1 Gêdêŋ ŋasawa tonaŋ Jesu kêsôm biŋ gêdêŋ lau pom kapôêŋ teŋ to nê ŋacseŋomi gebe 2 “Biŋsutau to Parisai têdôŋ to sêwa Mosenê biŋsu sa. 3 Amboac tonaŋ biŋ samob, taŋ sêsôm gêdêŋ amac naŋ, ajop to amansaŋ. Tageŋ gêŋ, taŋ sêgôm naŋ, aŋgôm atom, gebe êsêac sêsôm gêc aweŋsuŋgeŋ, mago tauŋ sêgôm atom. 4 Êsêac sêkic gêŋ ŋawapac ma sêu gêsac lau magiŋm, ma êsêac tauŋ segeŋ tauŋgeŋ. 5 Êsêac sêgôm nêŋ gêŋ samob kêtu ŋamalac sêlicŋageŋ, sebec naŋeŋeŋ kapôêŋ mecŋa to sêsô ŋakwê ŋalêsô baliŋ. 6 Ma êsêac têntac gêwiŋ sebe sênac tauŋ mata-mata gebe sêŋgôŋ ŋamatageŋ aŋga gamêŋ sêniŋ gêŋŋa to aŋga lôm amboac tonaŋgeŋ, 7 ma sebe lau aweŋ ênac êsêac aŋga malacluŋ to sêsam êsêac gebe ‘Mêtêmôkê’. 8 Mago sêsam amac gebe ‘Mêtêmôkê’ atom, ŋac tageŋ kêtu nêm mêtêmôkê ma amac samob atu ŋalasitêwaigeŋ. 9 Ma asam ŋac teŋ aŋga nom gebe ‘Tamemi’ atom, amac Tamemi tageŋ tê gêmoa undambê. 10 Ma sêsam amac gebe “Laumata mêtêŋa’ atom, gebe amacnêm laumata mêtêŋa tageŋ tec Kilisi tau. 11 Amacnêm ŋac kapôêŋ atu amacnêm sakiŋwaga. 12 Teŋ embe etoc tau sa, go Anôtô êkôniŋ eŋ ma teŋ embe êkôniŋ tau, go Anôtô etoc eŋ sa.

13 “Ojaê amac dansaŋtêna, biŋsutau to Parisaimêŋ, tec êlai gamêŋ undambêŋa auc gêdêŋ ŋamalacgoc. Amac taôm oc asô ana atom, ma lau taŋ sebe sêsô sêna naŋ, tec amac akô êsêac auc sêwiŋ.

14 [“Ojae amac dansaŋtêna, biŋsutau to Parisaimêŋ, tec ajaŋgo awêtucnêŋ andu to ŋawaba ŋawaô, mago akwa taôm auc ŋa mec baliŋ. Ŋagêjô oc êtap amac sa êlêlêc.]

15 “Ojae amac dansaŋtêna, biŋsutau to Parisaimêŋ, tec ajac laoc gwêc to masaŋmgeŋ abe anam ŋac jaba tageŋ ôkwi êtu Juda. Ma embe anam eŋ ôkwi su, oc aŋgôm eŋ êtu lamboam ŋakêlêndiŋ ŋalatu êlêlêc amac taôm su.

16 “Ojae amacmêŋ tec matempec, mago abe awê lau. Amac asôm gebe ‘Ŋac teŋ embe êtôc lêma êpi lôm dabuŋ, oc êŋgôm nê biŋ ŋanô êsa atom. Ma tageŋ embe êtôc lêma êpi lôm dabuŋ ŋagold, tonaŋ tec oc êŋgôm ŋanô êsa.’ 17 Meloc to matempec ŋanô amac. Gêŋ ondoc ŋanô, gold me lôm dabuŋ, taŋ gêgôm gold kêtu gêŋ dabuŋ. 18 Ma teŋ gebe ‘Teŋ embe êtôc lêma êpi altar, oc êŋgôm nê biŋ ŋanô êsa atom. Ma tageŋ embe êtôc lêma êpi da, taŋ gêsac altar tau ŋaô, tonaŋ tec oc êŋgôm ŋanô êsa.’ 19 O matempecac, gêŋ ondoc ŋanô, da me altar, taŋ gêgôm da kêtu dabuŋ. 20 Ŋac embe êtôc lêma êpi altar, naŋ oc êtôc êpi altar tau to gêŋ samob, taŋ gêsac ŋaô naŋ êwiŋ. 21 Ma teŋ embe êtôc lêma êpi lôm dabuŋ, naŋ oc êtôc êpi lôm tau to ŋac, taŋ gêmoa lôm ŋalêlôm naŋ êwiŋ. 22 Ma ŋac teŋ embe êtôc lêma êpi undambê naŋ oc êtôc êpi Anôtônê lêpôŋ to ŋac, taŋ gêŋgôŋ ŋaô naŋ êwiŋ.

