87
Yarusaleme tano mo yaraga halu iba gana lenego ogo
Anduane Homogo ibugua ibuninaga tano mbira hari hombene loma bini winigoria bini.
Ibugua Isaraelenaga dindi maru bu ngaru gubalini ho kagobi ndo
Yarusaleme tanoore gubalini timbuniore ho kagoni.
Ngode Datagaliwabenaga tano odagoriani wali agali bu kamiru-o
Ngode Datagaliwabe ibugua tí lalu bi baya turubioreru mbira laga birago hale halimu.
 
Ngode Datagaliwabe ibugua ogodagua laya.
Wali agali i̱naga bi larogo hale halu biaga karu damenego dagalama porongi
i̱na Iyibi wali agalibi Babilonia wali agalibi dagalamaga dege holebero, leda.
Pilidia wali agalibi Taia wali agalibi Idiobia wali agalibi
uruni tibi Yarusaleme wali agali heba dege dagalamaga holebero, leda.
 
Yarusaleme tano lalu agua lolebira.
Hameigini tara tara paluyu pedaru
ti bibahendenaga dindi duniniore ogoni holebira, leda.
Ngode Datagaliwabe Hongo Haiheore kagome Yarusaleme heyu helalu
dindi ogoni hongoheore helo mo hongoho helolebira.
Anduane Homogo ibugua wali agali maru dindi tara tarani karunaga minibi gili buwa
Yarusaleme wali agalinaga minibi heba gilibumaga howa daga lamaga holebira.
Yarusaleme wali agali bu karume turuore howa iba gana lalu,
Iname mbirale bayale bayale yu kamarunaga tene Yarusalemeha ngagoni, lalu holebira.