tígua wali agali marume birago hondowa daba ki beramilidagua Ngode Datagaliwabehanda tígua beramigobi hondowa daba ki bulebira. Tígua wali agali maru hondowa ti bulene nabulene bi ogo lalu lo weramilidagua Ngode Datagaliwabehanda tí hondowa ani dege lo wulebira.✡Mg 4.24 3 Anigo tígua tí hamenenaga deni kugi emene ede ngago laramiligo tíninaga deni ira goba ale ngago mitangi nabi howa laramiligo agibe.✡Lg 6.41-42 4 Tígua tíninaga deni ira goba ale wu kamigo dege howa tí hamenehondo lalu, Í̠naga deni kugi emene ede ngago mero, lalu agua labehedabe. 5 Tí tombene hondo kihe kamigoni. Tíninaga deni ira goba ale ngago ala mo wahowa mani tí hamenenaga deni kugi emene ngago bayuwa handalu mibehe holeberami.

6 Mbirale Ngode Datagaliwabehondo loma bia ho ngago tígua biangohondo namilimu. Mirimiyagua nde biango biarume beregedalu tí porabu para howa hayulebira. Tínaga gele mini pealo baya gibi ngamiru nogo ngui ngagoria ba amu nahalimu. Ba amu harimiyagua gurubu gele ale baya gibi biaru nogo geme hengedolebira.✡Md 10.14

7 Ngi, lalimu. Ngi, larimiyagua tígua yu holeberami. Tai bialu halimu. Tai bialu harimiyagua handa walia holeberami. Panga dugua, lalu halimu. Panga dugua, lalu kamigola tíhondo panga dugua holebira.✡Yar 29.13-14, Mg 11.24, Lg 11.9-10, Yo 14.13-14, 15.7, 15.16, 16.23-24, Ya 1.5, 1 Yo 3.22 8 Ogoninaga bibahendeme, Ngi, lalu karuhondo miragola yulebira. Tai bialu karume handa walia holebira. Panga dugua, lalu karuhondo panga dugua holebira.✡Min 8.17, Yar 29.12-13, Lg 11.10, Ya 1.5, 1 Yo 3.22-23, 5.14-15 9 Waneigini aba kamiru tí iginime, Hina mbira ngi, layagua mbiralime ege to̱le̱ dugu muleberamibe.✡Lg 11.11 10 Ai ibugua, Wena mbira ngi, layagua tí mbiralime nogombi minu muleberamibe. 11 Tíni ko howa tí waneiginihondo bayale dege mulene manda bu kami. Ogonidagua ndo bolangua howaore tí Aba dahuliya andaga kagohondo mbirale ngi laragola o laragohondo Ngode Datagaliwabehanda bayaleore dege dege mulebira.✡Lg 11.13, Ya 1.17

12 Wali agali marume tíhondo bilo hame laramilidagua nde tígua maru biaruhondo ani dege bilimu. Mosese heneyangi Mana lowinigohabi Ngode Datagaliwabe mana latagi haga henerume bi lawai henegohabi bi uruniha mana ogoninaga tene bulene lo nga.✡Md 22.39-40, Lg 6.31, Lm 13.8-10, Ga 5.14, 1 Ti 1.5

13 Anda polene panga haraba dorogone ngago ogoniha anda pilimu. Heli dindi anda polene panga haraba yangale nga. Panga haraba ogoni ngagoria polene hariga taibi ndo awadaga ngagoni hondowa wali agali dewaoreme hariga ogoriani pialu ka.✡Lg 13.24, Yo 10.7-9 14 Holene gahengeore mule anda polene panga haraba dorogone nga. Ani ngago panga haraba ogoni ngagoria anda polene hariga taibiore ngago wali agali mbira mbira hangume hariga ogoni handa walia haga ka.✡Ab 14.22

15 Ngode Datagaliwabe mana henene ngadagua ndo latagi haga agali karu de hondowa mamage halimu. Tigua tí kamigoria ibalu dongoneni nogo sibi dambole ale howa miniha ti biango duduore ale ka.✡Ese 22.27, Md 24.4, 24.24, Mg 13.22, Lg 6.26, Ab 20.29, 2 Pi 2.1, 1 Yo 4.1 16 Tígua ti mana birago hondowa tioreda manda buleberami. Mamunali anihe ale kagome pu mbira mini gerebi lini nadaga ka. Mamunalime pogoli nadaga ka.✡Md 7.20, 12.33, Lg 6.43-44, Ga 5.19-22, Ya 3.12 17 Ira bayale kagome lini bayale daga ka. Ogonidagua dege ira ko kagome lini ko daga ka.✡Yar 11.19 18 Ira bayale kagome lini ko nadabehe ka. Ogonidagua dege ira ko kagome lini bayale nadabehe ka.✡Lg 6.43 19 Ira damene lini bayale nadaga kago ani nadaragola ira uruni dibuwa ira dedagoriani delolebira.✡Md 3.10, Lg 3.9, Yo 15.2, 15.6 20 Anigo tígua Ngode Datagaliwabe mana henene ngadagua ndo latagi haga karume mana birago hondowa tioreda manda buleberami.✡Md 12.33

21 Bibahendeme i̱ olowa, Anduane-o Anduane-o, lalu karu Ngode Datagaliwabehanda Handame Ho Kagoria anda piai naholebira. I̱ Aba dahuliya andaga kago hame ledadagua bialu karu ti degeme anda polebira.✡Hos 8.2, Md 21.31, Lg 6.46, Ab 19.13, Lm 2.13, Ya 1.22, 1.25 22 Daba Ki Bulene Horo ibirangi wali agali dewalime lalu, Anduane-o Anduane-o í̠ minini howa iname Ngode Datagaliwabenaga bi mana latagi harima. Í̠ mini lalu iname dama dewa wara tagi halubi agalime nabiagane ale dewa bialubi harima, lolebira.✡1 Ko 13.2 23 Ani laragola i̱na tihondo lalu, I̱na tí manda nabialu nabido. Wali agali mana ko hanguore mo tene haga kamiruni tí i̱ denguini nahe puabo hadaba, lolebero.✡Iba 6.8, Md 10.33, 13.41-42, 25.12, 25.41, Lg 13.25-27, 2 Ti 2.19

24 Anigo i̱na bi o larogoni hale halu bialu kagome ibu agali mbira mini gigabiwime ege to̱le̱ni anda biyagoni ale ka.✡Lg 6.47-48 25 Anda ani biyagola dalu timbuni ibalu howa iba li piyagome dindi namu layagolabi puyabume anda biagoha hongo howa pu la anda hayagolabi anda ege to̱le̱ni ho ndibu lenegome poda nabi hene.

26 I̱na bi larogoni hale halu bia nabi kagome ibu agali mini nawi howa iba muni anda biyagoni ale ka. 27 Anda ani biyagola dalu timbuni ibalu howa iba li piyagome dindi namu layagolabi puyabume anda biagoha hongo howa pu la anda hayagolabi anda podaiore hene. Ani podo ibira halu u emene agima ndo lowa kulu ndugu lalu podope hene.

28 Yasuhanda bi uruni bibahende lai hayagola wali agali dewaore bu hearume ibugua taraore lawai hayago hale howa mogo lai hene.✡Mg 1.22, Lg 4.32 29 Mana lowinigo lawai haga hearume lawai hagadagua ndo ibugua hongo taraore howa lawai halu hene.✡Yo 7.46