23 “Ojae amac dansaŋtêna, biŋsutau to Parisaimêŋ, amac embe atap laki to gwêc ma môsi 10-10 sa, go akêŋ ŋateŋ êtu da. Ma biŋsu ŋakoleŋ ŋanô tonec biŋgêdêŋ to taêm walô lauŋa ma akêŋ gêwiŋ, tec awi siŋ, Daŋgôm teŋ ma dawi teŋ siŋ atom. 24 Amac matempec, mago abe awê lau. Embe aniŋ gwada sauŋsauŋ, go ajaliŋ ŋatêkwa ŋapepgeŋ, ma bôc tec aeŋ totêkwageŋ.

25 “Ojae amac dansaŋtêna, biŋsutau to Parisaimêŋ, tec akwasiŋ laclu to suc ŋadêmôêŋa ŋapep ma ŋalêlôm geŋgeŋ to gêŋ wauc-wauc gêjam auc. 26 Aô, matapec Parisai, ôkwasiŋ laclu ŋalêlôm êmuŋ acgom, go ŋadêmôêŋa ŋawasi êsa êwiŋ.

27 “Ojae amac dansaŋtêna, biŋsutau to Parisaimêŋ, amac tec atôm sêô, taŋ sêsê ŋadêmôêŋa ŋa pocko gebe ŋakatu ŋajam, go ŋalêlôm naŋ ŋacmatê ŋatêkwa to gêŋ gêmôb gêjam auc. 28 Amac atôm tonaŋ. Ŋamalac sêlic amacnêm ŋadêmô ŋa amboac lau gadêŋ, mago nêm ŋalêlôm tec biŋdansaŋ to gêŋ sec gêjam auc.

29 “Ojae amac dansaŋtêna, biŋsutau to Parisaimêŋ, tec akwê andu kêkô propetenêŋ sêô ŋaô to ajam gêlôŋ lau gêdêŋ nêŋ sêô 30 ma asôm gebe ‘Aêac embe daŋgôŋ êndêŋ tameŋinêŋ têm, oc tawe propetenêŋ dec ŋakaiŋ atom.’ 31 Amacnêm biŋ tonaŋ gêwa amac sa gebe Lau taŋ sêjac propete êndu naŋ, nêŋ latuŋi amac. 32 Amboac tonaŋ anac dabiŋ tameminêŋ secmaŋ. 33 Moac to lêŋuckêm ŋalatu amac, abe aêc lamboam ŋakêlêndiŋ ŋamêtôc su amboac ondoc.

34 Amboac tonaŋ alic acgom, aê jasakiŋ propete to lau malô ma biŋsutau êndêŋ amac, ma amac oc anac êsêacnêŋ ŋagêdô êndu to anac ŋagêdô sêpi kakesotau ma ai ŋagêdô aŋga nêm lôm ma ajanda ŋagêdô selom-selom malacgeŋ sêna, 35 gebe dec ŋajam samob, taŋ sêkêc siŋ aŋga nom gêdêŋ ŋac gêdêŋ Abelnê dec e gêdêŋ Balakia latu Sakaria nê dec, taŋ ajac eŋ êndu aŋga lôm dabuŋ tau to altar dajaŋa ŋasawa naŋ, êpi amac samob. 36 Biŋŋanô, aê jasôm êndêŋ amac gebe Gêŋ samob tonaŋ ŋai ŋagêjô oc êtap lau têm tonecŋa sa.

37 “Jerusalem, Jerusalem, aôm gôjac propete êndu to kôtuc êsêac, taŋ Anôtô kêsakiŋ dêdêŋ aôm sêwac naŋ, ŋa poc êndu. Aê gagôm gêŋlêlôm elêmê gabe janac aômnêm ŋapalê sa amboac talec têna gêjac ŋalatu sa sêsô magê ŋalabu, mago amac adec. 38 Alic acgom, amacnêm andu oc êtu tuc êkôŋa. 39 Aê jasôm êndêŋ amac gebe Galoc oc alic aê êtiam atom, e taôm asôm gebe ‘Lambiŋ êndêŋ eŋ, taŋ gêmêŋ gêjam Apômtau laŋô naŋ.’ ” *Mosenê biŋsu kêjatu gebe lau Juda sêmansaŋ naŋeŋeŋ toatali ŋasec-ŋasec. Êsêac teto biŋsu ŋagêdô kêsêp papia ma sêkêŋ kêsêp atali ma sebec gêdêŋ noc mecŋa. Ŋakwê ŋalêsô aclê ŋam gebe êkêŋ puc lau e sêliŋ Anôtônê biŋsu siŋ atom.