15 Gêdêŋ bêc, taŋ sêkwê lômbec tau sa naŋ, tao majaŋ mêŋkêgadê Anôtônê biŋsu ŋabec tau. Ma gêdêŋ kêtula tao mêŋkêkô andu ŋaô amboac ja e geleŋŋa. 16 Tao majaŋ kêgadê andu gêdêŋ ocsalô ma tao ja kêkô ŋaô gêdêŋ gêbêc gêjô tau-gêjô tau ŋapaŋ. 17 Tao embe êôŋ sa aŋga lômbec, go lau Israel sêndi. Ma embe naêsêp gamêŋ teŋ, go lau Israel sê nêŋ bec aŋga tonaŋ. 18 Apômtaunê biŋ kêjatu lau Israel, gebe sêndi ma Apômtaunê biŋ kêjatu êsêac, gebe sê nêŋ bec. Êsêac sêmoa gamêŋ tau êtôm bêc, taŋ tao êŋgandê lômbec auc naŋ. 19 Tao embe êŋgandê lômbec auc bêc taêsam, go lau Israel sêsô Apômtaunê biŋ ŋalabu ma sêndi atom. 20 Ŋasawa ŋagêdô tao kêgadê lômbec auc bêc gwalêkiŋ atom, tec êsêac sêmoa gamêŋ tau kêtôm Apômtaunê biŋ kêjatu ma dêdi kêtôm Apômtaunê jatu. 21 Ŋasawa ŋagêdô tao kêkô gêdêŋ kêtula e gêdêŋ bêbêcgeŋ ma gêdêŋ taŋ gêôŋ sa gêdêŋ bêbêcgeŋ naŋ, êsêac dêdi. Me tao embe gacgeŋ êkô êndêŋ ocsalô teŋ ma êmbêc teŋ, ma embe êôŋ sa êndêŋ tonaŋ, go sêndi amboac tonaŋgeŋ. 22 Tao embe êŋgandê lômbec auc bêc luagêc me ajôŋ samuc teŋ me ŋasawa baliŋ ec, go lau Israel sêmoa gamêŋ tau ma sêndi atom. Mago tao embe êôŋ sa, naŋ êsêac sêndi amboac tonaŋgeŋ. 23 Êsêac sê nêŋ bec kêtôm Apômtaunê jatu ma dêdi kêtôm Apômtaunê jatu. Êsêac sêsô Apômtaunê biŋ ŋalabu kêtôm Apômtaunê jatu, taŋ Mose kêsôm lasê naŋ.

10:1-32 Lau Israel dêdi aŋga lôc Sinai ma sêwi gamêŋ sawa siŋ ma sepeŋ gamêŋ, taŋ Anôtô gêjac mata gebe êkêŋ êndêŋ êsêac ŋamiŋ kêsêp ŋasawa tonec.