1 Ai one agalinila libu waneigini mbira naheore heagua nde libu ogoninaga genda holene nawi. Tigua mana bayale ngago bulenaga dege mini burugu lalu holene nga. Ani larogo irane Ngode Datagaliwabehandabi wali agali bu karumebi tigua mana bayale birago dege turu howa handaragome tinaga mini ereba nahe wiaabobo bu wulebira.✡Sir 16.3 2 Mbirali ibu mana bayale ngago talialu hayagua nde mendeali kagome mana bayale ibugua birago talialu bulebira. Anigo mbirali ogonidagua bulene naheyagua nde tigua dugu bialu howa taya bulene nga. Mana bayale bulene ngago ibu dewali gerai lagalaga buwa bolangua harago ibu yolo bayale mo ko naholene ngago mo yu hagagobi nga.

3 Wali agali mana ko biaga bu karume waneigini dewaore hono wu ha hayaguabi waneigini uruni habane nabulene bame yagibano bu holebira. Waneigini hono wahene hariga bame holebadaruni ti ira mbira ibunaga pini dindiha anda nape howa hongo nahe bame ula a̱i̱na̱i̱ bu hagagobi holebira. 4 Marungi nde ira ogoni alego yuni dewaore karia puriabu ibalu pula amu nana biragola yuni genda halu iradago podagane. 5 Ira ogoni wene podape haragola gene magane maru ira wene gahange ngaore lebolahole biagane nga. Lini nolene ale dedagobi boga nabi wene dedaore podaragola lini dedago bayale nabehe ndo bame gilahole bulene daga. 6 Ainde mana wali agalime bialu hayaru mo tale bulene harangi waneigini harigani bu holobadaruni tigua ti aba ai̱yalame mana ko ogodagua biya lalu lapani hagane holebira.

7 Wali agali tigabi biaga kago ibu wene wandari igiri daliahe kangi homayaguabi ti pialu Ngode Datagaliwabela mandagi ha̱lo birulebira. 8 Agali waheore karu ti mini lene kago irane agimedabe. Ti mali dewaore hayagome dabe. Ani ndoyago. 9 Wali agalibi mbirago ibuha mini manda baya wu howa mana tigabi ngago talialu hayagua nde ibubi agali wahe mali dewaore biralu homayagobi dege holebira. Wali agali ogonibi kago ibu mini lene holene karulape ka.

10 Bambaore agali mbira heneya. Ibugua Ngode Datagaliwabenaga bi hale howa talialu haga heagola Ngode Datagaliwabehanda ibu gubalini timbuni ho haga hene. Ani howa agali ogoni ibu wali agali ko biaga bu hearu ti dege dombeneha hearia Ngode Datagaliwabehanda ibu dahuliya andagaha helo haru pene.*Agali hene ledagoni Inogo manda bialu lene. Te ogoninaga mbuga Pigane Binigo ngagonaga Be 5.21-24 ngago handabe. 11 Ngode Datagaliwabehanda wali agali ko biagabi ke̱ hagabi hearu baba helo hame nalene. Mana tigua biragome ibunaga mini mo luluya habeheyane hondowa ani bini.✡Pig 5.21-24, Sir 44.16, Hi 11.5 12 Ainde wali agali bayale kagome tinaga mini mana ko bulene dewa bu ngaruha haru ibaga bilo hayagua nde tigua mana bayale tigabila ko bulenela mo tale bibe nahe haga. Ani howa tinaga mini libilabale hai haga. 13 Tigi mandi hanguni agali ogoni ibu bayale tigabiore hene. Ani howa agali waheore maru ti bayale tigabiore holenenaga li hama ibini wiaru ibugua bolangua hai hene. 14 Mana ibugua biaga wiaru Anduane Homogohanda hondowa karulapeoreda lo manda bu hene. Ani heago hondowa Ngode Datagaliwabehanda ibu dindi kaundia wali agali nahaga wiagoha haru puwaore hene. 15 Wali agali bu hearu tigua de handa hondowa dege tigua ogoale biyada lalu galone manda nabi howa tinaga gubaliniha nogoba nahe hene. Ainde Ngode Datagaliwabehanda ibunaga wali agalihondo gubalini ho howa ti dara holene irane nawini howa dara halu handaya ho haga kago ti manda nabiore hene.

16 Wali agali bayale homayaru tigua ko biaga dindini karu tigua ko biya lalu tigua mana ko bialu ka lalu godini lapani holebira. Wali agali ko biaga karu ti waheore haragola mana bayale tigabi wandari igiri daliahe bu karu tigua mana bayale tigabi bialu kago hondowa ti taga timbuni holebira. 17 Marungi nde wali agali mini gigabi wu howa tini wene daliahe dege kaore homaga. Ai wali agali ko karu tigua wali agali tigabi uruni homarago Ngode Datagaliwabehanda urunihondo ogoale bule ka lo manda nabiore ka. Anidagua birago Anduane Homogo ibunaga mana ngagome wali agali tigabi uruni ibu dalu dindi bayale genda tandagabi nawiore ngagoria haru polenaga biaga ngago ti manda nabiore ka. 18 Wali agali mana ko biaga bu karume wali agali tigabi karu homaragola tigua mege bialu oba halu haga ka. Anigo ai hondo harene. Mani Anduane Homogohanda wali agali ko biaga bu karu ti homaragola ibugua ti hondo oba haragola ti taga tene hondolebira. 19 Ngode Datagaliwabehanda ti dindiha bope haragola tinaga bi lone lolene nawulebira. Ibugua ti he̱lo waharagola ti mo ko howaore pilo gingirulobaga bu wulebira. Ani wuwa tandaga tara nalu wulebira. Ti homaragola wali agalime dara howa dugu nabulebira. Wali agali maru homayaru tiguabi nde uruni hondowa hondo oba halu haabobo bu holebira. Ti homedaha wali agali maru bu karume ti mitangi bu haabo naholebira. 20 Ai Ngode Datagaliwabehanda mana ko tigua bialu hayago manani howa mo tale birangi tiha ko wiyago panaga ona angalo payabu ngagola tini hondowa gi timbuni howa durulalu holebira.