56
Mec mateŋ êsap Anôtôŋa
1 O Anôtô, taêm labu aê gebe ŋamalac sêu lai aêŋa elêmê.
Lau siŋwaga sêlêsu aê gedeŋ tôŋgeŋ.
2 Ŋoc ŋacjo sêu lai aê gedeŋ tôŋgeŋ
gebe êsêac, taŋ tetoc tauŋ sa ma sêkêŋ kisa aê naŋ, lau taêsam ŋasec.
3 Gêdêŋ ŋasawa, taŋ ŋoc ŋalêlôm ŋagogo gamoa naŋ,
aê taêc kêka aômgeŋ.
4 Aê taêc kêka Anôtô ma katêc tauc atom.
Aê kalambiŋ Anôtô kêtu biŋ, taŋ eŋ gêjac mata naŋ. Ŋamalac oc sêŋgôm asageŋ êndêŋ aê.
5 Kêtôm bêc samobgeŋ ŋoc ŋacjo sêlênsôŋ aê.
Êsêac taêŋ gêjam biŋ tageŋ tonec gebe sêkic aêŋoc biŋ.
6 Êsêac sêkac tauŋ sa ma dêdib aêŋoc lêŋ semoa
gebe taêŋ kêka sebe senseŋ aê su.
7 O Anôtô, ôkeŋ ŋagêjô êndêŋ êsêac êtu nêŋ secŋa.
Aôm têmtac ŋandaŋ ma ôku tenteŋlatu tulu.
8 Aôm kôsa aêŋoc noc ŋawapacŋa sa. Aôm kôkêŋ aê matocsulu kêsêp nêm laclu jakêpoac.
Aôm koto ŋoc bêc ŋawapacŋa kêsêp nêm bukugoc.
9 Embe jamôêc êndêŋ Apômtau oc ŋoc ŋacjo sêc su.
Aê kajala kêtu tôŋ gebe Anôtô ênam aê sa.
10 Aê oc jalambiŋ Anôtô êtu nê biŋŋa.
Aê kalambiŋ Apômtau kêtu biŋ, taŋ gêjac mata naŋ.
11 Aê taêc kêka Apômtau, tec katêc tauc atom.
Ŋamalac têtôm gebe sêŋgôm asageŋ êndêŋ aê.
12 O Anôtô, kôm tonec gêjac aê ŋawae gebe jaŋgôm biŋ, taŋ gajac mata gêdêŋ aôm naŋ, ŋanô êsa.
Aê oc jansuŋ da daŋgeŋa êndêŋ aôm êwac.
13 Gebe aôm gôjam aêŋoc katuc sa gebe jamac êndu atom
ma gôjam ockaiŋ sa gebe jaka bêlêlib atom.
Gebe jasêlêŋ jamoa Anôtô laŋônêmŋa
ma jamoa ŋawê, taŋ kêpô lau mateŋ jali naŋ, ŋalêlôm jawiŋ.
*Dawidnê pesalem teŋ, gêga gêdêŋ taŋ lau Pilisti sêkôc eŋ tôŋ aŋga malac Gat naŋ.