Bian näkä gwägu taŋi bämopiken kädet täwitkut.

17 Ude täŋpäŋ iwan komi äma ba unitäŋo hos karis täŋyäkŋatpewa kädet u iwat yäpmäŋ äbäŋkä waŋpäŋ paotinik täŋkuŋ.

Paotpäŋ äneŋi nämo akuŋkuŋ. Uwä ämatä topän däpä kumäk täkaŋ ude bäräŋeŋ paotkuŋ.

18 Ude täŋkuro unita ŋode täwetat;

Imaka bian ahäŋkuko unita nämo nadäneŋ. Ba imaka bianita nämo juku pineŋ.

19 *Rev 21:5 Nadäkaŋ? Näkä imaka kodaki kubä pewa ahäwayäŋ täyak. Eruk, ahätak ŋo nämo kaŋpäŋ nadäkaŋ? Näkä kome jopiken kädet täwitat. Ba kome kawukiken ume pewa ahäkaŋ.

20-21 *Luk 1:74-75; 1Ko 6:19, 10:31; Efe 1:5-6; Kol 1:16 Näk ume kome kawukiken pewa ahäk täkaŋ unita tom ägwäri, aŋ ba gwektä naniŋ oret täkaŋ.

Ba äma äbotnaye näkŋata biŋam itneŋta iwoyäŋpäŋ yepmaŋkuro u näkŋo wäpna yäpmäŋ akuŋpäŋ kwawak pewut yäŋpäŋ ume yepmäŋ towik täyat.