1 Polo, Sailasa-la, liyamba Amipolisa tano okona pulu, Apolonia tano okona peapilipia. Tano okone tepa alu poto, liyamba Tesalonaika tano okona peakaiyu leapilipia. Tano okonena Juta yamena lotu anda mindi ateaipia. 2 Sambasa dindi lo Poloto Juta yamena lotu anda tupana kolandaka loto, pii lamiayane pua teke, Sambasa tepona Poloto lotu anda okonena kolandaka loto, Gotena pii pepa pelene eya mindimane wua leya loto, wandakali tupa pii lamai-yaepia.

3 Balato utupane lamawuato, Gotena pii pepa pelene eya mindimane loto, Mesaya oko bala tandaka noto omalu, malinga ika lolopeya layene yene pua, Jisasa bala tandaka noto omalu, malinga ika leaipia. Tene okonena, bala Mesaya oko ateya leyo leaipia. 4 Poloto wuane lea-kola, Juta yame wandakali minditupapi, Gote lo lotu lalaini Gitiki yame wandakali kambua wete minditupapi, tano okonena wanda gene yene kambuapi, utupane-mane Jisasa bala Kataisa oko ateya lo bilipi loto, Polo, Sailasa-la, okonelapo towa tako peainipia.

5 Tako peai-kola, Juta yame-mane akali okonelapo towa apiangu puato, wandakali amunguli piyaini ama okona poto, akali koo kambua mo amunguli puato, utupanena nembo-tene koo mindi mina ika lamai-yainipia. Polo, Sailasa-la, liyamba Jesone andaka pitulu-peyapi nembo toto, Juta yame-mane akali koo utupane towa atu Jesone andaka peainipia. Utupane-mane Polo, Sailasa-la, okonelapo minu awua kamaka poto, akali koo tupana kininga maimakale nembo toto, anda asia lomba oko peyo keao loto, kolandaka leainipia.

6 Utupane-mane kolandaka leaini tekeko, Polo, Sailasa-la, okonelapo piti napeapi-kola, utupane-mane Jesonepi, Kitisene wandakali waka minditupapi, utupane minu kilau lo awua tano okonena ando atalaini akali tupa ateainga peainipia. Poto, utupane-mane pii taimane loto, yuu eya tupa pitaka minu koyalaini lapo akali andipa wali epo ateyapi leainipia. 7 Epo ateyapi-kola, Jesoneto akali okonelapo atu bala andaka poto, yatawa palipia. Yatawa palipia-kola, akali utupane pitaka-mane kiŋi waka Jisasa lene mindi ateya loto, Lomo tane gapomane akali kawane Sisato loo mindi yata yane oko kalo peyapi leainipia. *Lk 23:2; Jo 19:12

8 Wuane leai-kola, tano okonena ando atalaini akali tupapi, wandakali kambua amunguli pua ateaini tupapi, utupane-mane pii okone ale wato, mini koo paleainipia. 9 Mini koo paluto, tano okonena ando atalaini akali tupamane Jesonepi, Kitisene wandakali waka tupapi, utupane yakama kote kambeakale leainipia. Wuane lalu, yakamato lapone wuane teke peaindo, nanimato yakamana muni oko wetete molopeyama lamaiyu, peakale tepa yainipia.

10 Matili undupi lea-angi, Kitisene wandakali tupamane Polo, Sailasa-la, okonelapo Betiya tano okona wamba ini peakale leai-kola, liyamba Betiya tano okona peakaiyu loto, Juta yamena lotu anda okona kolandaka leapilipia. 11 Juta yame wandakali Betiya tano okonena ateaini utupane-mane Juta yame wandakali Tesalonaika tano okona ateaini tupa ita minuto, mana epene wete mindi mineaini-pia. Mana epene okone minuto, utupane-mane pii Poloto leane tupa epelewa ale wato, enene leyape lo yapa lo tale puyale, Gotena pii pepa pelene eya tupa ole dindi lo wayumane dii lo ando ateainipia. 12 Wuane pua atoto, Juta yame wandakali kambuapi, Gitiki yame wandakali gene yene kambuapi, utupane-mane Jisasa lo bilipi leainipia.

13 Utupane-mane bilipi leaini tekeko, matili Tesalonaika tano okona Juta yame wandakali ateaini tupamane Poloto Gotena pii oko Betiya tano okona lamawua ateya lene ale yainipia. Ale alu, utupane Betiya tano okona epoto, Betiya tane wandakali kambua minu kee wato, utupanena nembo-tene koo mindi mo paliya yainipia. 14 Wuane peai-kola, Kitisene wandakali tupamane Polo bala akali minditupa towa atu ipa solewata matenenga wamba ini peakale leaini tekeko, Sailasa, Timoti-la, liyamba Betiya tano okona mee ateapele-pia.

15 Ateapi-kola, Polo atu peaini akali utupane bala Atenesa tano okona ape yalu, Betiya tano okona peke loyale peainipia. Peke loyale peai-kola, Poloto utupane lamawuato, yakamato Sailasa, Timoti-la, lamawuato, Poloto liyamba namba ateyo okona wamba ini ipulupape lala lo lamai-yapape leaipia. Wuane lea-kola, akali utupane Atenesa tano oko tepa alu, Betiya tano okona peke leainipia.

