1 Horo ogoningi wali agali mana bayale ngago talialu haga karu tigua abale wali agali ti mege bialu handape manga haga biarunaga deni heyu holene gi nahe holebira. 2 Wali agali ko biaga tigua agali uruni ti bayale holobada manda nabi hene. Ai ti bayale henedago hondowa mogo lowa tini duru lalu holebira. 3 Ani howa ko tini biyago dara howa mini burugu timbuni lalu ti dege dege laedene bialu lalu, 4 Wali agali iname abale mege bialu tiha galone naheda lo manda bu harimagoni. Ainde ina lulu timbuni yu harimada. Tigua mana bialu karu iname leheoreda lo manda birima. Ani bialu ti homayagola iname uruni ti dara halu dugu nabi harima. 5 Anigo áyu ti kago de handadaba. Ti Ngode Datagaliwabe waneiginiore howa ti wali agali Ngode Datagaliwabenaga karu heba mandagi kago handadaba. 6 Áyu ina manda bidamagoni. Iname bia ko howa mana tigabi wiago talialu naharima. Ina ko aruma holene wiagoha pupe halu harima. Mana tigabinaga hariga polene wá ibiyagola mo walia hayagohayagi nape harima. 7 Iname mana ko bulene hariga tara tara wiaruha pu pebe bialu howa mbirale wiaru dewa mo ko hai harima. Hariga piaga ndo wiagoha ina pialu harima. Anduane Homogohanda hariga ina poloma̱ya hamelo heagohayagi nape haabo harima. 8 Ina mbirale dewa wu howa karulape kemabe toba howa taraore kemagoni lo manda birima. Anigo ainde mbirale urunime áyu ina biamogo nabiore ngagoni ndobe. 9 Ai mbiralime bi laruago áyu dege hale halu embeda haramalidagua mbirale yu harimaru abale ereba hai hayagoni ndobe.

10 Mbirale uruni agoha piyabe tobane pu wahalu ibani iba sibi pu porane handa hendedemago pu ereba halu agoha piyabe toba hagadagua mbirale yu harimaru ereba hai hayada. Ibu piyago ge ngane nahondolebereore. 11 Ti ega mbira harini yagaloyu piagadagua piya. Egame pilipulu lalu yagaloyu porane handarego agohayagi piyadabe hondole ge handabe nahe haga. 12 Ani bialu yandare bo pelalu bole manda biyagoha bo pelagane. Bo pelalu ibu hariga agua piyabe ge handabe nahaga nga. 13 Inabi nde mbirale manane o larurunibi harima. Ina ai̱yahanda taba hanayangi howa hama ibininaga ina dindini tigi mbira hangu howa ho lu naberemali. Mana ko bulene inaha wua to̱ leagola iname mana bayale bulene wiago nabi harima. Ani birimagome ai wali agali tigua hendelonaga inaha manane bayale mbira nawiore kemagoni, lolebira.

14 Maru ko biaga karume mani mbirale bayale mbira tagira ibilonaga malia ho nahaga ka. Anigo tigua mbirale mbira tagira ibilo malia ho hayago bame malia ho wahaga ka. Tigua hamelo hagane ngago damene galone nabulene bame datani puriabume puloyu ibagabu hagagobibi iba hangodo iba solowara yaribu biragola bame ti̱ta̱lahole biagagobibi ira hagua puriabume puloyu purogo lagagobibi ka. Mbirali dindi kaundiaha howa ibu henego ibuni dalu dai biragola mbiralime manda biaho wia nabi embedaho wahagagobi ka.

15 Ai wali agali tigabi heneru ti haabobo bu kagola Anduane Homogohanda ti mo turu halu yolo mulebira. Ngode Datagaliwabe daligaore kago ibugua ti baya hanguore handaya ho haga ka. 16 Ani bialu ibu ti heba mandagi haabo howa ibunaga gi hongo gibihe kagome biamogo biaga ka. Ibugua ti dababagi ho helowa yolo baya taraore mulebira. 17 Anduane Homogohanda waitigi bope holenaga hongo timbuni howa bope haga ka. Ani bialu howa mbirale bibahende ibunime wabini ngaru bibahendehondo ibuni biamogo bialu wai bule ibidaba laga ka.✡Eb 6.11-17 18 Mana bayale bulene ngago ibunaga aga giambe hongohe wabini ngago ale halu mana tigabi bulene ibunaga manda giambe hongohe wabini karulo haga ka. 19 Mana dodo nahe hogorale bulene ngago humbi ale yu haga ka. 20 Ibunaga bu miniha keba holene wai biagane ayu tibu nene kirabaliha gadele nga. Ani kago ai mbirale bibahendeore ibugua wabini ngaru damene ibuni baba mandagi tidiyu howa waitigi lulu mana bialu haga karu baba wai biaga ka. 21 Timu bolebirago baya hangu bilina howa agalime bagadagua ibunaga timu hari daba waga laradagua bialu waitigi karu bai haga ka. 22 Anduane Homogohanda keba timbuniore howa ibugua dalu dindiguni timbuni ege to̱le̱ ale hariha howa bape halu waitiginaga embone tuguda hole bialu baga ka. Ani bialu iba solowara timbuni bedarume yaribu timbuni hongohe bialubi iba pedaruni iba li timbuni wialubi waitigi bibahende karu bu dambi hai helaga ka. 23 Puriabu timbuni hongohe mbira ibalu waitigi bame datani yobi ngaru hilo yu piagadagua bilolebira. Wali agalime mine howa Ngode Datagaliwabenaga bi mana mo wahaga karu pani nelo mulenaga uruni bulebira. Tininaga mana ko biaga ngagome dindi bibahendeha mo ko holene yu anda ibiragola dindi hobane tara tara bi tara tara lagalaga biaga ngaru bibahende bo haelatogo lai holebira.