8
Anutu ima mebärita komen äma nin nadäŋ nimik täyak?
* Sam 113:4, 148:13 Ekäni Mähemnin, wäpka biŋam gäripi gakŋi nikektä kome kuduptagän intäjukun itak!
 
Wäpka biŋam ärowani unita kunum gänaŋ naniktä gäk ganiŋoret täkaŋ.
* Sam 44:16; Mat 21:16; 1Ko 1:27 Täŋpäkaŋ iwankayetä mäyäk nadäwut yäŋpäŋ nanak pakikät iroŋiroŋi yäwetpäŋ yäwoŋärek täŋiri kap terak ganiŋoret täkaŋ.
Teŋirä iwankayetä nadäŋpäŋ umuntaŋpäŋ man kum api itneŋ.
 
* Sam 111:2 Täŋpäkaŋ Ekäni, näk kunum terak dapun täŋpäŋ imaka säkgämän ketkatä täŋ peŋkuno, komepak ba guk komeniken yepmaŋkuno u yabäŋ yäwatpäŋ nadäwätäk ŋode täk täyat;
* Jop 7:17-18; Sam 144:3; Hib 2:6-8 Anutu, imata gäk äma mewuni ninta nadäwi ärowani täk täkaŋ? Imata ämawebe watä säkgämän it nimik täyan?
Nin äpani ude itnaŋipäŋ wäpnin biŋam epmäget kudän nikek ude nipmaŋkun. Bureni, imaka päke u kudup yärepmitpäŋ gäkŋa bumik nipmaŋkun.
 
* Stt 1:26-28; 1Ko 15:27; Efe 1:22; Hib 2:8 Ude täŋkaŋ imaka kudup ketkatä täŋ-peŋkuno u yabäŋ yäwatta nipmaŋkun. Ude täŋiri imaka kudup u gämotninken itkaŋ.
7-8 Yawakkät tom ägwäri, barak ba imaka imaka gwägu pähap gänaŋ komeni komeni kuŋat täkaŋ u kuduptagän äma gämoriken yepmaŋkunotä itkaŋ.
 
Unita Ekäni Mähemnin, wäpka biŋam gäripi gakŋi nikektä kome kuduptagän intäjukun itak!

*8:1: Sam 113:4, 148:13

*8:2: Sam 44:16; Mat 21:16; 1Ko 1:27

*8:3: Sam 111:2

*8:4: Jop 7:17-18; Sam 144:3; Hib 2:6-8

*8:6: Stt 1:26-28; 1Ko 15:27; Efe 1:22; Hib 2:8