16 Poloto Sailasa, Timoti-la, okonelapo epeakale lo maliyo atoto, bala Atenesa tano okonena epoko puato andea-kola, owato gote wandakali kii-mane waa-pene kambua wete tano okonena tumbi latane ateanga andoto, bala mini koo wete paleaipia. 17 Tene okonena, balato Juta yamena lotu anda okona poto, Juta yamepi, Gote lo lotu lalaini wandakali yame waka tupapi, utupanenga Gotena pii oko lamai-yaepia. Ole dindi lo makesa yalaini ama okona bala poto, wandakali ongane epo amunguli piyaini tupa pii lamaiki piki peaipia. *Ap 18:19

18 Poloto Jisasa bala malinga ika leane okona lo pii lamawua atea-kola, Epeku-tiana yame okona mana andene akalipi, Sotoki yame okona mana andene akalipi, utupanena minditupa-mane loto, mana anda napene akali oko bala pii lo awua epoko puato, pii anu-pene mindi lokale lo leyape leainipia. Utupane-mane wuane leaini tekeko, minditupa-mane loto, balato yuu waka tane tupana Gote tupamane wua peaini lo pii lolane anu puape leainipia. Wuane leai-kola, Poloto akali utupane towa pii yanda pimawua ateaipia.

19-21 Ole dindi lo Atenesa tano okona tane tupapi, yuu waka tane Atenesa epo atalaini tupapi, utupane pitaka-mane pii wenene mindi ale aima lakae lo atalainipia. Pii wenene mindi ale alu, utupane-mane pii okonena tene tupana pii lalawa pua atalainipia. Tene okonena, utupane-mane Polo lamawuato, nanimato nimbana pii oko ale aima-kola, pii okone waka mindi-pene gulapia okonena, nanimato nimbana pii okonena tene tupa ale aima lakae lo nembo teyama-ko. Nimbato pii wenene mindi wandakali lamailini pia okone nanima langulape leainipia. Wuane leai-kola, Polo katu yalua leaipia. Wuane lea-kola, utupane-mane Polo minu atu poto, kanjole yame amunguli piyaini yuu wangiane Atiyo-pakusa lene okona peainipia.

22-23 Poto, Poloto akali kanjole utupanena tombenenga ika loto, yuu wangiane Atiyo-pakusa okona atoto, wua leaipia: Atenesa tane akali tupa, wamba namba epoko puato, minditaka yakamato lotu lalaini yapia tupa andalo-kola, yakamato yakamana gote tupa lo wayumane wete lotu lalaini lo andalo. Nambato andalo-kola, alata toko mindina pii mindi pepa peyatane atala oko wua lo peyatane atala okomane alata toko oko gote nanima anda napeyamane okona alata toko eya lo pepa peyatane atala. Yakamato Gote okone anda napene, mee lotu lalaini oko bala Gote okopene lo andipa nambato yakama langukale.

24 Yuu okopi, minditaka yuu okona eya tupapi, utupane pitaka yakale leane Gote oko bala yuu okola, ati kenga okola, okone-lapona akali andane oko atoto, wandakalina kini-mane lotu anda pitane ateyai tupana ata napiyane. Jia. *1Ki 8:27; Ap 7:48 25 Balanga minditaka jia yo ata napiyane. Jia. Bala tane-mane nanima wandakali pitakana nembo-tene poo lo pange loto, saka ataya wato, minditaka nanimanga eya tupa pitaka taka giyane-ko. Wandakali-mane bala moyo atolane tene mindi naeya. *Sam 50:12

26-27 Gote bala nanima wandakali mindiki-mindiki towa amonga waka gulo ata napiyane. Jia. Wandakali-mane bala gote okopene mindi ateya lo mana meakale nembo toto, balato nanimana yumbane mindiki Atameto angu wandakali yame tupa pitaka mandeakale leaipia. Mandea-kola, Goteto yuu yoo peya tupa pitaka tombo peyoto, wandakali yame mindiki-mindiki lo tombo mindi maiki piyu, balato utupane ee ana oko-tuma ateakale lata yaepia. *Sam 145:18; Jet 23:23

28-29 Akali minditupa-mane Gote bala okopene ya nembo toto, golo yandopi, silipa yandopi, ana yandopi, okonetaka mindi moto, gote mindi kii-mane waa piyaini tekeko, Goteto nanima saka ataya wato, minu tai laya eya-kola, nanima asia epoko pua ateyama. Wamba Atenesa tane wandakali yakamana mana andene akali minditupa-mane loto, nanimapi Gotena andopane tupa ateyama leainipia. Nanima balana andopane ateyama okonena, nanimato bala gote kii-mane waa-pene okonepene ateya nembo natape-pene. Jia. *Ais 40:18-20; 44:10-17; Ap 19:25-27

30-31 Wamba wandakali ateaini tupamane mana koo mineyama nembo natene atoto, koo pua ateai-kola, Goteto utupanena mana koo okone andoto teke, anda napene gulo ateaipia. Balato wuane peane tekeko, matili balato yuu okona wandakali tupa pitaka yapa lo tale puato, mana tika-pene oko wato minuto, kosimi lokale lo gii mindi yata yaepia. Tene okonena, andipa balato yuu yoo peya tupa pitakana wandakali ateyai tupa pitaka lamawuato, yakama yamapane peke lalapa leya. Wandakali pitakana kote ale yakale loto, Goteto akali mindi yapa lo meaipia. Akali okonemane piape okone pulupeya lo wandakali pitakanga andawa loyale, Goteto bala malinga ika laya yaepia. Poloto wuane leaipia. *Sam 96:13

32 Poloto akali omene mindi malinga ika leane lea-kola, wandakali minditupa-mane ale wato, Pii nimbato lale okone alu mindi nanimato lapone ale amakale, leaini tekeko, minditupa-mane bala lamba leainipia. 33 Lamba leai-kola, Poloto wandakali utupane tepa alu, bala peaipia. 34 Bala peane tekeko, yuu wangiane Atiyo-pakasa lene okona amunguli piyaini kanjole akali gene Dayoni-siasa lene mindipi, wanda gene Damatisa lene mindipi, dee wandakali waka minditupapi, utupane-mane Jisasa lo bilipi leainipia.