57
Mec Anôtô ênam aêac saŋa
(Pes 108:1-5)
1 O Anôtô, taêm labu aê, taêm labu aêmaŋ
gebe ŋoc katuc gê lamu aômgeŋ.
Aê gabe jaê lamu aôm magêmlabu
e ŋaclai enseŋ aê suŋa ê su acgom.
2 Aê gamôêc gêdêŋ Lôlôc Ŋatau Anôtô.
Gamôêc gêdêŋ Anôtô, taŋ gêjam gôliŋ ŋoc biŋ gêmoa naŋ.
3 Eŋ kêkêŋ nê gêŋ ênam aê saŋa aŋga undambê mêŋêsa. Eŋ oc êŋgôm lau, taŋ sêjanda aê naŋ, majeŋ êsa.
Anôtô oc êkêŋ nê têtac gêwiŋ teŋgeŋŋa to biŋ ŋaŋêŋŋa êmêŋ.
4 Aê gaêc lewe ŋalêlôm.
Êsêac gwadatêna sec.
Luŋluŋ kêtôm kêm to sôb
ma imbeleŋ kêtôm siŋ ŋamata.
5 O Anôtô, ôwaka taôm sa aŋga undambê
ma nêm ŋawasi ênam nom samucgeŋ auc.
6 Êsêac sêkic uc aê gebe jawê
ma sêkôniŋ aê katuc tôŋ.
Êsêac sêkwê sê teŋ geseŋ aê auc,
mago êsêac tauŋ sêu tauŋ sêsêp.
7 O Anôtô, aê têtac kêpa su, têtac kêpa sugoc.
Aê janam wê to janac gêŋ wêŋa êtaŋ.
8 O ŋoc katuc, ôndi sa. O gêŋ wêŋaagêc, andi sa.
Aê gabe jaŋu gamêŋ êu bôŋ sa.
9 O Apômtau, aê gabe janam daŋge aôm jamoa lau taêsam ŋalêlôm.
Aê gabe jalambiŋ aôm jamoa tenteŋlatu ŋalêlôm.
10 Gebe aômnêm têmtac gêwiŋ teŋgeŋŋa kêpi e jagêdêŋ undambê
ma aômnêm biŋ ŋaŋêŋ e gêdêŋ tao.
11 O Anôtô, ôwaka taôm sa aŋga undambê
ma nêm ŋawasi ênam nom samucgeŋ auc.
*Dawidnê pesalem teŋ gêga gêdêŋ taŋ gêc Saul su aŋga pocgêsuŋ naŋ.