1 Wali agali dewaoreme muni bolangua ho mule manda biragome mana ko biaga nga. Wali agali mini dewawi homogo hayagua tinaga biabeha yagi ko biruda bayale biruda lo manda nabulebira. Ti biyanaya biabe dege bialu holebira. 2 Ege t-ole̱ ngagoha nduli baanda hariyagua nde lone dugu yamibe nahe hongo halu ndibulo wahaga nga. Anidagua dege mana ko ngago biyanaya biabe biaga kagoha hongohe para ho wahene nga. 3 Wali agalime Anduane Homogonaga bi mana lo ngago hongo howa talialu holene manda nabiyagua nde tini heba tinaga damene kago bibahende abaleore mo ko hai holebira.

4 Iba hambu yuwa ibaha dodo bedago mo wahole biyagua nde ibaha dodo maru berenedane handa walia hagane nga. Anidagua dege wali agali mbira kago baba lai larebingi ko ibuha padago panaga tagira ibagane nga ndobe. 5 Be gahange dindime wabini ngagonaga hongo ira deneme bahandagane nga. Anidagua dege agali ngoai ho biruwa tininaga mini bahandaga tandaga biaga. 6 Ira tara tara kagobi tinaga linibi tara tara dagane ka. Anidagua dege wali agali bu karu tinaga mini ngadagua latagi haga haga biaga ka ndobe.✡Md 7.17, 12.33, Lg 6.44 7 Í̠na wali agali mbira kago mo turu halu bi bayale loleyagua nde tinaga mini ngago ala begelo hondolene nga. Wali agali ko bayale lalu mo tale bulene hariga urunibi nga.

8 Í̠na mana tigabi mo yulenaga taya bialu hariyagua nde henene larogo handa walia holebere. Ani mo yu kegola ibugua í̠ aga bayale ngagome yaribia haradagua bulebira. 9 Ega mbiraorego ale ti mo mogo buwa mbiraoreni biragone. Anidagua dege mana tigabi bulene ngago wali agali tigabi biaga bu karu ti baba hagane nga. 10 Laiono gabua bedaru tigua nogo bolenaga ohowa ibulubadagoria yu biragane nga. Anidagua dege mana ko bulene ngagome wali agali mana lehe biaga bu karu minule ohowa harigani yu biraga ngago ndobe.

11 Wali agali Anduane Homogonaga bi mana hale haga karume tinaga bu mini bayale ngagobiore latagi holebira. Anigo wali agali mini tiga nabi karu tigua egeme ho iriari biagadagua bulebira. 12 Wali agali bayale ndo mana lehe biaga bu karu baba haga hariyagua ti wahalu polene hariga taya bialu habe. Anigo wali agali mini bayale gigabiwi baba birariyagua nde karulapego birabe.

13 Wali agali mini tiga nabi karume bi ko nalolene ngago laabo halu tininaga mana ko biragonaga te lalu oba halu haga ka. 14 Wali agali ko uruni aleme bi laragola wali agalinaga tingini pandi hinalu agali ko kagome keba howa lai larangi wali agali maru bu karume bi hale holino tinaga hale paiho haga ka. 15 Wali agali mine haga bu karume lai laabo halu mbirago darama dalira handala wahaga. Tigua lai larago bi ko ngubiore laragola wali agali maru karu ti hale habe manga halu piaga.

16 Wali agali mbirame bi ohowa lene ngago bibahende hale hai helo latagi hayagua nde wali agali bu karume ibuhondo henene laga ka lo manda nabulebira. Ani bialu ibu nenege holene mbira lone mani handa wali naholebira.✡Min 20.19, 25.9 17 Í̠naga nenege kago gubalini halu kaware haabo holene nga. Anigo í̠na bi libuni hangu ohowa lene ngago hale hai helo latagi hariyagua nde ibu kagoha lone talima napobe. 18 Agalime ibunaga waitigi kago homelo bo wahagadagua í̠na libu mani bayale hama polene wiago í̠na mo ko harigoni ndobe. 19 Wali agalime ega bedago giha pogo lalu minu yanigo poragola lone bedaria handa nabiagadagua í̠naga nenego biago lone dai bule ndo pu wahayagoni ndobe. 20 Ainde í̠naga nenege biago nogo gabua timu ho yalu ibida pu wahagadagua ibu ibida puabo hayago ainde í̠na ibu lone haruru talima napobe. 21 Dere bidago kabu bulene karulape wialu keba haribigo hadalu gi tigani bulene ngago ainde bi ohowa laribigo hale hai helo latagi hariyagua nde ogoni lone mo tiga bulene nawiore.

22 Wali agali mbira kagome bi nale í̠hondo debia hayagua nde ogoni galone tara ndo mbirale ko bule hangu debia holebira. Ani biaga kago mbiralime ibunaga mini ngago mo beregedabe naheore ka ndobe. 23 Wali agali ogoniale kagome í̠la haru mandagi te lalu í̠la bi bayaleru lalu biruwa í̠naga bi larego damene baya hangu mo yari bia howa lalu birulebirago ainde mani howa ibu te taraale lalu bi í̠na larigo mo beregedalu í̠ni mo ko holene bi ngago lo aribia holebira. 24 I̱na handabe manga hagane dewaore ngago ngelowa wali agali uruniore handabe manga timbuni haruli. Ani bialu Anduane Homogohandabi ti handabe manga ho ka.

25 Ege to̱le̱ mbira baraga hariyagua lone dai bialu í̠ninaga emboneni bedelabaga bulubira. Ani biragola dere timbuniore bu holebere. 26 Mbiralime dindiha gabua uli tombayagua nde tini uli ogoniha pilolebira. Mbiralime gono wiyagua nde ibuni gono wiyagoha dai bialu ibuni do wulebira. 27 Wali agali mbirame mendeali kago mo ko hole karia ibugua bule wiyago lone beregedalu ibuniha dai bialu mo ko haragola mo ko holene ogoni agoha howa ibiyabe toba halu handa nabulebira.

28 Wali agali mine haga bu karume mege dewa bialu bi ko ngaru ta nabi laabo halu haga ka. Anigo tiore laiono nenda biaho berelalu nogome pogolalu pu nabiaga ngadagua tigua yolo ko taraore mo yulene ngago ngelalu napolebira ndobe. 29 Wali agali maru ti wali agali bayale tigabi bu karu pi larago hondole karu tinibi nde yo pialu pu nabi tihabi mo ko holene anda ibulebira dege. Ti homa nabi kangi dege tandaga timbuniore nalu holebira.

30 Mana ko ngubiore kira wali agali mana ko biaga bu karu tiha nga. Ogoni keba holene bu miniha tandaga holenela kira nga.